بۇگىندە قازاقستاندىق شىعارماشىلىق يەلەرى دە حالىقارالىق نارىقتا باسەكەگە قابىلەتتى كرەاتيۆتى ءونىم شىعارا الاتىنىن كورسەتىپ كەلەدى. دەرەكتەرگە زەر سالساق, 2019 جىلى ەلىمىزدەگى شىعارماشىلىق يندۋستريالاردىڭ ەكسپورت كولەمى 247 ملن دوللاردان اسقان. ارينە, مەديا, ويىن-ساۋىق نارىعى الدەقاشان دامۋ جولىنا تۇسكەن ەلدەردەگىمەن سالىستىرعاندا, بۇل تومەن كورسەتكىش بولۋى مۇمكىن. بىراق ەلىمىزدە دە شىعارماشىلىق كاسىپكەرلىككە قولداۋ كورسەتۋ, نارىققا باسەكەگە قابىلەتتى ءونىم شىعارۋ, كادر دايارلاۋ, تالانتتى جاستاردى قولداۋ, شىعارماشىلىق قىزمەت پەن زياتكەرلىك مەنشىكتى قورعاۋ سەكىلدى جۇمىستاردىڭ ىسكە اسىپ جاتقانى بەلگىلى. ەندىگى كەزەكتە كرەاتيۆتى يندۋستريادا جۇمىسپەن قامتىلعاندار سانىن ارتتىرۋعا باسىمدىق بەرىلىپ, گرانت, نەسيە, سۋبسيديا الۋعا مەملەكەتتىك قولداۋ تۇرىندەگى جەڭىلدىكتەر قاراستىرىلسا, قارجىلىق, زاڭنامالىق تۇرعىدا كومەك كورسەتىلىپ, ارنايى قورلار اشىلسا, ەكونوميكانىڭ وسىناۋ ماڭىزدى باعىتىن دامىتۋعا مول مۇمكىندىك تۋاتىنى داۋسىز.
بۇۇ 2021 جىلدى شىعارماشىلىق, ەكونوميكا, مادەنيەت, بيزنەس جانە تەحنولوگيالار توعىسقان ينتەللەكتۋالدى قىزمەتكە نەگىزدەلگەن ء«بىلىم ەكونوميكاسى» جىلى دەپ جاريالادى. كرەاتيۆتى ەكونوميكا ادامي كاپيتالدى جەتىلدىرۋمەن تىعىز بايلانىستى ەكەنىن ەسكەرسەك, قازىرگىدەي ترانسفورماتسيا كەزەڭىندە شىعارماشىلىق الەۋەتتى دامىتۋدىڭ ماڭىزى ارتا تۇسەدى. سوندىقتان جوعارى وقۋ ورىندارىنداعى ستۋدەنتتەردىڭ وزدەرى قالاعان ماماندىعىن مەڭگەرىپ قانا قويماي, شىعارماشىلىقپەن اينالىسۋىنا, جوبالارى مەن تىڭ يدەيالارىن ىسكە اسىرۋىنا قولايلى جاعداي جاسالۋى كەرەك. بۇل ءۇشىن ءتۇرلى Startup ورتالىعىن, soft skills-تەر ارقىلى كاسىپكەرلىككە باۋليتىن شەبەرلىك سىنىپتارىن ۇيىمداستىرۋدىڭ تيىمدىلىگى جوعارى بولماق. وسى ورايدا س.وتەباەۆ اتىنداعى اتىراۋ مۇناي جانە گاز ۋنيۆەرسيتەتىنىڭ بازاسىندا كرەاتيۆتى يندۋستريا ورتالىعى اشىلعالى وتىر.
بۇل ورتالىق تالانتتى جاستارىمىزدى شىعارماشىلىق تۇرعىدان شىڭدايتىن OpenSpace بولادى دەگەن سەنىمدەمىز. مۇندا الەمدىك تسيفرلى الپاۋىتتار – Facebook, Twitter, Google جانە تاعى باسقا دا كومپانيالاردا جۇمىس ىستەپ جۇرگەن قازاقستاندىقتاردىڭ قاتىسۋىمەن «مەنتورلىق مەكتەپ» جوباسى ۇيىمداستىرىلادى. ولار ءبىزدىڭ ستۋدەنتتەردى ديزاين, ۆيدەوگرافيا, جۋرناليستيكا جانە تاعى باسقا شىعارماشىلىق, تسيفرلى قۇزىرەتتىلىكتەردى مەڭگەرۋگە ۇيرەتەدى.
مۇنايلى ايماقتاعى العاشقى كرەاتيۆتى يندۋستريا ورتالىعى كاسىبي ساراپشىلاردى بىرىكتىرەتىن, ماڭىزدى ماسەلەلەر بويىنشا پىكىرتالاستار وتكىزەتىن, يدەيالار مەن شەتەلدىك تاجىريبە ترانسفەرتىنە باستاماشىلىق جاساپ, جاھاندىق پروتسەستەرگە تالداۋ, مونيتورينگ جۇرگىزەتىن, زاماناۋي جاڭاشىلدىقتىڭ وڭىرگە, جالپى ەلگە اسەرىن باعامدايتىن الاڭ بولادى. وسى ارقىلى ايماقتاعى تالانتتى جاستاردىڭ قاتارىن ارتتىرۋعا, ولاردىڭ تۋىپ-وسكەن ءوڭىرىنىڭ وركەندەۋىنە اتسالىسۋىنا سەبەپكەر بولۋدى ماقسات ەتىپ وتىرمىز. ورتالىق ستۋدەنتتەردىڭ ءوزىن-ءوزى جەتىلدىرۋىنە, باتىل يدەيالارىن ىسكە اسىرۋىنا, عىلىمي, يننوۆاتسيالىق پروتسەستەرگە ارالاسۋىنا جول اشادى. ورتالىقتىڭ 600 ادامعا ارنالعان الاڭىندا ءارتۇرلى حاكاتوندى تەك ۋنيۆەرسيتەت ستۋدەنتتەرى ءۇشىن عانا ەمەس, اتىراۋ وبلىسىنداعى مەكتەپتەردىڭ تالانتتى وقۋشىلارى ءۇشىن دە ۇيىمداستىرۋ جوسپارلاندى. وسىلايشا, س.وتەباەۆ اتىنداعى اتىراۋ مۇناي جانە گاز ۋنيۆەرسيتەتى كرەاتيۆتى يندۋستريا ورتالىعىن اشۋ ارقىلى ء«بىلىم ەكونوميكاسىنىڭ» دامۋىنا ۇلەس قوسۋدى كوزدەپ وتىر.
كرەاتيۆتى ەكونوميكانىڭ جەتەكشى رەسۋرسى – ادام كاپيتالى. تەحنيكا مەن تەحنولوگيا قارىشتاپ دامىعان جاڭا داۋىردە ەكونوميكانىڭ باستى دامۋ كوزى – شيكىزات ەمەس, ادامدار, ولاردىڭ داعدىلارى, قابىلەتى مەن قۇزىرەتى. سول سەبەپتەن, قازىر جاستارعا ءداستۇرلى جولمەن ءبىلىم بەرىپ قانا قويماي, ولاردىڭ soft skills-تەرىن دامىتىپ, قابىلەتىن ارتتىرىپ, ءتۇرلى شىعارماشىلىق يدەيالارىنا ينۆەستيتسيا سالۋ جولدارىن ويلاcتىرۋىمىز قاجەت. وسى ماقسات جولىنداعى جوسپارىمىز مەملەكەت باسشىسىنىڭ حالىققا ارناعان جولداۋىمەن ۇندەسىپ, قولعا العان ىسىمىزگە تىڭ سەرپىن بەردى. دامىعان ءبىلىم بەرۋ ينفراقۇرىلىمى مەن قولايلى كاسىپكەرلىك ورتا وڭىرلەرگە ءبىلىمدى, بىلىكتى مامانداردى تارتۋعا, ەل ەكونوميكاسىن جاڭا بەلەسكە كوتەرەتىن ماڭىزدى ۇردىستەردى ىسكە اسىرۋعا نەگىز قالايدى. ويتكەنى ەڭ ءتيىمدى ينۆەستيتسيا – ادام كاپيتالىنا سالىنعان ينۆەستيتسيا.
گۇلزادا شاكۋليكوۆا,
«س.وتەباەۆ اتىنداعى اتىراۋ مۇناي جانە گاز ۋنيۆەرسيتەتى» كەاق باسقارما توراعاسى-رەكتورى
اتىراۋ وبلىسى
