قالىبى مەن قاعيداسى بولەك قىلقالام شەبەرى «تۇنگى كافە» كارتيناسىن 1888 جىلى قىركۇيەكتە جازعان. ءدال وسى كۇنى. ءۇش ءتۇن بويى فرانتسيانىڭ وڭتۇستىگىندەگى ارلەس قالاسىنداعى ۆوكزال كافەسىنە بارىپ, تۇنگى كەلۋشىلەردىڭ ۋاقىتىن ماقساتسىز ءىشىپ وتكىزەتىنىنە كوزى جەتەدى. ارپالىسقا تولى ومىرمەن شارۋاسى جوق بەيقام ادامداردىڭ بولمىسى سۋرەتشىنىڭ كەلەسى ءبىر تۋىندىسىنىڭ تاقىرىبىنا اينالادى.
كەنەپتەگى سىزىقتاردىڭ ب ۇلىڭعىرلانۋى, تۇستەردىڭ ۇقىپسىزدىعى, كەيىپكەرلەرىنىڭ كومەسكى جۇزدەرى اۆتوردىڭ ويىنا ەشتەڭە كىرىپ شىقپايتىن وسپادار ادامنىڭ جاعدايىن جەتكىزگىسى كەلەتىنىن مالىمدەپ تۇرعانداي.
بولمەنىڭ ينتەرەرى سۋرەتشىنىڭ دەپرەسسيالىق كۇيىن كورسەتەتىن ءبىر-بىرىنە قاراما-قارسى نيۋانستارعا تولى. توبەدەگى جاسىل ءتۇس قىزىل قابىرعالاردىڭ مازاسىزدىعىنان كۇشەيگەن اۆتوردىڭ كۇننەن-كۇنگە مەڭدەپ بارا جاتقان سىرقاتىن كوبىرەك ەسكە تۇسىرەدى. ال قالىڭ دا جۇقا سارى رەڭكتەر مەكەمەنىڭ كوڭىلدى جانە ءتۇتىندى اتموسفەراسىن ايشىقتاپ تۇر. قالعان بيليارد ۇستەلى, كوپتەگەن بوتەلكە مەن ابەقوڭىر ۇستەلدەگى بوس قۇمىرالار ودان ءارى ماعىناسىزدىقتى ءھام بوستىقتى باياندايدى.
قويۋ قارا ءتۇننىڭ مازاسىن العان كافە, ءتۇن ورتاسى بولسا دا ۇيقىسى قاشقان ادامدار, تەرەزەدەگى تۇنگى پەيزاج, بەيمازا ساعات, ەرتەڭى كۇڭگىرت ەرلى-زايىپتىلار ءبارى دە ءبىر نۇكتەگە بايلانعان.
الدىنداعى شارابىن تاۋىسا الماي ۇيقىعا كەتكەن ماسكۇنەم مەن ىشىمدىككە سىلقيا تويعان ەكى سۇحباتتاسۋشى جاعىمسىز اسەردى ودان ءارى كۇشەيتەدى. بۇل ەففەكتىنى سارى كوستيۋمدەگى كەلۋشى اياقتايدى, ول سۋرەتشى مەن وقىرمانعا تۋرا قاراپ تۇر. ول ماعىناسىزدىقتى ۆان گوگتان ىزدەيتىندەي.
سۋرەتشى اعاسى تەوعا جازعان حاتىندا بۇل كارتينادا ادامنىڭ ءوزىن ءوزى تۇڭعيىققا باتىرعانىن جانە قۇردىمعا تارتقان قۇمارلىقتى جەتكىزۋگە تىرىسقانىن ايتادى. بۇل ءسات ونى ەسىنەن الجاستىراتىنىنا ءارى قىلمىس جاساۋعا يتەرمەلەيتىنىن جەتكىزەدى.
بۇل سۋرەت سىنشىلار تاراپىنان جوعارى باعالانىپ, ۆان گوگتىڭ عاجايىپ تۋىندىلارىنىڭ ءبىرى دە بىرەگەيى ەسەبىندە تاريحقا ەندى. كەيىننەن ول جاڭا ستيل, ياكي ەكسپرەسسيونيزمدى دۇنيەگە اكەلدى. سۋرەتشى اتالعان شىعارماسىن اكۆارەلمەن قايتالايدى.
بۇگىندە «تۇنگى كافە» كارتيناسى يەل ۋنيۆەرسيتەتىنىڭ كوركەم گالەرەياسىندا ساقتاۋلى.
