ادام ساۋداسىنىڭ قۇرباندارى الەۋمەتتىك قولداۋدى قاجەت ەتەدى

اتالعان بايانداما مەملەكەت باس­شىسىنىڭ, حالىقارالىق جانە ۇلتتىق ساراپشىلاردىڭ وڭ باعاسىن الىپ, قازاقستانداعى حالىقارالىق كوشى-قون ۇيىمى ميسسياسىنىڭ جاردەمىمەن قازاق, ورىس جانە اعىل­شىن تىلدەرىندە باسىلىپ شىقتى.

تانىستىرىلىمعا پرەزيدەنت جانىنداعى ادام قۇقىقتارى جو­نىندەگى كوميسسيانىڭ توراعاسى يگور روگوۆ, الماتى قالاسى اكى­­مى­نىڭ ورىنباسارى ماقسات قي­قىموۆ, ورتالىق ازياداعى حالى­قارا­لىق كوشى-قون ۇيىمى ۇيلەس­تىرۋشىسى­نىڭ مىندەتىن اتقا­رۋشى ەۆگەني حون, الماتى قالاسى پوليتسيا دە­­پارتامەنتى باستىعىنىڭ ورىنباسارى رۋستام ءابدىراحمانوۆ قا­تىستى.

يگور روگوۆ ءوز سوزىندە بايان­دا­مانىڭ ماڭىزدىلىعىن اتاپ ءوتىپ, مەملەكەتتىك ورگانداردىڭ ادام ساۋ­داسىنا قارسى كۇرەس سالاسىنداعى جانە داعدارىس ورتالىقتارىن, سونداي-اق بارلىق ساناتتاعى ترافيك قۇرباندارىنا, اسىرەسە, قازاقستاندا ۋاقىتشا ءجۇرىپ-تۇراتىن, ەلىمىزدىڭ اۋماعىندا ادام ساۋداسىنىڭ قۇر­بانى بولعان شەتەلدىك ازاماتتار مەن ازاماتتىعى جوق ادامدارعا ارناۋلى الەۋمەتتىك قىزمەتتەر كور­سەتۋ سالاسىنداعى ءوزارا ءىس-قيمىل تەتىك­تەرىن نىعايتۋعا ەرەكشە نازار اۋداردى.

ادام قۇقىقتارى جونىندەگى كوميسسيا توراعاسىنىڭ ايتۋىنشا, قازىرگى كەزدە باياندامانى پرەزيدەنت قۇپتاپ وتىر. ەندىگى كەزەكتە تاپسىرما بەرىلگەننەن كەيىن ءتيىستى ورگاندار بۇل ۇسىنىستاردى ورىندايتىن بولادى. وسى ورايدا قىلمىستىق كودەكسكە ءتيىستى تولىقتىرۋلار ەن­گىزۋ, وكىلەتتى ورگاندار جۇمىسىن ۇيلەستىرۋدى كۇشەيتۋ, ادام ساۋداسى قۇرباندارىن انىقتاۋ مەن كۇرەس جۇرگىزۋدىڭ ۇلتتىق مەحانيزمدەرىن جەتىلدىرۋ, ادام ساۋداسىنا قارسى تۇراتىن جەكە زاڭ قابىلداۋ, سونىمەن بىرگە قولدانىستاعى زاڭناماعا الەۋمەتتىك قىزمەت كورسەتۋ بويىنشا وزگەرىستەر مەن تولىقتىرۋلار ەنگىزۋ, تمد ەلدەرى جانە ەاەو-عا مۇشە-مەملەكەتتەرمەن ارىپتەستىكتى نىعايتا ءتۇسۋ سياقتى ماڭىزدى ماسەلەلەر جۇمىس توبىنىڭ باستى نازارىنا الىنعان.

ادام ساۋداسى قۇرباندارى­نىڭ قۇقىعىن مەملەكەتتىك تۇر­عىدا قورعاۋدىڭ وتە ماڭىزدى ەكەن­دىگىن اتاپ وتكەن جۇمىس توبى­نىڭ جەتەكشىسى, كوميسسيا حاتشى­سى تاستەمىر ابىشەۆ اتالعان بايان­دامانىڭ قازاقستانداعى ادام ساۋداسىنا قارسى كۇرەس, ادام ساۋداسىنا بايلانىستى قىلمىستىق قۇقىق بۇزۋشىلىقتاردىڭ الدىن الۋ جانە انىقتاۋ تيىمدىلىگىن ارتتىرۋ, سونىمەن بىرگە ەلىمىز اۋماعىندا ادام ساۋداسى مەن ءماجبۇرلى ەڭبەكتىڭ قۇرباندارى بولعان شەتەلدىك ازاماتتار مەن ازاماتتىعى جوق ادامداردى قوسا العاندا, بارلىق ادام­عا ارناۋلى الەۋمەتتىك قىزمەتتەر كور­سەتۋ جونىندەگى تاپسىرمالارىن ورىنداۋ اياسىندا دايىندالعانىن اتاپ ءوتتى. ونىڭ ايتۋىنشا, ەلىمىزدە اتاۋلى الەۋمەتتىك كومەك 2016 جىل­دان باستاپ ادام ساۋداسىنىڭ قۇر­باندارىنا كورسەتىلىپ كەلەدى. الاي­دا ءتۇرلى سەبەپتەرمەن قازاقستانعا ۋاقىت­شا كەلگەن ەڭبەك ميگرانتتارى ادام ساۋداسىنىڭ قۇربانى بول­عاندا اتاۋلى الەۋمەت كومەك المايدى. وسى ورايدا اقش, نورۆەگيا, ششۆەيتساريا مەن گوللانديا ەلدە­رىنىڭ تاجىريبەلەرىن نەگىزگە العان تاستەمىر ابىشەۆ ادام ساۋداسىنا قاتىستى زاڭ قابىلداعان گرۋزيا, ليتۆا, ەستونيا, سونىمەن بىرگە تۇركىمەنستان مەن ارمەنيا ەلدە­رىنىڭ كورسەتكىشتەرىنە توقتالىپ ءوت­تى. ازىرگە قازاقستاندا مۇنداي زاڭ جوق. قازاقستان 2008 جىلى پالەرمو حاتتاماسىن راتيفيكاتسيالاعان. حاتتاماعا قاتىسۋشى مەملەكەتتەر ەلىندە تۇرعىلىقتى جانە ۋاقىتشا تۇرىپ جاتقان شەتەلدىك ازاماتتارعا مۇمكىندىگىنشە ارناۋلى الەۋمەتتىك كومەك كورسەتىلۋى قاجەت. ستاتيستيكا بويىنشا 3 جىلدا 1100 قىلمىس تىركەلگەن. وسى قىلمىس تۇرىمەن اينالىسقانى ءۇشىن 242 ادام سوتتى بولعان. دەگەنمەن قازاقستاندا بۇل قىلمىس ءتۇرى جىلدان-جىلعا ازا­يىپ كەلەدى.

باياندامانى تالقىلاۋعا كوميس­سيا مۇشەلەرى مەن ساراپشىلار ۆي­تالي ۆورونوۆ, ءزۇلفيا بايساقوۆا, سالتانات سىزدىقوۆا, ءنازيرا اسىل­بەكوۆا, ءاليا بەلونوسوۆا جانە جۇماجان جولداسبەكوۆ قاتىسىپ, قويىلعان سۇراقتارعا جاۋاپ بەردى.

تانىستىرىلىم بارىسىندا قازاقستان راتيفيكاتسيالاعان حا­لىق­ارالىق شارتتاردىڭ نورما­لارىنا سايكەس قاۋقارسىز ەڭبەكشى ميگ­رانتتار مەن بارلىق ساناتتا­عى ادام ساۋداسى قۇرباندارىنىڭ قۇقىق­تارىن قورعاۋ سالاسىنداعى ۇلتتىق زاڭناما مەن قۇقىق قولدا­نۋ تاجىريبەسىنە تالداۋ, ۋاكىلەتتى مەملەكەتتىك ورگانداردىڭ قىزمە­تىن باعالاۋ جۇرگىزىلىپ, كونستيتۋ­تسيا نورمالارى مەن حالىقارالىق ­ستان­دارتتارعا سايكەس ادام ساۋدا­سى قۇر­باندارىنىڭ ازاماتتىق, الەۋ­مەتتىك-ەكونوميكالىق, ەڭبەك جا­نە مادەني قۇقىقتارىن قورعاۋ تەتىك­تەرىن ودان ءارى جەتىلدىرۋ جونىندەگى ناقتى قا­دامدار اتاپ ءوتىلدى.

باياندامانى تانىستىرۋعا مەم­­لەكەتتىك جانە قۇقىق قور­عاۋ ور­گان­دارىنىڭ وكىلدەرى, عالىم­دار, ۇەۇ جانە داعدارىس ورتالىق­تا­رىنىڭ, ءبىلىم بەرۋ, دەنساۋلىق ساق­تاۋ جانە مادەنيەت, بيزنەس سالا­سى­نىڭ ماماندارى قاتىستى.

الماتى