TOKYO2020 • 07 قىركۇيەك، 2021

قىرىمبەك كوشەرباەۆ جەڭىمپازداردى ماراپاتتادى

85 رەت كورسەتىلدى

قر مەملەكەتتىك حاتشىسى قىرىمبەك كوشەرباەۆ توكيو پاراليمپياداسىنىڭ جەڭىمپازدارى مەن جۇلدەگەرلەرىن ماراپاتتاۋ راسىمىنە قاتىستى، دەپ جازادى Egemen.kz.

قر پرەزيدەنتى قاسىم-جومارت توقاەۆتىڭ جارلىعىمەن داۆيد دەگتيارەۆ III دارەجەلى «بارىس» وردەنىمەن، زارينا بايباتينا، تەمىرجان داۋلەت، ءانۋار ساريەۆتەر «پاراسات» وردەنىمەن، نۇرداۋلەت جۇماعالي «قۇرمەت» وردەنىمەن ماراپاتتالدى.

قر مەملەكەتتىك حاتشىسى قىرىمبەك كوشەرباەۆ جاپونيا استاناسى توكيودا وتكەن XVI جازعى پاراليمپيادا ويىندارىنا قاتىسقان سپورتشىلارمەن كەزدەسىپ، ولارعا مەملەكەتتىك ناگرادا مەن قارجىلاي سەرتيفيكات تابىستادى.

«كەشە عانا تورتكۇل دۇنيە ەرەن ەرىك-جىگەردىڭ، تەمىردەي ءتوزىمنىڭ، ومىرگە قۇشتارلىقتىڭ كۋاسى بولدى. جاراتقان ادامنىڭ مۇمكىندىگىن شەكتەگەنىمەن، نيەتىن شەكتەمەيتىنىن كوزىمىزبەن كوردىك. توكيودا وتكەن پاراليمپيادا ويىندارىندا تاعدىردان تەپەرىش كورگەن جانداردىڭ ەرلىگىنە جەر ءجۇزى تىك تۇرىپ قۇرمەت كورسەتتى. ولاي بولۋى زاڭدىلىق ەدى. ويتكەنى ولار تەپسە تەمىر ۇزەتىن، ون ەكى مۇشەسى ءدىن-امان، دەنى ساۋ كەي ادامدار جەتە الماعان جەتىستىككە جەتىپ، بەلەستى باعىندىرىپ، جەڭىس تۋىن جەلبىرەتتى. راسىندا، بۇل قانداي قۇرمەتكە دە، قوشمەتكە دە لايىق ارەكەت»، دەدى قىرىمبەك ەلەۋ ۇلى.

سونىمەن قاتار توكيو پاراليمپياداسى ەلىمىز ءۇشىن اسا تابىستى بولعانىن، ءدۇبىرلى دودادا قازاقستاندىق سپورتشىلار 5 مەدال يەلەنىپ، ەلىمىز ءۇشىن رەكوردتىق كورسەتكىش ورناتقانىن اتاپ ءوتتى.

قىرىمبەك كوشەرباەۆ ءىس-شارا بارىسىندا التىن مەدال العان داۆيد دەگتيارەۆكە - 106 ميلليون تەڭگە، كۇمىس مەدالگە يە بولعان زارينا بايباتينا، تەمىرجان داۋلەت، ءانۋار ساريەۆتەرگە - 63 ميلليون تەڭگە، قولا جۇلدەگەر اتانعان نۇرداۋلەت جۇماعاليگە 31 ميلليون تەڭگە قارجىلاي سىياقى تابىستادى.

سالتاناتتى ءىس-شاراعا پرەمەر-ءمينيستردىڭ ورىنباسارى ەرالى توعجانوۆ، مادەنيەت جانە سپورت ءمينيسترى اقتوتى رايىمقۇلوۆا قاتىستى.

جيىن سوڭىندا قازاقستان سپورتشىلارىنىڭ اتىنان داۆيد دەگتيارەۆ پەن تەمىرجان داۋلەت ءسوز سويلەپ، مەملەكەت باسشىسىنا العىس ايتتى.

سوڭعى جاڭالىقتار

بۇۇ-نىڭ جاھاندىق شارتىنا قوسىلدى

ەكونوميكا • بۇگىن، 00:34

جەتى ءتۇرلى ءسوز

ادەبيەت • كەشە

انتىنا ادال ازامات

قازاقستان • كەشە

ەلوردا كۇنىنە تارتۋ

تەاتر • كەشە

ۇقساس جاڭالىقتار