گيبريدتى پوشتا قىزمەتتەرى – ەلەكتروندى جانە قاراپايىم پوشتانىڭ سيمبيوزى. ونى جىبەرۋشىگە ۇيدەن نەمەسە كەڭسەدەن شىقپاي-اق ەلەكتروندى حابارلاما ءماتىنىن جىبەرۋ جەتكىلىكتى. ەلەكتروندى فايل ونى قابىلدايتىن ادامعا ەڭ جاقىن ەلەكتروندىق باسىپ شىعارۋ پۋنكتىنە تۇسەدى. اۆتوماتتاندىرىلعان جۇمىس ورنىندا حات باسىپ شىعارىلادى, پوشتا كونۆەرتىنە سالىنىپ, الۋشىعا جەتكىزىلەدى.
گيبريدتى ەلەكتروندى پوشتا (بۇدان ءارى – گەپ) كليەنتتىڭ كوپتەگەن حاتىن, شوتى مەن حابارلاماسىن جونەلتۋ شىعىندارىن ازايتۋعا, ال ۇلتتىق پوشتا وپەراتورىنا قاعازداعى حات-حاباردى جەتكىزۋ بويىنشا قولايلى جانە ساپالى قىزمەتتەر كورسەتۋگە مۇمكىندىك بەرەدى. بۇل رەتتە حات-حابارلار 1-3 كۇن ىشىندە ءتيىستى ادرەساتقا جەتكىزىلەدى.
گەپ-تىڭ حاتتاردى تاۋلىك بويى ونلاين جىبەرۋگە جانە وڭدەۋ, ءىت-باقىلاۋدى ورناتۋ ەسەبىنەن جونەلتۋشىلەردىڭ قاتەلىك جىبەرۋىنە جول بەرمەۋ, جونەلتۋشىنىڭ جەكە كابينەتىندە ترەكينگ تاريحىن تەكسەرۋ, ءتيىمدى تاريفتەردى پايدالانۋ ىسپەتتى ارتىقشىلىقتارى بار. سونىمەن بىرگە گەپ قابىلداۋ بارىسى اۆتوماتتاندىرىلعان, وعان ادام قاتىسپايدى. بۇل ءوز كەزەگىندە وپەراتورلاردىڭ قاتەلىكتەرىن بولدىرماۋعا مۇمكىندىك بەرەدى.
بىلتىر قازاقستاننىڭ تۇكپىر-تۇكپىرىنە 2,3 ملن-نان استام گيبريدتى حات جەتكىزىلدى. قىزمەتتى ساپالى كورسەتۋ تەتىكتەرى جولعا قويىلعان: گيبريدتىك ەلەكتروندى پوشتانى قابىلداۋدىڭ, وڭدەۋدىڭ, باسىپ شىعارۋدىڭ جانە جەتكىزۋدىڭ بارلىق نەگىزگى سەرۆيسى جۇزەگە اسىرىلعان. قىزمەتتىڭ بۇل تۇرىنە جەكە جانە زاڭدى تۇلعالار جۇگىنە الادى. بۇگىندە گيبريدتى پوشتانىڭ مۇمكىندىكتەرىن كوبىنە مەملەكەتتىك ورگاندار پايدالانادى.
«قازپوشتا» اق ساپالى وزگەرىستەرگە, قىزمەتتەردىڭ قولايلىلىعى مەن قولجەتىمدىلىگىن ارتتىرۋعا, تسيفرلى سەرۆيستەر مەن IT-شەشىمدەردى ەنگىزۋ ەسەبىنەن پوشتا جونەلتىلىمدەرىن جەتكىزۋ مەرزىمدەرىن قىسقارتۋعا كوپ كوڭىل بولەدى. بۇگىندە post.kz قىزمەتتەر گيپەرماركەتىندە 90-عا جۋىق قىزمەت ونلاين تارتىپتە ۇسىنىلعان. جىل سوڭىنا دەيىن بۇل رەسۋرستا كليەنتتەرگە قازپوشتانىڭ قوسىمشا 100-گە دەيىن قىزمەتى ەلەكتروندىق تۇردە قولجەتىمدى بولادى. ۇلتتىق پوشتا وپەراتورى كومپانيانىڭ 2027 جىلعا دەيىنگى دامۋ ستراتەگياسىندا بەلگىلەنگەن ماقساتتارعا سايكەس قىزمەتتى بەلسەندى تسيفرلى ترانسفورماتسيالاۋدى جۇزەگە اسىرادى.
«ەگەمەن-اقپارات»
