ونەر • 13 قىركۇيەك، 2021

جان الەمىنىڭ جارشىسى

25 رەت كورسەتىلدى

قازاقستاننىڭ تۇڭعىش پرەزيدەنتى – ەلباسى كىتاپحاناسىندا قازاقستان سۋرەتشىلەر وداعىنىڭ مۇشەسى، بەلگىلى قىلقالام شەبەرى جەڭىس كاكەن ۇلىنىڭ «پاندەميا. شەكتەۋ. سامعاۋ...» اتتى جەكە كورمەسى اشىلدى.

 مازمۇندى ءىس-شارا «تاۋەلسىزدىكتىڭ مادەني نەگىزى» جوباسى اياسىندا ۇيىم­داستىرىلدى.

ەلباسى كىتاپحاناسىنىڭ مۋزەي قۇن­دىلىقتارىن ەسەپكە الۋ جانە ساق­تاۋ قىزمەتىنىڭ باسشىسى كۇلايشا اقتاەۆا­نىڭ ايتۋىنشا، بۇل جوبا – الەمدى شار­پىعان پاندەمياعا قاراماستان، ۇلت ما­دەنيەتىنىڭ كورنەكتى وكىلدەرىنىڭ ونەرىن ناسيحاتتاۋدى ماقسات تۇتقان.

−جەڭىس كاكەن ۇلىنىڭ كورمەسى – اۆتور الەمىنىڭ ايناسى. ونىڭ تۋىندىلارى تابيعاتقا، قۇستارعا، ۇيلەسىمدىككە ۇمتىلادى. قانىق بوياۋلارعا تولى سۋ­رەتتەر شىعارماشىلىق بەينەلەر مەن تىل­سىم نازىكتىكتى ابدەن سىڭىرگەن. ۇسى­نىلعان سەرياداعى ءار جۇمىس ءبىرتۇتاس رۋحاني مازمۇندى قۇرايدى، – دەدى كورمەنىڭ اشىلۋىندا كۇلايشا اقتاەۆا.

كورمەگە تالانتتى قىلقالام شەبە­رىنىڭ ادامنىڭ ىشكى جان دۇنيەسىنە ءۇڭى­­لىپ، جاڭاشا ىزدەنىسپەن زەردەلەگەن ەڭ­بەكتەرى ۇسىنىلدى.

«قۇلانشى» زاماناۋي ونەر ورتالىعى كۋراتورلىق كەڭەسىنىڭ توراعاسى، ەۋرازيا ونەر اكادەمياسىنىڭ پرەزيدەنتى ءلايلا ماحات ءوز سوزىندە اۆتوردى بۇرىن كەس­كىندەمەشى رەتىندە بىلسە، ەندى گرا­في­كالىق سۋرەتشى رەتىندە جاقىن تانى­عاندىعىن ايتتى.

− ونەردىڭ دامۋ تاريحىنا ۇڭىلسەك، الەۋ­مەتتىك-ەكونوميكالىق نەمەسە سايا­سي وزگەرىستەر سەكىلدى داعدارىس پەن سىناقتار كەزىندە ونەر سالاسىنىڭ ءتۇرلى باعىتتارى دامىپ، جاڭا كەزەڭگە قادام باسقانىن اڭعاراسىز. جەڭىس كاكەن ۇلى دا پاندەميا تۇسىندا جاڭا قىرىنان اشىلا ءتۇستى. سۋرەتشىنىڭ جۇمىستارىنان ونىڭ قولتاڭباسى سەزىلەدى، الايدا تۇستەر مەن شتريحتەردەن وزگەرىس بايقالادى، − دەي كەلىپ، ول اۆتوردى ەۋرازيا ونەر اكادەمياسىنىڭ مۇشەلىگىنە قابىل­دانۋىمەن قۇتتىقتادى.

مادەني ءىس-شارا بارىسىندا اۆتور­دىڭ ءوزى دە وسى ۋاقىتقا دەيىن شىعار­ماشىلىعىنا ۇلتىمىزدىڭ تاريحى مەن مادەنيەتىن، فولكلورىن ارقاۋ ەتىپ كەلسە، بۇل رەتتە جالپى ادامزات بولمىسى مەن قۇندىلىقتارىنا سۇيەنىپ، جان الەمىن بەينەلەۋگە كۇش سالعاندىعىن جەت­كىزىپ، كورمەنى ۇيىمداستىرۋشىلارعا ريزاشىلىعىن ءبىلدىردى.

سوڭعى جاڭالىقتار

جەتى ءتۇرلى ءسوز

ادەبيەت • كەشە

انتىنا ادال ازامات

قازاقستان • كەشە

ەلوردا كۇنىنە تارتۋ

تەاتر • كەشە

ۇقساس جاڭالىقتار