«XVII ەۋرازيا مەديافورۋمىنا قاتىسۋشىلار مەن قوناقتاردى قارسى العانىما قۋانىشتىمىن. وسى جىلدار ىشىندە فورۋم پىكىر الماسۋدىڭ تانىمال مەديا الاڭىنا اينالدى. بەلگىلى ساياساتكەرلەر, ساراپشىلار مەن جەتەكشى بۇقارالىق اقپارات قۇرالدارىنىڭ وكىلدەرى مۇندا الەمدىك قوعامداستىق ءۇشىن ەڭ وزەكتى ماسەلەلەردى قاراستىرىپ, ولاردى شەشۋدىڭ جاڭا تاسىلدەرىن ازىرلەيدى», دەپ قر مەملەكەتتىك حاتشىسى قىرىمبەك كوشەرباەۆ نۇرسۇلتان نازارباەۆتىڭ ۇندەۋىن وقىدى.
نۇرسۇلتان نازارباەۆ فورۋم ءوز تاريحىندا العاش رەت ونلاين فورماتتا ءوتىپ جاتقانىن, بىراق بۇل ەۋرازيا مەن الەمنىڭ وزەكتى پروبلەمالارىنىڭ ماڭىزدىلىعى مەن كەڭىنەن تالقىلانۋىنا ەش اسەر ەتپەيتىنىن اتاپ ءوتتى.
«بيىل قازاقستان تاۋەلسىزدىگىنىڭ 30 جىلدىعىن اتاپ وتەدى. ءبىز ۇزاق جانە قيىن جولدان وتتىك, ماڭىزدى ناتيجەلەرگە قول جەتكىزدىك. بۇگىندە ەلىمىزدىڭ الدىندا جاڭا ءورشىل مىندەت تۇر - 2050 جىلعا قاراي الەمدەگى ەڭ دامىعان 30 ەلدىڭ قاتارىنا ەنۋ. حالىق بىرلىگى - ارقاشان قازاقستاننىڭ العا جىلجۋىنىڭ وزەگى, بۇل ستراتەگيالىق ماقساتقا دا قول جەتكىزەمىز», دەدى ەلباسى.
نۇرسۇلتان نازارباەۆ سونداي-اق جاڭا جاھاندىق سىن-قاتەرلەر مەن پاندەمياعا قارسى كۇرەستىڭ قازىرگى جاعدايىندا بۇل بىرتۇتاستىق ءپرينتسيپى بۇكىل ادامزات ءۇشىن ماڭىزدى ەكەنىن اتاپ ءوتتى.
«بارلىق فورۋم قاتىسۋشىسىنا جەمىستى تالقىلاۋ تىلەيمىن. ءسىزدىڭ جۇمىسىڭىز جاھانعا قازىرگى الەمنىڭ تەك بىرلىك, ديالوگ پەن ءوزارا سىيلاستىق ارقىلى عانا دامي الاتىنىن تۇسىندىرۋگە قىزمەت ەتسىن», دەدى ەلباسى فورۋمعا قاتىسۋشىلارعا.
