دۋجنوۆتىڭ ادۆوكاتى كۇدىكتىنىڭ قاۋىپسىزدىگىن قامتاماسىز ەتۋ ءۇشىن تىڭداۋدى جابىق رەجيمدە وتكىزۋدى سۇرادى. الايدا, سوت باق وكىلدەرىن شىعارۋ تۋرالى ءوتىنىشتى قاناعاتتاندىرمادى جانە تىڭداۋدى ونلاين رەجيمىندە اشىق جالعاستىرۋ تۋرالى شەشىم قابىلدادى. Informburo-نىڭ جازۋىنشا, ادۆوكات سۋدياعا نارازىلىق بىلدىرگەن.
«قۇرمەتتى سوت, ەگەر بىردەڭە بولىپ قالسا, جاۋاپكەرشىلىك ءسىزدىڭ موينىڭىزدا. ءسىزدىڭ سوت وتىرىسىن اشىق رەجيمدە وتكىزۋ تۋرالى شەشىمىڭىزگە بايلانىستى, مەن نارازىلىق بىلدىرەمىن», دەدى ادۆوكات.
سۋديا ادۆوكاتتان شاعىمدى جازباشا تۇردە بەرۋدى سۇرادى.
وتىرىستا سوت دۋجنوۆقا قاتىستى ەكى اي مەرزىمگە قاماۋ تۇرىندەگى بۇلتارتپاۋ شاراسىن تاڭدادى.
ايتا كەتەيىك, 20 قىركۇيەكتە الماتى قالاسىنىڭ اقبۇلاق ىقشام اۋدانىندا اتىس بولىپ, بەس ادام قازا تاپقان بولاتىن.
