ەسىمى ەل ۇرانىنا اينالعان «دومالاق انا» ومىردە بولعان ادام, شىن ەسىمى – ءنۇريلا ميزامبەكقىزى. تاريحي دەرەكتەردە ول كىسىنى VI-VII عاسىرلار توعىسىندا ءومىر سۇرگەن دەپ ايتادى. ون توعىز جاسىندا بايدىبەك بيگە تۇرمىسقا شىعادى. جۇرتقا دانالىعىمەن, دارالىعىمەن جانە ەرەكشە قاسيەتىمەن سىيلى بولعان اۋليە انادان تاراعان ۇرپاقتارىنىڭ ءبارى ەل بيلەگەن. سوندىقتان دا جاڭا شىعارماداعى ارداقتى انا بەينەسى ايشىقتى كوركەمدەلىپ, تەرەڭ سيپاتتالعان. باس كەيىپكەر – ءنۇريلا پارتياسىن الەمگە تانىمال وپەرا ءانشىسى, مەملەكەتتىك سىيلىقتىڭ لاۋرەاتى مايرا مۇحامەدقىزى جەرىنە جەتكىزە ورىنداپ, اسقاق داۋىسىمەن انا ماحابباتىنىڭ كۇشىن سەزىندىرە ءبىلدى. ايتا كەتەيىك, بيىلعى قاڭتار ايىندا تالانتتى تۇلعا جوعارىدا اتالعان ونەر ۇجىمىنا باسشى بولىپ كەلگەنى ءمالىم.
سونداي-اق بايدىبەك بي رولىندەگى جۇمابەك قاڭتارباەۆتىڭ ونەرى دە ەشكىمدى بەيجاي قالدىرمادى. حازىرەت پارتياسىن ايبەك قاناتبەك پەن مارات ورازمەتوۆ كوركەم سومدادى. تۋىندىداعى ماراۋ حانىم (بايبىشە) ءرولىن مەتستسو-سوپرانو, قازاقستاننىڭ ەڭبەك سىڭىرگەن قايراتكەرى دينا حامزينا ورىنداسا, زەرىپ حانىمدى (بايبىشە) مايگۇل ميكيجانوۆا كەلىستى وينادى. سونىمەن قاتار وپەراداعى حور جانە بالەت ارتىستەرىنىڭ ۇيلەسىمدىلىگىن دە ايرىقشا ايتۋعا بولادى, ولار شىعارماداعى كىشىگىرىم كەيىپكەرلەردى بەينەلى جەتكىزدى.
جاڭا پرەمەرانىڭ ليبرەتتوسىن قازاقستاننىڭ ەڭبەك سىڭىرگەن قايراتكەرى, دارىندى رەجيسسەر اسحات ماەميروۆ اق پاراققا تۇسىرسە, مۋزىكاسىن بەلگىلى كومپوزيتور تاسقىن جارمۇقامەت جازعان. سونىمەن بىرگە شىمكەنت سيمفونيالىق وركەسترىنىڭ ديريجەرى ءمادي ومىرزاقتىڭ ەڭبەگىن دە ەرەكشە ايتقان ءجون. اسىرەسە ۇلتتىق ناقىشپەن تىگىلگەن كوستيۋمدەر مەن دەكوراتسيالار قويىلىم قاھارماندارىن وتكەن داۋىرگە جاقىنداتا ءتۇستى. ءبىر سوزبەن ايتقاندا, ميحايل پاندجاۆيدزە مەن قايرات ق ۇلىنشاقوۆتىڭ رەجيسسەرلىك شەبەرلىگى – كورەرمەندەردى جىلى سەزىمگە بولەدى.
