ونەر • 19 قىركۇيەك، 2021

تاۋەلسىزدىككە تارتۋ

91 رەت كورسەتىلدى

كەڭەس يدەولوگياسىنان بوساپ شىققان قازاق ونەرىنىڭ قىلقالامى ەگەمەندىككە قول جەتكىزگەلى ەركىن كوسىلدى. ۇلتتىق بەينەلەۋ ونەرىنىڭ ءورىسى كەڭىپ، بوياۋى تۇرلەندى. جاڭاشىلدىققا جانى قۇشتار قىلقالام شەبەرلەرى ازاتتىقتىڭ اسپانىن قالاعان تۇسىمەن بويادى. مىنە، سونداي دارىندى سۋرەتشىلەردىڭ ءبىرى – داريا كاليموۆا-قاستەەۆا.

جاقىندا كوركەمونەر­دەن قۋانىش تاپقان ونەر يەسىنىڭ «ۋاقىتتىڭ شىنايى ساباق­تاس­تىعى» اتتى كورمەسى وتكەن بولاتىن. ەلورداداعى سالتاناتتى ءىس-شارانىڭ ءبىز دە كۋاسى بولعان ەدىك.

اۋەلى بەتاشار ءسوز مەملەكەت جانە قوعام قايراتكەرى، تانىمال تۇركىتانۋشى، فيلولوگيا عىلىمىنىڭ دوكتورى، پروفەسسور مىرزاتاي جولداسبەكوۆكە بەرىلدى.

«بۇگىنگى اشىلىپ وتىرعان كورمەنىڭ مەن ءۇشىن ماڭىزى زور. سەبەبى داريانىڭ اتا-انا­سى مۇحيت كاليموۆ پەن ليزا كاليموۆانى بۇ­رىن­نان تانيمىن. مۇحيت – قا­زاقتىڭ بەينەلەۋ ونەرىنىڭ كورنەكتى وكىلى. وتباسىنداعى ءاربىر جان شى­­عارماشىلىق پەن ونەرگە تۇنىپ تۇرعان ازامات­تار»، دەگەن ول، وسىناۋ يگى ءىس-شا­راعا مۇرىندىق بول­عان  ۇيىم­­داستىرۋشىلارعا العىسىن ءبىلدىردى.

ءوز كەزەگىندە ۇلتتىق مۋزەي ديرەكتورىنىڭ ورىن­با­سارى نازگۇل كادريم­بە­توۆا سۋرەت­شىنىڭ شىعار­ماشى­لى­عىنا توقتالىپ ءوتتى.

 «گوبەلەن – ۇلكەن ەڭبەكتى، سابىرلىقتى قاجەت ەتەتىن، ويۋ-ورنەك كومپوزيتسياسى بار، ساندىك ونەردىڭ ءبىر ءتۇرى. داريا حانىم جاساعان بۇگىنگى تۋىندىلاردان ءبىز انا بەينەسىن، ايەل ادامنىڭ وبرازىن اي­رىقشا كورە الامىز. بۇل كور­مە مۋزەي قوناقتارىنىڭ جۇ­رەگىنەن ەرەكشە ورىن الادى دەپ سەنەمىن»، دەدى ن.كادريمبەتوۆا.

1

ودان كەيىن كەش يەسى ەل تاۋەلسىزدىگىنىڭ 30 جىلدىعىنا وراي ۇلتتىق مۋزەي ديرەكتو­رىنىڭ اتىنان ارنايى سەرتيفيكاتپەن ماراپاتتالدى.

ارنايى كورسەتىلگەن سىي-سياپاتتان سوڭ داريا كالي­موۆا-قاستەەۆانىڭ اناسى، بەل­گىلى سۋرەتشى-كەستەشى ليزا كا­ليموۆا ءوزىنىڭ جىلى لەبىزىن ءبىلدىردى.

كورمەگە داريا كاليموۆا-قاستەەۆانىڭ ءوز تۋىندىلارىمەن قوسا، اكەسى، اتاقتى قا­زاق­ستاندىق سۋرەتشى مۇحيت كالي­موۆتىڭ جۇمىستارى دا قويىلعان ەكەن.

ايتا كەتەيىك، مۇحيت كا­ليموۆ – پورترەتتىڭ ءسوزسىز شەبەرى. قازاقتىڭ اتاقتى تۇل­عالارىنىڭ پورترەتتەرىن بەي­نەلەيتىن تاريحي تاقىرىپتارعا ۇلكەن ءمان بەرە بىلگەن شەبەر.

وسىنداي ونەرلى وتباسىندا دۇنيەگە كەلگەن داريا كاليموۆا-قاستەەۆا ساندىك-قول­دانبالى ونەردى، ياعني گو­بەلەندى تاڭدادى. ونىڭ گوبەلەندەرى تەگىستىكپەن، سى­­زىقتاردىڭ بەل­گىلى ءبىر وتىم­دىلىگىمەن جانە اشىق، قا­نىق تۇستەرمەن ەرەك­شە­لەنەدى.

2

كوپتەگەن شىعارماسىنان قازاق ايەلىنىڭ بەينەسى كورىنەدى. ايەل تاعدىرىنىڭ فيلو­سو­فيالىق وبرازى «بەتاشار» جانە «انا» سياقتى كەرەمەت تۋىندىلارىندا اشىلادى. ال جاستىق پەن سىمبات بەينەلەرى «كوك­تەم» جانە «ارفالى قىز» شى­عارمالارىندا كەز­دەسەدى. باتيك پەن گوبەلەنگە ءتان دە­كوراتيۆتىلىك ءداستۇرلى كەس­كىن­دەمە مەن كلاسسيكالىق ۇلت­تىق مانەردە سالىنعان سۋرەتتەر دە كورىنەدى. ونىڭ شىعار­ما­لارى تەگىستىك گۇل كونتراسستارىمەن ۇيلەسىپ، گۇل، تاۋىس جانە الماتى اپور­­­تىن كورسەتەدى. تۋىن­دى­­لارى جاعىمدى تۇس­تەرمەن اي­شىقتالعان. ايەل ەنەرگياسىمەن ۇندەسەتىن مە­يىرىم مەن ماحاببات، ءۇمىت پەن سۇلۋلىق بىرىكتىرىلگەن.

اتالعان كورمەنى قالا تۇر­­عىندارى مەن قوناقتارى 10 قا­­­زانعا دەيىن ۇلتتىق مۋزەيگە كەلىپ، تاماشالاي الادى.

سوڭعى جاڭالىقتار

9 سۋ قويماسى سالىنادى

ەكولوگيا • كەشە

ۇقساس جاڭالىقتار