سقو ۆەتەريناريا باسقارماسىنىڭ مالىمەتىنشە, 21-26 قىركۇيەك ارالىعىندا م.جۇماباەۆ اۋدانى لەبياجە ەلدى مەكەنىندە 1003 ءۇي قۇسى قىرىلدى. بۇل - جەتى ءۇيدىڭ قۇسى. نەگىزىنەن 2-3 ايلىق قۇس - سونىڭ ىشىندە 130 تاۋىق, 291 قاز, 582 ۇيرەك ولگەن. ماماندار قۇستاردىڭ ولەكسەسىن جيناپ, ورتەدى.
«ۆەتەرينارلىق قىزمەت ەپيزووتيالىق زەرتتەۋ جۇرگىزىلدى. ولگەن قۇستاردان ماتەريال الىنىپ, زەرتحاناعا جىبەرىلدى. 24 قىركۇيەك كۇنى ونىڭ قورىتىندىسى كەلىپ, قۇس تۇماۋى ەكەنى راستالدى. ءۇي قۇستارىنا قاۋىپتى اۋرۋ جابايى قۇستاردان جۇعۋى مۇمكىن. ويتكەنى ەلدى مەكەندە سۋ قويماسى بار, وندا اققۋلار, جابايى ۇيرەكتەر مەن باسقا دا قۇستار مەكەندەيدى», دەيدى سقو ۆەتەريناريا باسقارماسى ءبولىمىنىڭ باسشىسى قايىرلى قازانوۆ.
وسىعان بايلانىستى م.جۇماباەۆ اۋدانى لەبياجە اۋىلى كارانتينگە بۇگىننەن باستاپ جابىلدى.
