«بۇل قۇجات ەلىمىز ءۇشىن وتە ماڭىزدى. وسى سۋ باسسەيىنىندەگى ەكولوگيالىق ءارى بيولوگيالىق رەسۋرستارىن ساقتاۋ ماسەلەسى وزەكتى. سەبەبى كاسپي تەڭىزىندە كومىرسۋتەگى شيكىزاتىنىڭ ءىرى قورى بار. قورشاعان ورتانى قورعاۋ سالاسىنداعى ىنتىماقتاستىقتى نىعايتۋ ماقساتىندا قازاقستان نەگىزدەمەلىك كونۆەنتسياعا قاتىستى بىرقاتار حاتتامالارعا قول قويدى. سولاردىڭ ءبىرى – كاسپي ماڭى مەملەكەتتەرى 2018 جىلعى 20 شىلدەدەگى ماسكەۋدە قول قويعان قورشاعان ورتاعا اسەردى باعالاۋ جونىندەگى حاتتاما», دەدى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.
اتالعان قۇجاتتى ازەربايجان, يران, قازاقستان, رەسەي جانە تۇرىكمەنستان ەلدەرى قابىلداعان.
ءمينيستردىڭ ايتۋىنشا, حاتتامانى رەتتەۋگە جاتاتىن قىزمەت تۇرلەرىنە: مۇناي وڭدەۋ زاۋىتتارى, جىلۋ قۋاتى 300 مەگاۆاتت نەمەسە ودان جوعارى جىلۋ ەلەكتر ستانتسيالارى مەن باسقا دا جاعۋ قوندىرعىلارى, اتوم ەلەكتر ستانتسيالارى, اۆتوموبيل جولدارىن سالۋ, رەكونسترۋكتسيالاۋ جانە كەڭەيتۋ جاتادى.
سونىمەن قاتار كونۆەنتسيا ەرەجەلەرىن ىسكە اسىرۋ ءۇشىن جاڭا ەكولوگيا كودەكسىندە ترانسشەكارالىق ەكولوگيالىق اسەردى رەتتەۋ, ولاردى جۇزەگە اسىرۋ ءتارتىبى, قۇقىقتارى مەن مىندەتتەرى قاراستىرىلعان.
ءمينيستردىڭ مالىمدەۋىنشە, قوعامدىق تىڭداۋلاردا كوتەرىلگەن ماسەلەلەر بويىنشا تۇپكىلىكتى شەشىمدى قورشاعان ورتانى قورعاۋ سالاسىنداعى ۋاكىلەتتى ورگان قابىلدايدى.
«حاتتامانى راتيفيكاتسيالاۋ تەرىس الەۋمەتتىك-ەكونوميكالىق, قۇقىقتىق, ەكولوگيالىق سالدارعا اكەپ سوقتىرمايدى. رەسپۋبليكالىق بيۋدجەتتەن قوسىمشا قارجىلىق شىعىنداردى قاجەت ەتپەيدى», دەدى ۆەدومستۆو باسشىسى.
