24 قىركۇيەك، 2021

الماتىدا ءشومىشباي ساريەۆكە مەموريالدى تاقتا ورناتىلدى

39 رەت كورسەتىلدى

الماتىدا اقىن ءشومىشباي ساريەۆ تۇرعان ۇيگە مەموريالدى تاقتا ورناتىلدى، دەپ حابارلايدى Egemen.kz.

مەموريالدى تاقتا ءشومىشباي ساريەۆ تۇرعان «سامال-2» شاعىناۋدانىنداعى № 43 ءۇيدىڭ قابىرعاسىنا ورناتىلدى. شاراعا الماتى قالاسى اكىمىنىڭ ورىنباسارى ەرجان باباقۇماروۆ، زيالى قاۋىم وكىلدەرى مەن اقىنىڭ تۋعان-تۋىستارى قاتىستى.

«بۇگىن ەرەكشە تاريحي كۇن. قازاقتىڭ ءبىرتۋار اقىنى ءشومىشباي ساريەۆتىڭ تۇرعان ۇيىندە ەسكەرتكىش تاقتا اشىلدى. اقىننىڭ سوزىنە جازىلعان اندەر ءار قازاقتىڭ جۇرەگىندە ماڭگى ساقتالادى.

مەنىڭ رەپەرتۋارىمدا ءشومىشباي اعانىڭ سوزىنە جازىلعان ءبىراز ءان بار، «اتامەكەن» ءانىن ەرەكشە اتاپ وتكىم كەلەدى. بۇل ءان كەڭ بايتاق قازاق دالاسىنا كەڭىنەن تانىلعان. مەن وتە باقىتتىمىن. دۇنيەجۇزىنىڭ ساحناسىندا «اتامەكەن» ءانىن ورىنداعاندا كورەرمەندەر كوزدەرىنە جاس الادى. اسىرەسە، شەت ەلدەگى قازاقتاردىڭ جۇرەگىن ەلجىرەتتى. ءتىپتى، وسى ءاننىڭ ارقاسىندا اتامەكەنىنە ورالعان قانداستارىمىزدا بار. ءشومىشباي اعانىڭ كەرەمەت ولەڭدەرى بار كەزدە، ول كىسىنىڭ ەسىمى ەشقاشان وشپەيدى»، دەدى قازاقستاننىڭ حالىق ءارتىسى روزا رىمباەۆا.

ايتا كەتەيىك، اقىن بيىل 15 اقپان كۇنى 75 جاسقا قاراعان شاعىندا دۇنيەدەن وزدى. ءشومىشباي ساريەۆ 1946 جىلى 15 ساۋىردە قىزىلوردا وبلىسى، ارال اۋدانى، ءشومىش ستانساسىندا دۇنيەگە كەلگەن. ەڭبەك جولىن قازالى اۋداندىق «لەنين تۋى»، ارال اۋداندىق «تولقىن» گازەتتەرىنەن باستاعان.

كەيىننەن «قازاقستان» باسپاسىنىڭ رەداكتورى، «جۇلدىز» جۋرنالى ءبولىمىنىڭ مەڭگەرۋشىسى، قازاقستان رەسپۋبليكاسى ۇلتتىق عىلىم اكادەمياسى مۇحتار اۋەزوۆ اتىنداعى ادەبيەت جانە ونەر ينستيتۋتىنىڭ عىلىمي، اعا عىلىمي قىزمەتكەرى بولعان.

1971 جىلى قازمۋ-ءدىڭ جۋرناليستيكا فاكۋلتەتىن بىتىرگەن. 1996 جىلى «قازىرگى قازاق ليريكاسىنىڭ ىزدەنىستەرى» اتتى تاقىرىپتا عىلىم كانديداتى دارەجەسىن يەلەندى.

«XX عاسىردىڭ جيىرماسىنشى جىلدارداعى پوەزياسى» اتتى مونوگرافيا جازعان. ءومىرىنىڭ سوڭعى جىلدارىندا م.و.اۋەزوۆ اتىنداعى ادەبيەت جانە ونەر ينستيتۋتىندا عىلىمي قىزمەتكەر بولدى.

«عاشىقتار جىرى»، «بوزجورعا» اتتى اۆتورلىق بەينەتاسپاسى جارىق كوردى. گ.گۋليا، و.بەرگگولتس، ي.اباشيدزە، س.ۆيكۋلوۆ، ا.دەمەنتەۆ، ف.اليەۆا، ر.روجدەستۆەنسكي، م.ەمينەسكۋ، ت.ب. اقىنداردىڭ ولەڭدەرىن قازاق تىلىنە اۋدارعان.

العاشقى جىر جيناعى 1974 جىلى «بالداۋرەن» دەگەن اتپەن جارىق كورگەن. سودان بەرگى ارالىقتا قازاق، ورىس تىلدەرىندە ون بەس شاقتى كىتابى شىقتى.

قازاقستاننىڭ ەڭبەك سىڭىرگەن قايراتكەرى، ءبىرىنشى دارەجەلى «بارىس» جانە «پاراسات» وردەندەرىنىڭ يگەرى، «فرانتس كافكا اتىنداعى حالىقارالىق التىن مەدال» سىيلىعىنىڭ لاۋرەاتى، «پلاتينا تارلان» سىيلىعىنىڭ لاۋرەاتى.

 

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار