سپورت • 22 قىركۇيەك، 2021

«ادامدى باعالاڭدار تىرىسىندە!»

281 رەت كورسەتىلدى

قازاق سپورتى ابدەن ىشىنەن ءب ۇلىنىپ، توقىراۋعا ۇشىراعان كورىنەدى. جىلدار بويى قوردالانعان سىزداۋىق-پروبلەمانىڭ جارىلاتىن ءساتى بيىلعى وليمپيادا جىلىمەن تۇسپا-تۇس كەلدى. توكيودا ەلدىڭ گيمنى شىرقالعان جوق. كۇمىس مەدال دا قورجىنعا تۇسپەدى. سويتسە، سپورتتىڭ اينالاسىندا ۇلت مۇددەسىنەن گورى جەكە باستىڭ قامىن كوبىرەك ويلايتىندار قاپتاپ ءجۇر ەكەن...

سپورت سالاسىنا جاۋاپتى مادەنيەت جانە سپورت ۆيتسە-ءمينيسترى الاياقتىق ءۇشىن سوتتالىپ، امبيتسياسى اسقاق جوبا رەتىندە باستالعان «استانا» پرەزيدەنتتىك سپورت كلۋبى ماقساتسىز جۇمسالعان قىرۋار قارجىنىڭ كەسىرىنەن اقىرى جابىلىپ تىندى. قازىرگى سپورت فۋنكتسيونەرلەرىنە حالىقارالىق دودالاردا ۇلت ۇپايىن تۇگەندەگەننەن گورى جەكە قالتاسىنا تۇسەتىن قارجىنى ساناعان الدەقايدا پايدالى سياقتى. ايتپەسە، قازىنادان قوماقتى قارجى ءبولىنىپ وتىرعان ەل سپورتى وسىنشاما دەڭگەيگە شەيىن قۇلدىراماس ەدى...

ەلدىڭ سپورت سالاسىنداعى جەتىستىكتەرى تۋرالى ءسوز بولا قالسا، كاركەن احمەتوۆ، وكتيابر جارىلعاپوۆ، قابدەن بايدوسوۆ، قازىبەك بايبولوۆ، ەدۋارد ايريح، بەكەت ماحمۇتوۆ، ۆاديم پسارەۆ، كەرەي قويشىبەك، سايان شايمەردەنوۆ، مۇستافا وزتۇرىك، بەكسەيىت تۇلكيەۆ سياقتى تالاي تالانتتىڭ توماعاسىن سىپىرعان تۇلعالار ەسكە تۇسەدى. سپورت ارقىلى ەلدىڭ رۋحىن اسقاقتاتۋعا ولشەۋسىز ۇلەس قوسقانداردىڭ قاتارىندا نۇرلان بالعىمباەۆتىڭ ەسىمى ايرىقشا اتالادى. قازاق ەلى ءۇشىن ولجالى بولعان سيدنەي وليمپياداسىنىڭ الدىندا استانادا الەمدىك بوكستىڭ مارقاسقالارى باس قوسقان-دى. بوكس ماسەلەلەرىن تالقىلاۋعا قاتىستى كەزەكتى جيىن ەدى. سول القالى وتىرىستا قازاقستان بوكس فەدەراتسياسىنىڭ پرەزيدەنتى رەتىندە نۇرلان بالعىمباەۆ: «سىزدەردەن قازاق بوكسشىلارىنىڭ ويىنىن اسىرا باعالاڭىزدار دەپ سۇرامايمىز، ەڭ باستىسى، ءبىزدىڭ جىگىتتەردىڭ بوكسىن ادىلەتتى باعالاساڭدار بولدى»، دەگەن. جاھاندىق بوكستىڭ جىلىگىن شاعىپ، مايىن ىشكەندەر ىرى­لىك تانىتقان بالعىمباەۆتىڭ ءسوزىن زەردەگە مىق­تاپ تۇيسە كەرەك، الاش وعلاندارىنىڭ باعىن باي­لاعان جوق وليمپيادادا. سيدنەي رينگىندە قا­زاقستاندىق بوكسشىلار 2 التىن مەن 2 كۇمىس مەدال يەلەندى. ال سەرىك قوناقباەۆ حالىقارالىق بوكس قاۋىمداستىعىنىڭ (AIBA) ۆيتسە-پرەزيدەنتى مەن ازيا كونفەدەراتسياسىنىڭ پرەزيدەنتى بولعان تۇستا قازاق بوكسىنىڭ باعىندىراتىن بيىگى الاسارىپ كەتكەن سياقتى... گاپ قىزمەتتە ەمەس، ەلدىك مۇددەدە، ازاماتتىق ۇس­تانىمدا ەكەنىن وسىدان كەيىن ايقىن تۇ­سى­نە­سىڭ...

جەمقورلىق جايلاعان جەردە ادامگەرشىلىك، ىزگىلىك تۋرالى اڭگىمە ايتۋعا بولا ما؟ نيەت تازا بولماعان جەردە كورسەتكىش جوعارى بولمايتىنى تاعى تۇسىنىكتى. كەيبىر جاتتىقتىرۋشىلاردىڭ حالىقارالىق جارىستارعا، وليمپياداعا ەلدىڭ ابىرويى ءۇشىن جانىن سالاتىنداردى ەمەس، ورتاڭقول سپورتشىلاردى قوساتىنى دا سول. جاس كەزىندە حالىقارالىق دودالاردا اتوي سالعان ورەندەردىڭ ەرەسەكتەر قۇراماسىنداعى احۋالدى اڭعارعان سوڭ، كاسىبي بوكسقا اۋىساتىن سەبەبى دە سوندىقتان. ايتپەسە،ولاردىڭ وليمپيادا تورىندە ەلدىڭ گيمنىن شىرقاعىسى كەلمەيدى دەيسىڭ بە؟!

ادامگەرشىلىك دەمەكشى، قولىمىزعا قالام العىزعان اۋىر اتلەت البەرت ليندەردىڭ ءولىمى-تۇعىن. سپورتشىنىڭ جىگىت جاسىندا ومىر­دەن باز كەشۋىنە نە سەبەپ؟ نەگە كۇيزە­لىس­ك­ە ۇشىرادى؟ قولى سىنعاننان كەيىن نەگە كەرەكسىز بولىپ قالدى؟ ازيا چەمپيونى، جازعى ۋنيۆەرسيادانىڭ جەڭىمپازى اتانعان سپورتشىنىڭ الار اسۋى، باعىندىرار بيىگى الدا ەمەس پە ەدى؟ سوندا قازاقستاننىڭ بايراعىن جەلبىرەتىپ، گيمنىن شىرقاتقان ساڭلاقتاردىڭ دا قۇنى كوك تيىن بولعانى ما؟ سۇراق كوپ.

24 جاسىندا وليمپيادا چەمپيونى اتانعان ءشامىل سەرىكوۆتىڭ 32 جاسىندا ومىردەن وتۋىنە كەڭەستىك جۇيەنىڭ كەسىرى ءتيدى دەپ، ءوزىمىزدى جۇباتقانبىز. ال ەندىگىمىزگە نە جورىق؟ كەڭەس وداعى كەزىندەگىدەي قازاق سپورتشىلارىنىڭ باعىن ماسكەۋ بايلاپ وتىرعان جوق، تاۋەلسىز ەلمىز. سپورتشىلاردىڭ جاتتىعۋىنا، جات­تىق­تىرۋشىلاردىڭ باپتاۋىنا دا جاعداي جا­سال­عان. قارجى دا جەتكىلىكتى ءبولىنىپ وتىر. حالىقارالىق جارىستاردان جۇلدەلى ورالعان سايىن سپورتشىعا دا، باپكەرىنە دە سىياقى بەرىلەدى. بىراق قارجى مول جەردە اشكوزدىك بەلەڭ الا تۇسەتىن سەكىلدى مە قالاي؟ جاراقات العان سپورتشىنى ساۋىقتىرىپ، ەمدەتۋدىڭ ورنىنا كەلەسى سپورتشىمەن اۋىس­تى­را سالۋ ءتيىمدى بولعانى عوي... وركەنيەتتى قوعامدا ەلدىڭ ابىرويىن اسقاقتاتىپ، الەمگە تانىتقان ساڭلاق تۇگىل، قاراپايىم ادامنىڭ تاعدىرىنا دا بەيجاي قاراۋعا بولمايتىنى تۇسىنىكتى ەمەس پە؟

ۇلتتىڭ تابيعي بولمىس-ءبىتىمىن جىرمەن ورنەكتەگەن قادىر مىرزا ءاليدىڭ تومەندەگىدەي جىر جولدارى بار: «قالدىرماي ەسكەرۋسىز ءبىر ءىسىن دە، تالانتتى باعالاڭدار تىرىسىندە! كەيدە ءبىز وندايلاردىڭ جاسى تۇگىل; كەلەمىز قادىرلەمەي ءىرىسىن دە!» اقىننىڭ ايتقانىن ءسال وزگەرتىپ ايتساق، «ادامدى تىرىسىندە باعالاعان»  ابزال. ليندەر تاعدىرى – ەل ەرتەڭىنىڭ تاعدىرى!..

 

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار