بۇگىندە ەكىباستۇز وڭىرىندە ەل ەنەرگەتيكاسى ءۇشىن ماڭىزدى جوبالار ىسكە اسىرىلۋدا. اتاپ ايتقاندا, «بوگاتىر» كەنىشىندە ونىڭ قۋاتىن 32 ملن-نان 40 ملن تونناعا دەيىن ارتتىراتىن كومىر ءوندىرۋ مەن تاسىمالداۋدىڭ تسيكلدىق-اعىندىق تەحنولوگياسىن ەنگىزۋ جوباسى, سونداي-اق ەكىباستۇز ماەس-1 №1 ەنەرگيا بلوگىن قالپىنا كەلتىرۋ جانە ەكىباستۇز ماەس-2 ءۇشىنشى ەنەرگيا بلوگىن سالۋ جوبالارى بار.
مەملەكەت باسشىسىنىڭ تاپسىرمالارىن ورىنداۋ تۋرالى «سامۇرىق-ەنەرگو اق ءوندىرىس جانە اكتيۆتەردى باسقارۋ جونىندەگى باسقارۋشى ديرەكتورى سەرىك توتەباەۆ ەكىباستۇز قالاسىندا وتكەن ءباسپاسوز تۋرى كەزىندە باق وكىلدەرىنە ايتىپ بەردى. تىلشىلەر «بوگاتىر» كەنىشىندە سالىنىپ جاتقان تسيكلدىق-اعىندىق تەحنولوگيالار (تسات) نىساندارىندا بولىپ, قۇرىلىس اۋقىمىن – ۇساتقىشتاردى, كونۆەيەرلەردى, ورتاشا تيەۋ پۋنكتىن مونتاجداۋدى كوردى.
ەسكە سالا كەتەيىك, «بوگاتىر» كەنىشىندە كومىر ءوندىرۋ تەحنولوگياسىن تۇبەگەيلى وزگەرتۋ قاجەتتىلىگى تاۋ-كەن جۇمىستارىنىڭ تەرەڭدىگىنە قول جەتكىزۋمەن بايلانىستى, بۇل رەتتە كومىردى تاسىمالداۋدىڭ قولدانىستاعى تەمىرجول سىزباسى ءتيىمسىز. سوندىقتان قازىرگى ۋاقىتتا «بوگاتىر كومىر» جشس تسات جوباسىن بەلسەندى تۇردە جۇزەگە اسىرۋدا, ونى اياقتاۋ 2022 جىلدىڭ ەكىنشى توقسانىنا جوسپارلانىپ وتىر. جاڭا تەحنولوگيانى ەنگىزۋ «بوگاتىر كومىر» جشس-ءنىڭ وندىرىستىك قۋاتىن 50 ملن تونناعا دەيىن ارتتىرۋعا مۇمكىندىك بەرەدى. سونداي-اق ءونىمنىڭ ساپالىق سيپاتتامالارىن جاقسارتادى, تەمىرجول ۆاگوندارىنا كومىر تيەۋدىڭ سالماقتىق دالدىگىن قامتاماسىز ەتەدى جانە كومىر تيەلەتىن ۆاگوندار اينالىمىنىڭ ۋاقىتىن 3 ەسە قىسقارتادى.
