What‘sApp مەسسەندجەرىندە بالالارعا ارنالعان جۇقپالى اۋرۋلار بولىمشەلەرىندە توسەك-ورىن دايىن ەكەنى تۋرالى اۋديو-حابارلاما تاراپ جاتىر. اۆتوردىڭ ايتۋىنشا, مەكتەپتەردە «ۆاكتسينا شاشىلعاننان» كەيىن, بالالار جاتاتىن توسەك-ورىن قاجەت بولادى. بالالار جاپپاي اۋىرىپ, ولە باستايتىنى ايتىلادى.
بۇل اقپاراتتى سانيتارلىق-ەپيدەميولوگيالىق باقىلاۋ كوميتەتى جوققا شىعاردى.
«بالالارعا ارنالعان قوسىمشا ينفەكتسيالىق توسەك-ورىن دايىنداۋ تۋرالى اقپارات شىندىققا جاناسپايدى. بۇگىندە كەرىسىنشە, سىرقاتتانۋشىلىق تومەندەۋىنە بايلانىستى جۇقپالى اۋرۋلار ستاتسيونارلارى جابىلىپ جاتىر. سونداي-اق بولمەدە بۇركۋ ارقىلى قولدانىلاتىن ۆاكتسينا جوق», دەدى ۆەدومستۆونىڭ رەسمي وكىلى ەرجان بايتاناەۆ.
بۇعان دەيىن الەۋمەتتىك جەلىلەردە قازاقستاندىق وقۋشىلار مەن ستۋدەنتتەر 20 قىركۇيەكتەن كەيىن ونلاين ءبىلىم الۋعا كوشەتىنى تۋرالى جالعان اقپارات تاراعانى حابارلانعان بولاتىن.
