ء«بىز كۇدىكتىنىڭ مەرزىمىن قىلمىستىق ءىس ماتەريالدارىمەن تانىسۋ كەزەڭىنە ۇزارتۋ تۋرالى ءوتىنىشحاتتى قاراپ وتىرمىز. 7 شىلدە كۇنى تەرگەۋ اياقتالدى, قازىر تانىسۋ كەزەڭىندە. قىلمىستىق ءىس 133 تومنان تۇرادى, زاتتاي دالەل جانە وزگە دە ماتەريالدار بار. قازىر ءبىرتانوۆتى ۇيقاماقتا ۇستاۋ مەرزىمى 14 قىركۇيەكتە اياقتالادى, ال تەرگەۋ قورىتىندىسى بويىنشا ىسپەن تولىق تانىسۋدى اياقتاۋ مۇمكىن ەمەس. وسىعان بايلانىستى جتت ورگانىنىڭ بىرتانوۆقا ۇيقاماق مەرزىمىن 2021 جىلدىڭ 14 قاراشاسىنا دەيىن ەكى ايعا ۇزارتۋدى جانە قاناعاتتاندىرۋدى سۇرايمىن», دەدى پروكۋرور تولەگەن جاراسپاەۆ.
كەڭەسۋ بولمەسىنەن شىققاننان كەيىن نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتىنىڭ سۋدياسى تالعات اقشاباەۆ پىكىر ءبىلدىردى.
«كۇدىكتى ەلجان ءبىرتانوۆتىڭ قىلمىستىق ءىس ماتەريالدارىمەن تانىسۋ كەزەڭىندە ۇيقاماقتا بولۋ مەرزىمىن ەكى ايعا ۇزارتۋ تۋرالى قولداۋحات قاناعاتتاندىرىلسىن. كۇدىكتى ەلجان ءبىرتانوۆتىڭ قىلمىستىق ءىس ماتەريالدارىمەن تانىسۋ كەزەڭىندە ۇيقاماقتا بولۋ مەرزىمى ەكى ايعا, ياعني 2021 جىلدىڭ 14 قاراشاسىن قوسا العانداعى 21 ساعات 56 مينۋت ۋاقىتقا دەيىن ۇزارتىلسىن. قاۋلىعا شاعىم جاسالۋى مۇمكىن, ول جاريا ەتىلگەن كەزدەن باستاپ ءۇش تاۋلىك ىشىندە ءوتىنىش بويىنشا قايتا قارالادى», دەدى سۋديا تالعات اقشاباەۆ.
ايتا كەتەيىك, ەلجان ءبىرتانوۆ مەملەكەت باسشىسىنىڭ جارلىعى بويىنشا 2020 جىلدىڭ 25 ماۋسىمىندا دەنساۋلىق ساقتاۋ ءمينيسترى قىزمەتىنەن بوساتىلعان.
2020 جىلدىڭ 3 قاراشاسىندا ەكس-مينيسترگە قاتىستى اسا ءىرى كولەمدە بيۋدجەت قاراجاتىن ىسىراپ ەتۋ فاكتىسى بويىنشا قىلمىستىق ءىس قوزعالىپ, قاماۋعا الىندى.
2020 جىلدىڭ 7 قاراشاسىندا ءتورت ايعا ۇيقاماققا الىندى;
2021 جىلدىڭ 12 اقپانىندا نۇر-سۇلتان قالاسىنىڭ تەرگەۋ سوتى ەكس-ءمينيستردىڭ ۇيقاماقتاعى مەرزىمىن ناۋرىز ايىنىڭ سوڭىنا دەيىن ۇزارتتى;
2021 جىلدىڭ 6 مامىرىندا سوت ەلجان ءبىرتانوۆتىڭ ۇيقاماق ۋاقىتىن 14 ماۋسىمعا دەيىن سوزدى;
2021 جىلدىڭ 9 ماۋسىمىندا ءبىرتانوۆتىڭ ۇيقاماق ۋاقىتى 14 شىلدەگە دەيىن سوزىلدى;
2021 جىلدىڭ 14 شىلدەسىندە سوت ەكس-ءمينيستردىڭ ۇيقاماق مەرزىمىن 14 قىركۇيەككە دەيىن ۇزارتقان بولاتىن.
