Ranking اگەنتتىگىنىڭ جازۋىنشا, جەكە تۇلعالار زايمدارىنىڭ ورتاشا كولەمى ءبىر جۇمىسشىعا 2,28 مىڭ دوللاردان كەلەدى. بۇل رەتتە نەسيەنىڭ بارلىق ءتۇرى (يپوتەكا دا) ەسەپتەلگەن. تىكەلەي تۇتىنۋشىلىق نەسيەلەر كولەمى جۇمىس ىستەيتىن ءبىر قازاقستاندىققا 1,32 مىڭ دوللاردان تيەسىلى. بۇل كورسەتكىش بويىنشا قازاقستان وزگە ەلدەردەن ارتتا قالعان. Trading Economics ساراپشىلارىنىڭ دەرەگىنشە, الەمنىڭ 45 ءىرى ەكونوميكاسى اراسىندا قازاقستان جۇمىسپەن قامتىلعان ءبىر ازاماتقا قارىزدىق قارجىلاندىرۋ كولەمى بويىنشا 41-ورىندا.
Trading Economics رەيتينگىندەگى ەلدەردىڭ باسىم كوپشىلىگىنىڭ تەك تۇتىنۋشىلىق نەسيەلەرى عانا ەسكەرىلگەن. بىراق قازاقستان مەن رەسەي, تاعى دا ازداعان ەلدەر بويىنشا بارلىق زايم كولەمى, ونىڭ ىشىندە يپوتەكا جانە بولشەك نەسيە قاراستىرىلعان. سونىڭ وزىندە قازاقستان نەسيە نارىعى اسا قۋاتتى سانالاتىن شۆەيتساريا (202,3 مىڭ دوللار), اۋستراليا (170,3 مىڭ دوللار), نورۆەگيا (160,2 مىڭ دوللار), فرانتسيا (65,9 مىڭ دوللار) ەلدەرىندەگى ادام باسىنا شاققانداعى نەسيەلەۋ دەڭگەيىنە جەتە المايدى. قىتاي (10,1 مىڭ دوللار), رەسەي (4,1 مىڭ دوللار) جانە ارمەنياداعى (2,3 مىڭ دوللار) دەڭگەيگە جەتۋ دە ءبىرشاما قيىن سەكىلدى.
«جان باسىنا شاققانداعى نەسيە كولەمى جوعارى بولۋ ءۇشىن ول ادامنىڭ قارىزدى تولەي الاتىن قابىلەتى جوعارى بولۋى ءتيىس. بۇل ءبىرىنشى كەزەكتە نەسيەنىڭ ورتاشا جالاقىعا قاتىناسىنا بايلانىستى. وسى كورسەتكىش بويىنشا دا قازاقستان كوپ ەلدەن تومەن تۇر. جەكە تۇلعالاردىڭ بارلىق نەسيەلەرىن ەسەپكە العاننىڭ وزىندە قازاقستان 29-ورىندا. بۇل جاعدايدا ءبىر جۇمىسپەن قامتىلعان ازاماتقا شاققانداعى بولشەك نەسيەلەردىڭ ورتاشا كولەمى 4 ورتاشا جالاقىمەن جابىلادى. ەگەر تەك تۇتىنۋشىلىق نەسيەلەردى الار بولساق, وندا ءبىر جۇمىسپەن قامتىلۋشىعا تيەسىلى ورتاشا چەك نەبارى 2,3 ورتاشا جالاقىنى قۇرايدى.
