قالالىق كريمينالدى پوليتسيا قىزمەتكەرلەرى اتالعان قىلمىسقا قاتىستى بۇرىن بۇزاقىلىق جاساعانى ءۇشىن سوتتالعان جامبىل وبلىسىنىڭ 26 جاستاعى تۇرعىنىن جانە وسىعان دەيىن ەكى رەت سوتتى بولعان 25 جاستاعى ەر ادامدى ۇستادى. ولاردى قۇرىقتاماس بۇرىن ءتارتىپ ساقشىلارى كۇدىكتىلەردىڭ ارقايسىسىنىڭ اتقاراتىن قىلمىستىق ارەكەتىن ارنايى وپەراتسيا بارىسىندا زەردەلەپ, ۇرلانعان كولىك قۇرالدارىن بولشەكتەپ ساتۋعا جاۋاپتى ادامدى انىقتاعان.
«اتالعان قىلمىستىق توپ التى ادامنان قۇرالعان. ولاردىڭ ۇلكەندەرىنىڭ جاسى 47-دە بولسا, ەڭ جاس كۇدىكتى 25-تە. بۇلاردىڭ بارلىعى وڭاي جولمەن پايدا تابۋدى كوزدەگەن. دالىرەك ايتقاندا, ەكى كۇدىكتى وزدەرىن قالا بازارلارىنىڭ بىرىندە قوسالقى بولشەكتەر ساتۋمەن اينالىساتىن جەكە كاسىپكەر رەتىندە تانىستىرعان. الايدا ولاردىڭ ساۋدا نۇكتەلەرىندە تەك قانا ۇرلانعان كولىك قۇرالدارىنىڭ قوسالقى بولشەكتەرى ساۋدالانعان», دەدى الماتى قالاسى پد كريمينالدىق پوليتسيا باسقارماسىنىڭ باستىعى قۋاتبەك ناۋاتوۆ.
تەرگەۋ بارىسىندا كۇدىكتىلەردىڭ 10 كولىك قۇرالىن ۇرلاعانى بەلگىلى بولدى. ولار كوبىنە ەسكى ۇلگىدەگى BMW, Lada, Nissan, Audi, Volkswagen كولىكتەرىن قولدى ەتىپ وتىرعان.
«قازىرگى تاڭدا ءۇش اۆتوكولىك تولىعىمەن انىقتالسا, قالعان جەتى كولىكتىڭ قايدا جاسىرىلعانى انىقتالىپ جاتىر. ۇستالعانداردىڭ سوزىنشە, ولار كولىكتەردى كورشىلەس وبلىستارعا اپارىپ ۇلگەرگەن. كۇدىكتىلەر قاماۋعا الىندى. تەرگەۋ امالدارى جالعاسۋدا», دەپ اتاپ ءوتتى پوليتسيا وكىلى.
