ەل جانە ەلباسى • 23 قىركۇيەك، 2021

قاسىم-جومارت توقاەۆ «وتپانتاۋ-2021» اسكەري وقۋ-جاتتىعۋ جيىنىنا قاتىستى

395 رەت كورسەتىلدى

پرەزيدەنت - جوعارعى باس قولباسشى ماڭعىستاۋ وبلىسىنداعى «ويماشا» پوليگونىندا «وتپانتاۋ-2021» اسكەري وقۋ-جاتتىعۋىن تاماشالادى، دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.

جوعارعى باس قولباسشى باس شتابتىڭ الدىڭعى قاتارلى باسقارۋ پۋنكتىن ارالاي وتىرىپ، قورعانىس ءمينيسترىنىڭ، اۋە قورعانىسى كۇشتەرى، قۇرلىق اسكەرلەرى، اسكەري-تەڭىز كۇشتەرى جانە دەسانتتىق-شابۋىلداۋ اسكەرلەرى قولباسشىلارىنىڭ، سونداي-اق قاراعاندى وبلىسى اكىمىنىڭ باياندامالارىن تىڭدادى.

قاسىم-جومارت توقاەۆ ارنايى ماقساتتاعى بولىمشەلەردىڭ دايىندىعىن تەكسەرىپ، قارۋ-جاراق پەن تەحنيكانىڭ زاماناۋي ۇلگىلەرىن كوردى، سونداي-اق اقتاۋ اسكەري گوسپيتالى مەن ماڭعىستاۋ وبلىسىنداعى اۆياتسيالىق ينفراقۇرىلىم قۇرىلىسىنىڭ تۇساۋكەسەرىمەن تانىستى.

1

وقۋ-جاتتىعۋ ستسەناريى قازىرگى قارۋلى قاقتىعىستاردىڭ تاجىريبەسىنە سۇيەنە وتىرىپ، ءارتۇرلى اسكەري توپتاردىڭ شارتتى قارسىلاسقا قارسى سوعىسۋىنىڭ جاڭا فورمالارى مەن ادىستەرىن قولدانۋدى قامتىدى. اسكەرلەر توبىنىڭ بۇكىل ءىس-قيمىلدارى كەزىندە اۋە جانە جەر ءۇستى بارلاۋ جۇرگىزىلدى. ونىڭ ناتيجەلەرى باسقارۋ پۋنكتىنە جىبەرىلدى، سول جەردەن ۇشقىشسىز ۇشۋ اپپاراتتارى مەن ارالاس اۆياتسيالىق توپتىڭ جوعارى دالدىكتى سوققىلارىن بەرۋ ءۇشىن ماقسات قويىلدى. وقۋ-جاتتىعۋ بارىسىندا اسكەرلەردىڭ جوعارى ۇتقىرلىعىن قامتاماسىز ەتۋگە ەرەكشە كوڭىل ءبولىندى.

2

پرەزيدەنتكە ونلاين-رەجيمدە ەلىمىزدىڭ ءتۇرلى وڭىرلەرىندە وتكىزىلگەن قارۋلى كۇشتەردىڭ، ۆەدومستۆوارالىق توپتاردىڭ، سونداي-اق جەرگىلىكتى اتقارۋشى ورگانداردىڭ جانە ورتالىق مەملەكەتتىك ورگانداردىڭ اۋماقتىق بولىمشەلەرىنىڭ ءىس-ارەكەتتەرى ۇسىنىلدى. اتاپ ايتقاندا، كاسپي تەڭىزىنىڭ اكۆاتورياسىندا اسكەري-تەڭىز كۇشتەرى اۆياتسيا مەن ارنايى وپەراتسيالار كۇشتەرىنىڭ قولداۋىمەن ەلدىڭ ەكونوميكالىق قىزمەت وبەكتىلەرىن قورعاۋ بويىنشا ءىس-قيمىلدار جۇرگىزدى. ءتيىستى اسكەري وقۋ-جاتتىعۋلار قاراعاندى وبلىسىنداعى «سارىشاعان»، «سپاسسك» جانە الماتى وبلىسىنداعى «كوكتال» پوليگوندارىندا ءوتتى.

3

ءىس-شارا بارىسىندا جوعارعى باس قولباسشى اسكەري قىزمەتشىلەرگە «ويماشا» پوليگونىندا جاتتىعۋلار وتكىزۋدىڭ ماڭىزدىلىعىن اتاپ ءوتتى.

«بۇل تاريحي ورىن – ءبىزدىڭ مەملەكەتتىلىگىمىزدىڭ، باتىرلىعىمىزدىڭ، حالقىمىزدىڭ بىرلىگى مەن تۇتاستىعىنىڭ سيمۆولى. شەكارالارعا قاۋىپ تونگەن جاعدايدا اتا-بابالارىمىز وسى تاۋدىڭ باسىندا سيگنالدىق وت جاعىپ، شەشۋشى ساتتە ءبىر تۋدىڭ استىنا جينالدى. سوندىقتان ونى حالىق «بىرلىك وتى» دەپ اتاعان. ءبىزدىڭ جاۋىنگەرلەرىمىز وتپانتاۋ ەتەگىنەن تۋعان جەرىن قورعاۋعا اتتاندى. مۇندا ۇلت تاعدىرى شەشىلگەن ماڭىزدى جينالىستار ءوتتى. بۇل ءداستۇر بۇگىنگى كۇنگە دەيىن ساقتالدى. ءبىز باتىرلارىمىز تۋرالى ەستەلىكتى قاستەرلەيمىز جانە داستۇرلەر ساباقتاستىعىن ساقتايمىز. ەڭ باستىسى، ءبىز اتا-بابالارىمىز مۇرا ەتكەن وتانىمىزدى قورعايتىن بولامىز»، دەدى قاسىم-جومارت توقاەۆ.

4

پرەزيدەنت اسكەري وقۋ-جاتتىعۋلاردا جاقسى ناتيجەلەر كورسەتىپ وتىرعان ەلىمىزدىڭ قارۋلى كۇشتەرى دايىندىعىنىڭ جوعارى دەڭگەيىن اتاپ ءوتتى. 

«اسكەردە قازىرگى زامانعى سىن-تەگەۋرىندەر مەن قاۋىپ-قاتەرلەرگە ازىرلىكتى قامتاماسىز ەتەتىن جاڭعىرتۋدىڭ تۇراقتى پروتسەسى ءجۇرىپ جاتىر. ارنايى وپەراتسيالار كۇشتەرى، بارلاۋ بولىمدەرى مەن ارنايى ماقساتتاعى بولىمشەلەر بەلسەندى دامۋدا. ديۆەرسياعا قارسى ارەكەتتەر پىسىقتالۋدا. جوعارى دالدىكتەگى قارۋ مەن پيلوتسىز قۇرالداردى قولدانۋ كەڭەيۋدە»، دەدى پرەزيدەنت.

5

جوعارعى باس قولباسشى وقۋ-جاتتىعۋ ەلىمىزدىڭ ءارتۇرلى وڭىرلەرىندەگى جەتى وقۋ پوليگونىندا جانە كاسپي تەڭىزى اكۆاتورياسىندا وتكىزىلگەنىن، ال ولاردىڭ شىعىستان باتىسقا دەيىنگى اۋقىمى ءۇش مىڭ كيلومەتردى قۇراعانىن اتاپ ءوتتى.

«جەكە قۇرام مەن تەحنيكانى ءوز بەتىمەن، تەمىرجول جانە اۋە كولىگىمەن تاسىمالداۋ پىسىقتالدى. بۇل قارۋلى كۇشتەردىڭ ستراتەگيالىق ۇتقىرلىعىن، قاۋىپ توندىرەتىن نەگىزگى باعىتتاردا اسكەري توپتاردى جىلدام قۇرۋ مۇمكىندىگىن كورسەتتى. جەدەل جوسپاردا شتابتاردىڭ ۇيلەسىمدى جۇمىسىن، جوعارى تەحنولوگيالىق قارۋ-جاراق پەن جاۋىنگەرلىك ءىس-قيمىلداردى جوسپارلاۋ ادىستەمەلەرىن قولدانۋدى كوردىك. اكىمدىكتەر دە دايىندىق دەڭگەيىنىڭ وسكەنىن كورسەتتى. ولاردىڭ قازىرگى «سترەسس-تەستتەردەگى» ءرولى اسكەري قۇرامنان كەم ەمەس»، دەدى ول.

6

جوعارعى باس قولباسشى اسكەري قىزمەتشىلەردى كەشەندى الەۋمەتتىك قورعاۋ ماسەلەلەرىنە دە توقتالدى.

«اقشالاي ۇلەس بىرتىندەپ ارتىپ كەلەدى. بيىلدان باستاپ لاۋازىمدىق جالاقى 35%-عا ءوستى. الداعى ەكى جىلدا ولار ورتا ەسەپپەن 60%-عا وسەدى. اسكەري قىزمەتشىلەردىڭ بارلىق ساناتتارى ءۇشىن تۇرعىن ءۇي ماسەلەسى زاڭنامالىق دەڭگەيدە شەشىلدى. تمد-نىڭ باسقا ەلدەرى جاعدايىندا قازاقستاندىق اسكەري قىزمەتشىلەردىڭ الەۋمەتتىك پاكەتى باسەكەگە قابىلەتتى بولىپ تابىلادى. اسكەري قىزمەتشىلەردى الەۋمەتتىك قورعاۋ ارقاشان مەملەكەتتىڭ باستى باسىمدىقتارىنىڭ قاتارىندا بولادى. مىقتى ارميا - قۋاتتى ەگەمەن قازاقستان»، دەپ ەسەپتەيدى پرەزيدەنت.

7

قاسىم-جومارت توقاەۆ بارلىق اسكەري قىزمەتشىلەرگە ءمىنسىز قىزمەتى ءۇشىن شىن جۇرەكتەن العىس ايتىپ، ولاردىڭ مەملەكەتىمىزدىڭ قاۋىپسىزدىگىن سەنىمدى قورعايتىنىنا سەنىم ءبىلدىردى.

8

9

11

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار