پاندەميا باستالعالى اقتوبە وبلىسى تۇرعىندارىنىڭ 32 130-ى كوروناۆيرۋسپەن, 3 447-ءى پنەۆمونيامەن اۋىرسا, 29 605 ناۋقاس جازىلىپ شىقتى. وكىنىشتىسى, جۇقپالى ىندەتتىڭ سالدارىنان پاندەميا باستالعالى 529 ادام قايتىس بولدى. سوڭعى ونكۇندىكتە اۋرۋشاڭدىق دەڭگەيى بىرتىندەپ تومەندەپ, اقتوبە وبلىسى «سارى ايماققا» ەندى. جاز ايىندا ينفەكتسيا قايتا ورشىگەندە ينفەكتسيالىق اۋرۋحانالار مەن پروۆيزورلىق ورتالىقتاردا دايىندالعان 3 603 ينفەكتسيالىق كەرەۋەتتىڭ وسى كەزگە دەيىن 1 880-ءنى پايدالانىلدى. ايتا كەتەرلىگى, تامىز ايىمەن سالىستىرعاندا قىركۇيەكتىڭ ەكىنشى جارتىسىندا پروۆيزورلىق ورتالىقتارداعى ينفەكتسيالىق كەرەۋەت جۇكتەلىمى 35,4 پايىزعا ازايدى دەلىنسە دە, ينفەكتسيا جۇقتىرعاندار سانى كۇندەلىكتى جۇزدەپ تىركەلىپ جاتىر. بۇگىندە قالاداعى ينفەكتسيالىق اۋرۋحانادا 658 ناۋقاس, ال رەانيماتسيا بولىمشەسىندە 84 ناۋقاس ەم الىپ جاتسا, وكپەنى جاساندى جەلدەتۋ اپپاراتىنا 15 ناۋقاس قوسىلعان. بۇل ىندەت جۇكتى ايەلدەردى دە اينالىپ وتكەن جوق. قازىر اقتوبە مەديتسينا ورتالىعىندا كۆي-گە شالدىققان 51 جۇكتى ايەل ەم قابىلداسا, 9 جۇكتى كەلىنشەك جانساقتاۋ بولىمشەسىندە جاتىر.
بيىلعى وقۋ جىلى باستالعالى وڭىردە 489 مەكتەپ وقۋشىسى, 53 مەكتەپ مۇعالىمى كوروناۆيرۋسقا شالدىققان 123 مەكتەپ انىقتالدى. قىركۇيەكتەن بەرى ىندەت جۇقتىرعان وقۋشىلار مەن مۇعالىمدەردىڭ كوپشىلىگى قالا مەكتەپتەرىنەن. قازىرگى ۋاقىتتا 123 مەكتەپتىڭ 473 سىنىبى وقشاۋلانۋ جاعدايىنا كوشىرىلدى. سوعان قاراماستان, وقۋ جىلى باستالعالى وڭىردە بىردە-ءبىر مەكتەپ كارانتينگە جابىلعان جوق. قازىر بارلىق مەكتەپتە سانيتارلىق-ەپيدەميالىق تالاپتاردى ساقتاۋ بويىنشا كۇندەلىكتى مونيتورينگ جۇرگىزىلەدى.
اقتوبە وبلىسىندا پاندەميامەن كۇرەسكە وتكەن جىلى بولىنگەن 4,5 ملرد تەڭگەگە 40 وكپەنى جاساندى جەلدەتۋ مەن 64 رەنتگەن, 14 جاساندى قان اينالدىرۋ جابدىقتارى مەن 8 جىلجىمالى مەديتسينالىق كەشەن, 41 رەانيموبيل كولىگى ساتىپ الىنعان. بۇگىندە 4 500 مەديتسينا قىزمەتكەرى كوروناۆيرۋس ينفەكتسياسىنا شالدىققان ناۋقاستاردى ەمدەۋگە جۇمىلدىرىلعان. 26 قىركۇيەكتەن باستاپ اقتوبە وبلىسى كوروناۆيرۋس ينفەكتسياسىنىڭ تارالۋ ايماعى بويىنشا «سارى ايماققا» وتۋىنەن كارانتين تالاپتارى جەڭىلدەي باستادى. الايدا كۇزدە جاعدايدىڭ قالاي وزگەرەتىنى بەلگىسىز بولعاندىقتان مەديتسينا قىزمەتكەرلەرى ساقتىقتى ۇمىتقان جوق. بۇگىندە وڭىردەگى بارلىق مەديتسينالىق مەكەمەلەردە ەكى اپتالىق ءدارى-دارمەك قورى جاساقتالىپ, جەكە قورعانىش قۇرالدارى جەتكىلىكتى ازىرلەندى. بۇگىندە 4500 مەديتسينا قىزمەتكەرى كوروناۆيرۋس ينفەكتسياسىنا شالدىققان ناۋقاستاردى ەمدەۋگە جۇمىلدىرىلدى. سونداي-اق وبلىستا پتر-تەست جۇرگىزەتىن 12 لابوراتوريادا كۇنبە-كۇن 7 967 سىناما الىنادى.
وسى جىلدىڭ 1 اقپانىنان باستاپ وڭىرگە كوروناۆيرۋسقا قارسى 698 مىڭ دوزا ەكپە اكەلىندى. وبلىستىق دەنساۋلىق ساقتاۋ باسقارماسىنىڭ 24 قىركۇيەكتەگى مالىمەتى بويىنشا, ەكپەنىڭ 1-كومپونەنتىمەن 311 مىڭ ادام ء(وڭىر تۇرعىندارىنىڭ 59,6 %-ى) ەگىلسە, 2-كومپونەنتپەن 267 مىڭ تۇرعىن ەگىلدى (51,8 %-ى). تۇرعىنداردى جاپپاي ۆاكتسينالاۋ قارقىنىن كۇشەيتۋ ماقساتىندا 26 ماۋسىم مەن 26 قىركۇيەك ارالىعىندا «ەكپە ال دا, اۆتوكولىك ۇتىپ ال!» ۇتىس ويىنى ءوتىپ جاتىر. وعان دەمەۋشىلەردىڭ كومەگىمەن ەكى Chevrolet Cobalt اۆتوكولىگى, 96 باعالى سىيلىق ۇتىسقا تىگىلدى. ەكى اپتا سايىن Aqtobe تەلەارناسىندا وتكىزىلەتىن تىكەلەي ەفيردەگى ۇتىس ويىنىندا ءبىر كولىكتى قارعالى اۋدانى قوسەستەك اۋىلىنىڭ تۇرعىنى, بەس بالانىڭ اكەسى ۇتىپ الدى.
اقتوبە وبلىسىنىڭ 4 مىڭ كاسىپكەرى Ashyq جوباسىنا قاتىسۋعا ءوتىنىم بەردى. الايدا وسى جوبا ەنگىزىلگەلى ينفەكتسيا جۇقتىرسا دا, وقشاۋلانۋ تالاپتارىن ساقتاماعان اقتوبەلىكتەر قاتارى ازايار ەمەس. سانيتارلىق-ەپيدەميالىق قىزمەت ماماندارى قوعامدىق ورىنداردا ەمىن-ەركىن جۇرگەن 238 «سارى» مارتەبەسى بار جانە «قىزىل» مارتەبەسى بار 314 ادامدى انىقتاپ, 77 تۇلعاعا اپك 415-بابىنىڭ 1-بولىگىمەن 3-4 ملن تەڭگە اكىمشىلىك ايىپپۇل سالىندى. ايتا كەتۋ كەرەك, پاندەميا باستالعالى مونيتورينگتىك توپتار وبلىس اۋماعىندا 7 357 رەيد جۇرگىزىپ, 4 262 نىساندى تەكسەرىپ, سانيتارلىق-ەپيدەميالىق تالاپتاردى قاتاڭ بۇزعاندارعا 871 ايىپپۇل سالدى.
اقتوبە وبلىسى
