«توتەنشە جاعدايلار مينيسترلىگىنىڭ باسشىسى ەۆگەني زينيچەۆ نوريلسك قالاسىندا اركتيكالىق زونانى توتەنشە جاعدايلاردان قورعاۋ جونىندەگى ۆەدومستۆوارالىق وقۋ-جاتتىعۋ كەزىندە ادام ءومىرىن ساقتاپ قالۋعا ۇمتىلعاندا قايعىلى تۇردە قازا تاپقانىن حابارلايمىز», دەدى مينيسترلىكتىڭ ءباسپاسوز قىزمەتى.
ربك اگەنتتىگىنىڭ حابارلاۋىنشا, وقۋ-جاتتىعۋدى ۆيدەوعا ءتۇسىرىپ تۇرعان وپەراتور جارتاستان تايىپ جىعىلعان. ونى قۇتقارۋعا ۇمتىلعان زينيچەۆ تە تاسقا قۇلاپ, مەرت بولعان. سونداي-اق وپەراتور دا ومىرىمەن قوشتاستى.
RT باس رەداكتورى مارگاريتا سيمونيان ءوزىنىڭ Telegram-كانالىندا ءتۇسىرىلىم توبىنداعى وپەراتوردىڭ دا, زينيچەۆتىڭ دە قايتىس بولعانىن حابارلادى. ەندى توتەنشە جاعدايلار ءمينيسترىنىڭ مىندەتىن ءبىرىنشى ورىنباسار الەكساندر چۋپريان اتقارادى.
زينيچەۆ 55 جاستا ەدى. ول 2018 جىلدىڭ مامىرىنان باستاپ توتەنشە جاعدايلار ءمينيسترى بولعان, سونىمەن بىرگە قاۋىپسىزدىك كەڭەسىنىڭ مۇشەسى. 1987 جىلدان باستاپ زينيچەۆ كگب-دا قىزمەت ەتكەن. كەڭەس وداعى ىدىراعاننان كەيىن دە فەدەرالدى قاۋىپسىزدىك قىزمەتىندە ەڭبەك ەتتى. 2006 جىلدان 2015 جىلعا دەيىن ول پرەزيدەنت ۆ.ءپۋتيننىڭ جەكە اديۋتانتى مىندەتىن اتقاردى.
