سقو-دا كارانتين شارالارى جەڭىلدەتىلەدى

ەپيدەميولوگيالىق جاعدايدى باعالاۋ ماتريتساسىنا سايكەس, وبلىس قىركۇيەك ايىنىڭ باسىنان «سارى» ايماقتا ورنالاسقان. وسىعان بايلانىستى سقو اكىمدىگى جانىنداعى كوروناۆيرۋستىق ينفەكتسيانىڭ پايدا بولۋى مەن تارالۋىنا جول بەرمەۋ جونىندەگى وڭىرلىك كوميسسيانىڭ شەشىمى نەگىزىندە 28 قىركۇيەكتەن باستاپ وڭىردە بىرقاتار جەڭىلدىك ەنگىزىلمەك:

1) ساۋدا-ويىن-ساۋىق ورتالىقتارىنا, ساۋدا ۇيلەرىنە, ساۋنالارعا, سپا ورتالىقتارىنا, باسسەيندەرگە, سپورت كەشەندەرىنە, فيتنەس ورتالىقتارىنا سەنبى جانە جەكسەنبىدە جۇمىس ىستەۋگە رۇقسات بەرىلدى;

2) ءدىني نىسانداردا ءبىر ادام كەمىندە 4 شارشى مەتر الاڭمەن قامتاماسىز ەتىلگەندە, سىيىمدىلىعىن 30 %-دان اسىرماي جابىق ءۇي-جايلاردا ۇجىمدىق ءىس-شارالار وتكىزۋگە رۇقسات ەتىلدى;

3) 30 ادامنان اسىرماي جەكە, توپتىق دايىندىقتار ءۇشىن مادەنيەت نىساندارىنىڭ جۇمىس ىستەۋىنە رۇقسات;

4) سپورتتىق ءىس-شارالاردى زال تولىمدىلىعىن 15%-دان اسپايتىن مولشەردە, تەاترلاردىڭ, كينوتەاترلاردىڭ, كونتسەرت زالدارىنىڭ وتىراتىن ورىندار سانىن 20%-دان اسىرماي وتكىزۋگە رۇقسات بەرىلدى;

5) قىزمەتكەرلەردىڭ كەمىندە 50%-ىن قاشىقتىقتان جۇمىس نىسانىنا اۋىستىرۋ, قىزمەتكەرلەرى COVID-19-عا قارسى ۆاكتسيناتسيالاۋدان وتكەن جاعدايدا ۇيىمدار, وفيستەر پايىزدىق ارا قاتىناس بويىنشا تالاپتاردى ەسەپكە الماي قىزمەتىن جۇزەگە اسىرادى.

6) قوعامدىق تاماقتانۋ نىساندارىنىڭ جۇمىس ۋاقىتىن ساعات 24.00-گە دەيىن ۇزارتۋعا, كەلۋشىلەر سانىن 50%-دان جانە 50 ورىننان اسىرماي جۇمىس ىستەۋگە رۇقسات ەتىلدى. سونداي-اق, COVID-19-عا قارسى ۆاكتسينا الماعان (سوڭعى 3 اي ىشىندە تۇراقتى مەديتسينالىق قارسى كورسەتىلىمدەرى بار جانە COVID-19-بەن اۋىرىپ جازىلعان ادامداردى قوسپاعاندا) ونەركاسىپتىك, اۋىل شارۋاشىلىعى كاسىپورىندارىنىڭ قىزمەتكەرلەرى ءۇشىن كۇندىزگى رەجيمدە جۇمىسقا جىبەرۋگە شەكتەۋ ەنگىزىلەدى.

ال «Ashyq» جوباسىنا قاتىساتىن الەۋمەتتىك-ەكونوميكالىق نىساندار كەلۋشىلەردىڭ «جاسىل» مارتەبەسى بولعان جاعدايدا:

ا) بانكەتتەر, ۇيلەنۋ تويلارى, مەرەيتويلاردى تولىمدىلىعىن 50 %-دان جانە ادام سانىن 70-تەن اسىرماي وتكىزۋگە;

ب) ادامدار كوپ جينالاتىن كونفەرەنتسيالار, فورۋمدار, ويىن-ساۋىق جانە وزگە دە ءىس-شارالاردى تولىمدىلىعىن 50%-دان جانە ادام سانىن 70-تەن اسىرماي وتكىزۋگە;

ۆ) كورمەلەردى تولىمدىلىعىن 70%-دان جانە ءبىر ۋاقىتتا 300 كەلۋشىدەن اسىرماي وتكىزۋگە;

گ) كورەرمەندەرمەن سپورتتىق ءىس-شارالاردى تولىمدىلىعى 70%-دان اسىرماي وتكىزۋگە; د) سپورت كەشەندەرى, سپورتتىق-ساۋىقتىرۋ ورتالىقتارىندا جاتتىعۋلاردى تولىمدىلىعىن 30%-دان ارتىق ەمەس وتكىزۋگە;

ە) ءدىني نىسانداردا تولىمدىلىعىن 30 %-دان اسىرماي ءىس-شارالاردى وتكىزۋگە رۇقسات بەرىلدى.