«6-12 قىركۇيەك ارالىعىندا ەسىرتكى قۇرالدارىنىڭ, پسيحوتروپتىق زاتتار مەن پرەكۋرسورلاردىڭ زاڭدى اينالىمىنداعى بۇزۋشىلىقتاردى انىقتاۋ بويىنشا «دارمەك» وپەراتسياسىنىڭ كەزەكتى كەزەڭى وتكىزىلدى. التى كۇن ىشىندە پوليتسيا 865 سۋبەكتىنى, ونىڭ ىشىندە 599 ءدارىحانانى, 24 قويمانى, 205 ەمدەۋ-الدىن الۋ مەكەمەلەرىن, سونداي-اق 37 ونەركاسىپتىك كاسىپورىندى تەكسەردى. ناتيجەسىندە 1,2 توننا پرەكۋرسور اينالىمى شەكتەلگەن», دەدى باقىتجان ءامىرحانوۆ بريفينگتە.
ونىڭ ايتۋىنشا, وپەراتسيا ەسىرتكىگە ۇقساس ءدارى-دارمەكتەردى رەتسەپتىسىز بوساتۋدى انىقتاۋعا باعىتتالعان.
ول جەدەل الدىن الۋ ءىس-شاراسى بارىسىندا 18 قىلمىستىق قۇقىق بۇزۋشىلىق, ونىڭ ىشىندە 17 ەسىرتكى زاتتارىمەن جۇمىس ىستەۋ ەرەجەلەرىن بۇزۋ, ءبىر زاڭسىز مەديتسينالىق جانە فارماتسەۆتيكالىق قىزمەت جانە رەتسەپتىلەردى زاڭسىز بەرۋ نەمەسە قولدان جاساۋ انىقتالعانىن ايتتى.
«الماتى وبلىسىندا مەديتسينالىق مەكەمەنى تەكسەرۋ كەزىندە ەسىرتكى جانە پسيحوتروپتىق پرەپاراتتاردى ساقتاۋ فاكتىسى انىقتالدى: مورفين - 417 امپۋلا, پرومەدول - 255 امپۋلا, فەنتونيل - 100 امپۋلا, رەلانيۋم - 140 امپۋلا ليتسەنزياسىز. قر قك 303 - بابى 1-بولىگى بويىنشا سوتقا دەيىنگى تەرگەۋ باستالدى», دەدى باقىتجان ءامىرحانوۆ.
ءىىم اقپاراتى بويىنشا, باقىلاۋداعى زاتتار اينالىمى سالاسىندا 93 اكىمشىلىك قۇقىق بۇزۋشىلىق, ونىڭ ىشىندە 28 وبەكتىنى تەحنيكالىق نىعايتۋ تالاپتارىن بۇزۋ جانە ليتسەنزيالاۋ نورمالارىنىڭ سەگىز فاكتىسى انىقتالدى.
«پرەپاراتتاردى رەتسەپتىسىز بوساتۋدىڭ 57 فاكتىسى انىقتالدى. قولدانىستاعى زاڭنامانى بۇزا وتىرىپ ساقتالعان نەمەسە ساتىلاتىن قۇرامىندا ەسىرتكى بار بارلىق پرەپاراتتار, ياعني ەسىرتكى قۇرالدارىنىڭ 1343 امپۋلاسى جانە 1 مىڭنان استام تابلەتكا مەن پسيحوتروپتىق زاتتاردىڭ 1206 امپۋلاسى اينالىمنان الىندى», دەپ قورىتىندىلادى ءامىرحانوۆ.
