قىرىمبەك كوشەرباەۆ فورۋمنىڭ «مەملەكەت, عىلىم مەن بيزنەستىڭ ءوزارا ارەكەتى – ەلدىڭ يننوۆاتسيالىق دامۋىنىڭ نەگىزگى فاكتورى» اتتى پلەنارلىق سەسسياسىندا ءسوز سويلەدى. ءوز سوزىندە ول تاۋەلسىزدىك جىلدارىندا قازاقستاننىڭ تۇڭعىش پرەزيدەنتى – ەلباسى ن.ءا.نازارباەۆتىڭ ساياساتىنىڭ ارقاسىندا قازاقستاندىق عىلىمنىڭ تۇراقتى دامۋىن قامتاماسىز ەتەتىن, جاس عالىمداردى مەملەكەتتىك تۇرعىدان قولداۋدىڭ تەتىكتەرىن جەتىلدىرەتىن ناقتى ءارى ماڭىزدى شەشىمدەر قابىلدانعانىن اتاپ ءوتتى.
مەملەكەتتىك حاتشى زاماناۋي عىلىمدى ىلگەرىلەتۋ, قول جەتكەن جەتىستىكتەرىن ەل ىشىندە كەڭىنەن ناسيحاتتاۋ عىلىمي-تەحنولوگيالىق دامۋدىڭ باسىم باعىتتارىنىڭ ءبىرى ەكەنىن ايتتى. بۇل تاراپتا اتقارىلاتىن جۇمىس از ەمەس. قىرىمبەك كوشەرباەۆتىڭ ايتۋىنشا, عىلىمي-تەحنولوگيالىق جانە يننوۆاتسيالىق باعىتتاعى جۇمىستارعا ۋاقىت تالابىنا ساي وزگەرىس قاجەت. اتاپ ايتقاندا, ۇلتتىق يننوۆاتسيالىق جۇيە قۇرۋ جانە باسقارۋ ىسىنە جاڭا مەحانيزم ەنگىزىلۋى كەرەك.
قىرىمبەك كوشەرباەۆ مەملەكەت باسشىسىنىڭ تاپسىرماسى بويىنشا عالىمداردىڭ عىلىمي الەۋەتىن كوتەرۋ ماقساتىندا الەمنىڭ ىرگەلى عىلىمي ورتالىقتارىندا تاعىلىمدامادان وتۋگە 500 گرانت جانە «جاس عالىم» جوباسى بويىنشا دوكتورانتۋرانى اياقتاعان ازاماتتارعا 1000 گرانت بولۋگە قاتىستى جۇمىستار ءجۇرىپ جاتقانىن مىسال رەتىندە اتاپ ءوتتى.
ءسوز سوڭىندا مەملەكەتتىك حاتشى وسىنداي حالىقارالىق ءىس-شارا ۇيىمداستىرعان نۇرسۇلتان نازارباەۆ قورىنا العىس ايتىپ, فورۋم جۇمىسى وتاندىق عىلىمنىڭ دامۋىنا سەپتىگىن تيگىزەتىنىنە سەنىم ءبىلدىردى.
