«دەپارتامەنت 59 قىلمىستى تىركەدى. سونىڭ 52-ءسى – سىبايلاس جەمقورلىق. مەملەكەتتىك ورگانداردا جۇمىس ىستەيىن سەگىز باسشىنىڭ جەمقورلىق ارەكەتى اشكەرەلەندى. ەكەۋى وبلىستىق دەڭگەيدە قىزمەت ەتسە, التاۋى قالالىق جانە اۋداندىق دەڭگەيدە جۇمىس ىستەگەن. مەملەكەتكە كەلگەن شىعىننىڭ جالپى كولەمى 47,7 ميلليون تەڭگەنى قۇراپ وتىر. سونىڭ 91,1 پايىزى, ياعني 43,5 ميلليون تەڭگەسى قايتارىلدى», دەدى جارقىن عالىموۆ ارنايى بريفينگتە.
ونىڭ ايتۋىنشا, جەمقورلىق فاكتىلەرى تۋرالى حابارلاعانى ءۇشىن اقشالاي سىياقى بەرۋ جۇيەسى دە ءوز ناتيجەسىن كورسەتتى. ال وتكەن جىلى جاڭا ديففەرەنتسيالدى جۇيە, ياعني انىقتالعان پارانىڭ كولەمىنە قاراي سىياقى بەرىلە باستاعاننان كەيىن جەمقورلىق تۋرالى حابارلايتىن ادامداردىڭ سانى كوبەيە ءتۇستى.
«قازاقستاندا جاڭا ديففەرەنتسيالدى جۇيە ەنگىزىلىپ وتىر. بۇرىن ىنتالاندىرۋ قىلمىستىڭ ساناتىنا قاراي جاسالاتىن. قازىر جەمقورلىق تۋرالى حابار بەرگەن ادام پارانىڭ كولەمىنە قاراي 10 پايىزدىق سىياقىعا يە بولا الادى. وسىلايشا, 4 000 ايلىق ەسەپتىك كورسەتكىش, ياعني 11,6 ميلليونعا دەيىن الۋعا مۇمكىندىك بار», دەپ اتاپ كورسەتتى عالىموۆ.
جىل باسىنان بەرى سولتۇستىك قازاقستاندا ءتورت ادامعا جالپى سوماسى 816 760 تەڭگەنىڭ سىياقىسى بەرىلدى. اربىرەۋى 204 190 تەڭگەدەن الدى. ۇشەۋى پارا تۋرالى حابار بەرسە, بىرەۋ قىزمەت بابىن پايدالانۋ ارقىلى الاياقتىق جاساۋ جايىندا الدىن الا حابار بەرگەن.
زاڭ بويىنشا پارا نەمەسە مەملەكەتكە كەلگەن زالالدىڭ كولەمى 1 000 اەك (2 ميلليون 917 مىڭ تەڭگە) بولسا, ول اقشانىڭ 10 پايىزى حابار بەرگەن ادامعا سىياقى رەتىندە بەرىلەدى. بىراق اقشالاي سىياقىنىڭ مولشەرى 4 000 اەك-تەن (11 ميلليون 668 مىڭ تەڭگە) اسپاۋى شارت.
