كەزدەسۋدە «نازارباەۆ ۋنيۆەرسيتەتىنىڭ» 10 جىل ىشىندە قول جەتكىزگەن باستى جەتىستىكتەرى مەن جوعارى وقۋ ورنىن ودان ءارى دامىتۋ ستراتەگياسىن جۇزەگە اسىرۋ بارىسى تالقىلاندى. ەلباسى «نازارباەۆ ۋنيۆەرسيتەتىنىڭ» از ۋاقىت ىشىندە جوعارى بىلىكتى كاسىپقوي كادر دايارلايتىن جانە وتاندىق عىلىمدى دامىتاتىن جەتەكشى وقۋ ورنىنا اينالعانىن اتاپ ءوتتى.
«جاس مەملەكەتىمىزگە زاماناۋي كادرلار قاجەت بولدى, سوندىقتان الدىمەن «بولاشاق» باعدارلاماسىن جاريالادىم. ۋاقىت وتە كەلە باكالاۆرلاردى «نازارباەۆ ۋنيۆەرسيتەتىندە» دايارلاي باستادىق. مەن وسى جوعارى وقۋ ورنىنا ءجيى بارىپ, ديپلوم تاپسىرۋ راسىمىنە قاتىسىپ تۇرامىن. ۋنيۆەرسيتەتتىڭ كەلەشەگى زور. قازىر ول كوپتەگەن وتاندىق جوعارى وقۋ ورىندارىنا ۇلگى بولىپ وتىر. وسىنىڭ ءبارى – ءسىزدىڭ ەڭبەگىڭىزدىڭ جەمىسى», دەدى قازاقستاننىڭ تۇڭعىش پرەزيدەنتى.
نۇرسۇلتان نازارباەۆ وقۋ ورنىن ءارى قاراي دامىتۋ كەرەكتىگىنە, سونىڭ ىشىندە جاساندى ينتەللەكت تەحنولوگياسىن دامىتۋ مەن قولدانۋ سالاسىنداعى جوبالاردى جۇزەگە اسىرۋعا نازار اۋداردى.
ء«بىزدىڭ باعدارلامامىزدىڭ كەلەسى دامۋ كەزەڭى – جاساندى ينتەللەكت كامپۋسىن اشۋ. ونى الماتىدا قۇرۋ جوسپارلانىپ وتىر. جوبانى ىسكە اسىرۋعا قاتىساتىن شەتەلدىك كومپانيالارمەن كەلىسسوز دە جۇرگىزىلدى», دەدى ەلباسى.
ءوز كەزەگىندە ش.كاتسۋ ۋنيۆەرسيتەتتىڭ 2018-2030 جىلدارعا ارنالعان ستراتەگياسىنىڭ نەگىزگى ينديكاتورلارىنا قول جەتكىزىلگەنى تۋرالى باياندادى. «نازارباەۆ ۋنيۆەرسيتەتى» دەربەس ءبىلىم بەرۋ مەكەمەسى پرەزيدەنتىنىڭ مالىمەتىنە سايكەس, بۇگىندە جوعارى وقۋ ورنىندا 6,8 مىڭنان استام ستۋدەنت ءبىلىم الۋدا. اشىلعاننان بەرى 5 مىڭنان استام عىلىمي ماقالا جارىق كورىپ, 300 عىلىمي جوبا جۇزەگە استى. عىلىمي زەرتتەۋلەردىڭ ساپاسى بويىنشا «نازارباەۆ ۋنيۆەرسيتەتى» ەۋرازيا كەڭىستىگىندەگى 10 ۇزدىك جوعارى وقۋ ورنىنىڭ قاتارىنا قوسىلىپ, قۇرلىقتاعى جەتەكشى وقۋ ورىندارىنا باسەكەلەس بولىپ وتىر.
