«30 جىل: تاۋەلسىزدىك – ەل تۇعىرى» ۆيرتۋالدى تەلەكوپىرى NIS-پەن كوپ جىلدار بويى بىرلەسىپ جۇمىس ىستەپ كەلە جاتقان سەرىكتەس مەكتەپ وقۋشىلارىنىڭ دا باسىن قوستى. جيىنعا قاتىسۋشىلاردى بىرىكتىرگەن باستى تاقىرىپ – تاۋەلسىز قازاقستاننىڭ جەتىستىكتەرى جانە وقۋشىلاردىڭ ەل بولاشاعى ءۇشىن جەكە جاۋاپكەرشىلىگى. ەلورداداعى فيزيكا-ماتەماتيكا باعىتىنداعى NIS-تە ساباق ەلباسىنىڭ تاۋەلسىز قازاقستاندى قۇرۋ مەن قالىپتاستىرۋداعى ميسسياسىنان باستالدى. جوعارى سىنىپ وقۋشىلارى الداعى وتىز جىلدا وزدەرىن قالاي كورەتىنى تۋرالى ۇجىمدىق بولجام جاسادى – ءوز ەلىنىڭ ناعىز پاتريوتتارى, باقىتتى جانە تابىستى ماماندار. الماتىداعى حيميا-بيولوگيا باعىتىنداعى زياتكەرلىك مەكتەپتىڭ وقۋشىلارى تاريح ءپانىنىڭ مۇعالىمى گۇلنۇر كۋليكەنوۆامەن بىرگە تسيفرلى رەسۋرستار نەگىزىندە رەسپۋبليكانىڭ ايتۋلى جەتىستىكتەرىن تالدادى. ساباققا قاتىسقان وڭتۇستىك مەگاپوليستىڭ جۇزدەگەن جوعارى سىنىپ وقۋشىلارى اراسىندا №148 جالپى ءبىلىم بەرەتىن مەكتەپتىڭ 11-سىنىپ وقۋشىسى دانا بەدەلبەكوۆا ساباقتىڭ ءبىر دەمدە وتكەنىن جانە رەسپۋبليكانىڭ جەتىستىكتەرىن سەزىنۋگە كومەكتەسكەنىن جەتكىزدى.
– ساباق بارىسىندا مەنى الەمدىك كوشباسشىلارعا, سونىڭ ىشىندە نۇرسۇلتان نازارباەۆقا ارنالعان بولىگى ەرەكشە قىزىقتىردى. بەدەلدى ساياساتكەرلەر, مىسالى مارگارەت تەتچەردىڭ تۇڭعىش پرەزيدەنتىمىزدىڭ قىزمەتىنە بەرگەن جوعارى باعاسى نۇرسۇلتان نازارباەۆتىڭ بەيبىتشىلىكتى ساقتاۋ ىسىنە جاھاندىق شەشىمدەر ۇسىنعان قازىرگى زامانعى ەڭ مىقتى جانە ىقپالدى ساياساتكەرلەردىڭ قاتارىنا كىرەتىنىن تاعى دا دالەلدەيدى, – دەيدى الماتىداعى №107 مەكتەپ-ليتسەيىنىڭ وقۋشىسى بەكزات دىلدابەكوۆ.
اقتوبەدەگى زياتكەرلىك مەكتەپ وقۋشىلارى سەمەي پوليگونىنىڭ جابىلۋى جانە ەۋرازيالىق ەكونوميكالىق وداقتىڭ قۇرىلۋى سەكىلدى اتاۋلى وقيعالارعا SWOT-تالداۋ جاسادى. وقىتۋشى بيبىگۇل جاكيەۆا «قازاقستان تاريحى» ءپانىنىڭ ميسسياسى – جاس ۇرپاققا پاتريوتتىق تاربيە بەرىپ, مەملەكەتتى دامىتۋ ءۇشىن جەكە جاۋاپكەرشىلىك قالىپتاستىراتىنىن اتاپ ءوتتى. اباي, بالقاش, جەزقازعان, ساران, ساتباەۆ جانە باسقا قالالار مەن اۋىلداردىڭ جۇزگە جۋىق جالپى ءبىلىم بەرەتىن مەكتەپتەرى قاراعاندىداعى NIS-ءتىڭ تاۋەلسىزدىك ساباعىنا قاتىستى.
– وتىز جىل ىشىندە ەلىمىزدە ۇلكەن وزگەرىس بولدى. ءبىلىم مەن عىلىم سالاسىنداعى تابىستى جوبالار – نازارباەۆ زياتكەرلىك مەكتەپتەرى, نازارباەۆ ۋنيۆەرسيتەت, «بولاشاق» باعدارلاماسىن اتاپ ءوتۋ كەرەك. قازىر «بولاشاق» باعدارلاماسى بويىنشا پەنسيلۆانيا ۋنيۆەرسيتەتىندە حيميا ماگيسترى دارەجەسىن مەڭگەرىپ جاتىرمىن. بۇل مۇمكىندىك تە ەل تاۋەلسىزدىگىنىڭ ارقاسى, – دەدى «بولاشاق» باعدارلاماسى بويىنشا اقش-تا ءبىلىم الىپ جاتقان حيميا ءپانىنىڭ مۇعالىمى ينابات حاميتوۆا.
تالدىقورعاندا اشىق ساباقتىڭ باستى تاقىرىبى – ەۋرازيالىق ەكونوميكالىق وداقتىڭ قۇرىلۋى بولدى, وقۋشىلار ەۋرازەو-نىڭ ساياسي, ەكونوميكالىق, تەحنولوگيالىق ماڭىزىن جانە الەۋمەتتىك باسىمدىقتارىن تالدادى.
– ءبىز ۇلتتىق ەكونوميكامىزدىڭ جاھاندىق الەمدەگى باسەكەگە قابىلەتتىلىگىن ارتتىرۋ بويىنشا ءوز يدەيالارىمىزدى ۇسىندىق, – دەيدى 12-سىنىپ وقۋشىسى ءامىر قۋات ۇلى.
ورالدا تاۋەلسىزدىك مانماتىنىندەگى الەمدىك ءدىن كوشباسشىلارىنىڭ سەزدەرى, سونداي-اق جاھاندىق كونفەسسياارالىق جانە مۋلتيمادەني ديالوگتىڭ قالىپتاسۋى باستى تاقىرىپقا اينالدى. وقۋشىلاردىڭ وزدەرى راديكاليزمنىڭ بارلىق كورىنىستەرىنە تۇراقتى يممۋنيتەتتى قالىپتاستىراتىن ءبىلىمنىڭ ءرولىن ەرەكشە اتاپ ءوتتى.
سارىاعاش اۋدانى تولەبي ورتا مەكتەبىنىڭ وقۋشىسى ارايلىم وماروۆا ەلباسىنىڭ ازاماتتىق بەيبىتشىلىك پەن ۇلتارالىق كەلىسىمگە باعىتتالعان باستامالارىنىڭ دا ماڭىزى زور ەكەنىن ايتتى. شىمكەنتتەگى فيزيكا-ماتەماتيكا باعىتىنداعى مەكتەپكە وڭتۇستىك قازاقستان وبلىسىنىڭ 60-تان استام جەتەكشى مەكتەبى قوسىلدى.
اقتاۋدا تاۋەلسىزدىك قۇرداستارى – حيميا ءپانىنىڭ مۇعالىمى ۆەنەرا سۋروۆتسەۆا جانە گەوگرافيا ءپانىنىڭ مۇعالىمى ميراس قۇربانعاليەۆ جاستارعا قولداۋ كورسەتۋ جانە جاستار ءۇشىن اتاۋلى باعدارلامالار جاساۋ سياقتى مەملەكەتتىك باسىمدىققا وقۋشىلاردىڭ نازارىن اۋداردى. سەمەيدەگى NIS-تە تاۋەلسىزدىك ساباعى سەمەي يادرولىق پوليگونىنىڭ جابىلۋىنا ارنالدى.
– بيىل نۇرسۇلتان نازارباەۆتىڭ الەمدى وزگەرتكەن تاريحي جارلىعىنا قول قويىلعالى وتىز جىل تولدى. تاۋەلسىز قازاقستاننىڭ باستى جەتىستىكتەرىنىڭ ءبىرى – پوليگوندى جابۋ. سوندىقتان بۇل وقيعانىڭ ساباعىمىزدىڭ تاقىرىبىنا اينالعانى زاڭدى, – دەپ اتاپ ءوتتى ديرەكتوردىڭ ورىنباسارى لاريسا ابىلقاسىموۆا.
الماتى قالاسىنداعى فيزيكا-ماتەماتيكا باعىتىنداعى مەكتەپتە وقۋشىلار قازاقستان رەسپۋبليكاسىنىڭ بىتىمگەرشىلىك قىزمەت تۋرالى زاڭىن زەردەلەۋ ءۇشىن «ينتەللەكت كارتاسىن» جاسادى. قىزىلوردا وبلىسى ج.ماحانبەتوۆ اۋىلىنىڭ №143 ورتا مەكتەپ مۇعالىمى ينديرا مۇحانوۆا NIS-تەگى ءدال وسىنداي ساباقتاردىڭ پاتريوت بولۋعا ۇيرەتەتىنىنە سەنىمدى. «اۋىل مەكتەبى» جوباسىنىڭ وكىلدەرى – كاتونقاراعاي جانە ۇلان اۋداندارىنداعى ورتا مەكتەپ وقۋشىلارى مەن مۇعالىمدەرى تاۋەلسىزدىك ساباقتارى كۇنى وسكەمەندەگى NIS پارتاسىنا «جايعاستى».
ساباقتىڭ باستى قاتىسۋشىلارى اراسىندا نازارباەۆ زياتكەرلىك مەكتەپتەرىندە قىزمەت ەتەتىن تاۋەلسىزدىك قۇرداستارى بار. وسكەمەندىك نازەركە جۇماعازينوۆا مەن تالدىقورعاندىق قايسار نۇربەك, استانالىق NIS وكىلى انەل ءالىباي مەن ءمولدىر احمەتبەكوۆا ەل ەگەمەندىگى تاۋەلسىزدىك ۇرپاقتارىنا ومىرلىك جانە كاسىبي تابىسقا شەكسىز مۇمكىندىك اشقانىن ايرىقشا اتاپ ءوتتى. پاۆلودارداعى NIS-ءتىڭ تاۋەلسىزدىك ساباعى پەداگوگيكالىق شەبەرلىك ورتالىعىنىڭ قولداۋىمەن وبلىستىق «ERTIS» تەلەارناسىنىڭ تىكەلەي ەفيرىندە كورسەتىلدى. پاۆلودار قالاسىنىڭ اكىمى اساين بايحانوۆ NIS وقۋشىلارىنىڭ ەرەكشە جاۋاپكەرشىلىگىن اتاپ ءوتتى:
– نازارباەۆ زياتكەرلىك مەكتەبىندە وقۋ – ۇلكەن مارتەبە. تاجىريبەلى مۇعالىمدەردەن ءبىلىم الىپ, زاماناۋي تەحنيكالىق بازانى يگەرە وتىرىپ, ەلىمىزدىڭ بولاشاعى ءۇشىن جۇمىس ىستەيتىن مىقتى بۋىن بولاتىندارىڭىز ءسوزسىز, – دەدى شاھار باسشىسى.
قىتاي حالىق رەسپۋبليكاسىنان تاۋەلسىزدىك ساباعىنا Desheng School International سەرىكتەستىك مەكتەبى قوسىلدى, شەتەلدىك وقۋشىلار قازاقستاننىڭ تاۋەلسىزدىك جىلدارىنداعى جەتىستىكتەرىمەن تانىستى. تاۋەلسىزدىك ساباقتارى ۇلىبريتانيا, اقش, وڭتۇستىك كورەيا, رەسەي, سينگاپۋر, مالايزيا, تۇركيا, قىتاي, ارمەنيا, وزبەكستانداعى شەتەلدىك NIS سەرىكتەس مەكتەپتەرى ءۇشىن دە جوسپارلانعانىن ايتا كەتكەن ءلازىم.
