ايماقتار • 17 قىركۇيەك، 2021

جامبىل وڭىرىندە جومارت جاندار ماراپاتتالدى

54 رەت كورسەتىلدى

جامبىل وڭىرىندە يگى باستامالارعا بارىنشا قولداۋ كورسەتىپ، قولدا بارىن كوپشىلىكپەن ءبولىسىپ كەلە جاتقان ازاماتتار بارشىلىق.

قوعامدا قايىرىمدى جاندارعا قۇرمەت تە بولەك. ايماقتاعى اتىمتاي جومارت ازاماتتاردى كوپشىلىككە ۇلگى ەتۋ ماقساتىندا، «رۋحاني جاڭعىرۋ» باعدارلاماسى اياسىندا ءتورتىنشى جىل قاتارىنان «جومارت جۇرەك» سىيلىعى تابىستالىپ كەلەدى. «جومارت جۇرەك» قايىرىمدىلىق سالاسىنداعى بۇل سىيلىق قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگىمەن بىرگە ەلىمىزدە قايىرىمدىلىق قىزمەتىن دامىتۋعا ەلەۋلى ۇلەس قوسقان قايىرىمدىلىق جاساۋشىلاردى ىزدەستىرۋ جانە كوتەرمەلەۋ، ولارعا قوعامدىق نازار اۋدارۋ ماقساتىندا تاعايىندالعان.

ء داستۇر بويىنشا، تاراز قالاسىنداعى قايرات رىسقۇلبەكوۆ اتىنداعى ساياباقتا جامبىل وبلىسىنىڭ اكىمى بەردىبەك ساپارباەۆتىڭ قاتىسۋىمەن «جومارت جۇرەك» سىيلىعىنىڭ وبلىستىق كەزەڭدەگى لاۋرەاتتارىن ماراپاتتاۋ ءراسىمى ءوتءتى. سالتاناتتى جيىندا بەردىبەك ساپارباەۆ قايىرىمدىلىق شارالارىن ۇيىمداستىرۋمەن اينالىسىپ كەلە جاتقان ازاماتتارعا العىس ءبىلدىردى. «قايىرىمدىلىق – ءبىزدىڭ قاسيەتتى قۇندىلىعىمىز. ءبىز قاشاننان ءبىر-ءبىرىمىزدى قولداپ، كومەك كورسەتىپ، مەيىرىمدىلىك تانىتىپ كەلەمىز. سوناۋ اشارشىلىق، سوعىس كەزىندە دە اتا-بابالارىمىز ۇلتىنا، تىلىنە قاراماي كوپكە كومەك كورسەتىپ، قول ۇشىن بەرگەنى بەلگىلى. سول يگى ءداستۇر ءالى دە جالعاسىن تاۋىپ كەلەدى. ەلباسىمىزدىڭ «رۋحاني جاڭعىرۋ» باعدارلاماسىنىڭ اياسىندا قولعا الىنعان «جومارت جۇرەك» جوباسى ءبىزدىڭ وڭىرىمىزدە دە تابىستى جۇزەگە اسىپ كەلەدى. قامقورلىقتى قاجەت ەتەتىن وتباسىلارعا ءبىزدىڭ دەمەۋشىلەرىمىز، كاسىپكەرلەرىمىز ۇنەمى قايىرىمدىلىق تانىتىپ كەلەدى. بۇدان بولەك، وبلىستا «جومارت تۇلەك» جوباسىن جۇزەگە اسىرۋدامىز. ونداعى ماقسات – تابىستى تۇلەكتەردى ءوزىنىڭ مەكتەبىنە، تۋعان اۋىلىنىڭ الەۋمەتتىك ماسەلەلەرىن شەشۋگە، وركەندەتۋگە تارتۋ، سونداي-اق، ولاردىڭ ونەگەلى ءومىر جولىن كەيىنگى ۇرپاققا ۇلگى رەتىندە ۇسىنۋ. سونىمەن قاتار، حالقىمىزدى بىرلىككە ۇندەيتىن «اسارلاتىپ ءۇي سالۋ جوباسىن» قولعا العان بولاتىنبىز. ەجەلدەن كەلە جاتقان يگى ءداستۇر – اسار ءادىسىن قايتا جاڭعىرتقان بۇل باستاما اياسىندا كاسىپكەرلەر مەن قايىرىمدى جانداردىڭ اتسالىسىپ، كوپتەگەن مۇقتاج وتباسىلارعا ءۇي سالىپ بەرۋدە. ءبىز بىرلىگىمىز بەن ۇيىمشىلىدىعىمىزدىڭ، تاباندىلىعىمىزدىڭ ارقاسىندا بارلىق قيىنشىلىقتى ەڭسەرە الامىز»، دەدى وبلىس اكىمى. بۇدان كەيىن بەردىبەك ساپارباەۆ وبلىستىق ىسكەر ايەلدەر قاۋىمداستىعى قوعامدىق بىرلەستىگىنىڭ ءتورايىمى مەرۋەرت لەشتاەۆانى «جىلدىڭ ۇزدىك ۇيىمى» اتالىمىمەن ماراپاتتادى. اتالعان قوعامدىق بىرلەستىكپەن بايزاق اۋدانىنداعى جارىلىستان زارداپ شەككەن تۇرعىندارعا كومەك كورسەتۋ ءۇشىن 500 مىڭ تەڭگەدەن استام قاراجات جينالىپ، وعان قاينار اۋىلىنداعى 19 وتباسىنا ازىق-ت ۇلىك ساتىپ الىنعان. ال، بالالاردى قورعاۋ مەرەكەسىنە قالانىڭ قوعامدىق بىرلەستىكتەرىنەن 110 بالاعا جالپى كولەمى 1،2 ميلليون تەڭگەگە سىيلىقتار الىپ بەرگەن. ونىڭ ىشىندە مۇمكىندىگى شەكتەۋلى بالالار مەن ولاردى تاربيەلەپ وتىرعان اتا-انالار دا قامتىلعان.

 سونىمەن قاتار، «تۋعان ولكە» اتالىمى ەركىنبەك كۋاتبەكوۆكە تابىستالدى. ول تالاس اۋدانى، مايتوبە اۋىلىنا جالپى قۇنى 18 ميلليون تەڭگە بولاتىن كىشى فۋتبول الاڭشاسىن جانە 1،2 ميلليون تەڭگەگە Street workout سالىپ بەرگەن. ال، «جىلدىڭ ۇزدىك قامقورشىسى» اتالىمىن اعىمداعى جىلى م.مامەتوۆا اتىنداعى №13 جالپى ورتا ءبىلىم بەرەتىن مەكتەپكە قۇنى 12 ميلليون تەڭگەنى قۇرايتىن «STEM» لابوراتورياسىن سىيعا تارتقان ءابۋتالىپ ءمۇتالى يەلەنسە، «جىل تۇلعاسى» اتالىمىمەن عاليا ابىتاەۆا ماراپاتتالدى. ول بيىل 30 جىلعا جۋىق باسپاناسىز جۇرگەن، ءتورت ۇلىنان ايىرىلعان قوس قارياعا جانە ونىڭ ەكى جەتىم نەمەرەسىنە ءۇي الىپ بەرۋ ماقساتىندا كايىرىمدىلىق اكتسيا ۇيىمداستىرىپ، اتالعان تۇرعىنداردىڭ باسپانالى بولۋىنا اتسالىسقان. سونداي-اق، كوروناۆيرۋس ىندەتىنە بايلانىستى كارانتين تالاپتارى مەن تارتىپتەرىن ورنىقتى ورىنداۋعا شاقىرعان جانە كوپشىلىكتىڭ ۆاكتسينا سالۋلارى ءۇشىن ەل ىشىندە ناسيحاتتاۋ، ۇندەۋ جۇمىستارىن جۇرگىزگەن. مەديتسينالىق جانە شارۋاشىلىق زاتتار الۋ ءۇشىن تۇرعىندارعا ۇندەۋ تاستاپ، 60 ميلليون تەڭگەدەن استام قارجى جيناۋعا ىقپال ەتكەن. ءسويتىپ، شۋ اۋدانىنداعى ەمحانا جانە اۋرۋحانالاردى جابدىقتاۋعا مول ۇلەسىن قوسقان. ال، «جىل مەتسەناتى» اتالىمىن تالعات تۇرعىمباەۆ يەلەندى. ول جۋالى اۋداندىق ورتالىق اۋرۋحاناعا جالپى قۇنى 109 ميلليون تەڭگەگە قاجەتتى قۇرال-جابدىقتار ساتىپ الىپ بەرگەن. ونىڭ ىشىندە زاماناۋي قۇرال-جابدىقتارمەن تولىقتاي جابدىقتالعان رەانيموبيل، 30 وتتەگى باللونى، 3000 دانا جەكە قورعانىش كيىمدەرى، مەديتسينالىق قىزمەتكەرلەر جۇمىس بارىسىندا كۇندەلىكتى پايدالاناتىن 5000 دانا «كن-95» ماركالى رەسپيراتور، 5000 دانا ءبىر رەت جانە كوپ رەت قولدانىلاتىن ارنايى قورعانىس كوستيۋمدەرى، ءبىر رەت قولدانىلاتىن مەديتسينالىق قولعاپتار سياقتى قورعانىس قۇرالدارىن جانە 10 دانا وتتەگى كونتسەنتراتورلارىن الىپ بەرگەن. جومارت جاندارعا بۇل اتالىمداردى وبلىستىق ءماسليحاتتىڭ حاتشىسى ماحمەتعالي سارىبەكوۆ، وبلىستىق ارداگەرلەر كەڭەسىنىڭ توراعاسى ەركىنبەك سولتىباەۆ، وبلىستىق كاسىپوداقتار بىرلەستىگىنىڭ توراعاسى باعلان قاراشولاقوۆ، م.ح.دۋلاتي اتىنداعى تاراز وڭىرلىك ۋنيۆەرسيتەتىنىڭ رەكتورى تالعات ەشەنقۇلوۆ تابىستادى. جەڭىمپازدارعا ارنايى ديپلومدارمەن قاتار، قارجىلاي سىيلىقتار دا تابىس ەتىلدى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ددسۇ QazVac-تى قاشان مويىندايدى؟

كوروناۆيرۋس • بۇگىن، 12:35

ۇقساس جاڭالىقتار