– بۇل ماۋسىمعا جارقىن پرەمەرالار, گاسترولدىك ونەر كورسەتۋلەر جوسپارلانعان, سونىمەن قاتار رەپەرتۋارىمىزداعى كورەرمەن كوزايىمىنا اينالعان سۇبەلى سپەكتالدەر مىندەتتى تۇردە ورىندالادى. ءبىز العاش رەت دەمالىستان كەيىن بالەت ترۋپپاسىنىڭ تولىق قۇرامىمەن جۇرتشىلىققا ەسىگىمىزدى اشامىز, بۇل ءۇشىن شىتىرمان وقيعالى تاقىرىپقا قۇرىلعان, قابىلداۋعا جەڭىل «كورسار» بالەتىن تاڭداپ الدىق. بارلىق ارتىستەر كورەرمەندەرمەن قاۋىشاتىن كۇندى اسقان ىجداھاتتىلىقپەن اسىعا كۇتۋدە. وسى ماۋسىم اۋقىمدى دا مازمۇندى بولادى دەگەن ۇمىتتەمىز, – دەپ پىكىرىمەن ءبولىستى التىناي اسىلمۇراتوۆا.
17 قىركۇيەك كۇنى بيربانتونى ونەرسۇيەر قاۋىمعا ولجاس ماحانبەتاليەۆ ۇسىنادى. تەاتردىڭ جەتەكشى سوليستەرى: قازاقستاننىڭ ەڭبەك سىڭىرگەن قايراتكەرلەرى انەل رۇستەموۆا مەن گاۋحار ۋسينا (مەدورا), ولجاس تارلانوۆ, ارمان ورازوۆ (كونراد) جانە قازاقستاننىڭ ەڭبەك سىڭىرگەن قايراتكەرى ەركىن راحماتوللاەۆ (قۇل الي) وزدەرىنىڭ جارقىن پارتيالارىن ورتاعا سالادى.
بايروننىڭ اتتاس پوەماسىنىڭ جەلىسىمەن جاسالعان كلاسسيكالىق بالەت رەپەرتۋارىنىڭ جاۋھارى ونىڭ رومانتيكالىق جايما-شۋاقتىعىن, ەركىندىك سۇيگىش رۋحىن, كۇشتى قۇشتارلىعىن ساقتايدى. تەڭىز قاراقشىلارى – كورسارلاردىڭ ومىرىنەن الىنعان وقيعالار جەلىسىنە ارنالعان تۋىندى ارتىستەرگە بارلىق پارتيالاردا بالەت تەحنيكاسىمەن دە, درامالىق دارىنىمەن دە جارقىراي ونەر كورسەتۋگە مۇمكىندىك بەرەدى. 1856 جىلى قاڭتاردا پاريجدە وتكەن پرەمەراعا كورەرمەندەر بيلەتتەردى 1,5 ايدان استام ۋاقىت بۇرىن ساتىپ الۋعا تۋرا كەلدى. قويىلىمنىڭ جەتىستىگى وتە زور بولدى, ال ساحنالىق اسەرلەرى تەاترلىق قويىلىمدار تاريحىنداعى ەڭ ۇزدىك دەپ تانىلدى. الەمدىك پرەمەرادان بەرى «كورسار» بالەتى ءوزىنىڭ تانىمالدىلىعىن جوعالتقان جوق.
«ەگەمەن-اقپارات»
