سەناتتىڭ الدىڭعى وتىرىسىندا ءبىرىنشى وقىلىمدا ماقۇلدانعان قۇجاتتا قازاقستان رەسپۋبليكاسىنىڭ 16 زاڭنامالىق اكتىسىنە وزگەرىستەر مەن تولىقتىرۋلار ەنگىزۋ كوزدەلگەن بولاتىن. اتاپ ايتقاندا, ەرلەر مەن ايەلدەردىڭ ەڭبەك سالاسىنداعى قۇقىقتارىنىڭ تەڭدىگى مەن مۇمكىندىكتەرىن قامتاماسىز ەتۋ ءۇشىن كودەكستە ايەلدەردىڭ ەڭبەگىن پايدالانۋدى شەكتەيتىن, سونداي-اق ايەلدەردى اۋىر جۇمىستارعا, ەڭبەك ەتۋ بارىسىندا زياندى جانە قاۋىپتى جۇمىستارعا جىبەرمەيتىن ەرەجەلەردى الىپ تاستاۋ ۇسىنىلادى.
سونىمەن قاتار بۇل وزگەرىستەر «تۇرعىن ءۇي قاتىناستارى تۋرالى», «مەملەكەتتىك اتاۋلى الەۋمەتتىك كومەك تۋرالى», «قازاقستان رەسپۋبليكاسىندا مۇگەدەكتiگi بويىنشا جانە اسىراۋشىسىنان ايىرىلۋ جاعدايى بويىنشا بەرiلەتiن مەملەكەتتiك الەۋمەتتiك جاردەماقىلار تۋرالى» زاڭدارعا دا قاتىستى بولادى.
«تۇرعىن ءۇي قاتىناستارى تۋرالى زاڭعا ەنگىزىلگەن تۇزەتۋ مۇگەدەكتىگى بار بالا تاربيەلەپ وتىرعان, ولار 18 جاسقا تولعانعا دەيىن تۇرعىن ءۇي الماعان وتباسىلارعا تۇرعىن ءۇي الۋ كەزەگىن ساقتاۋدى كوزدەيدى. سونداي-اق از قامتىلعان وتباسى بالالارىنا الەۋمەتتىك توپتاما كەپىلدىگى بەرىلەدى جانە پورتال ارقىلى ارناۋلى الەۋمەتتىك قىزمەت كورسەتۋ ۇسىنىلدى», دەدى سەناتور ناريمان تورەعاليەۆ.
زاڭ جوباسىن قابىلداۋ ارقىلى ازاماتتاردى نەگىزگى الەۋمەتتىك كەپىلدىكتەرمەن, ونىڭ ىشىندە قوسىمشا مۇقتاجدارى بار ادامداردى الەۋمەتتىك قولداۋ, اتاۋلى الەۋمەتتىك كومەك جانە زەينەتاقىمەن قامتاماسىز ەتۋدىڭ وزەكتى ماسەلەلەرىن شەشۋ كوزدەلىپ وتىر.
وتىرىس قورىتىندىسى بويىنشا زاڭ جوباسىن ەكىنشى وقىلىمدا قاراۋ ءۇشىن پالاتاعا جىبەرۋ تۋرالى شەشىم قابىلداندى.
