جازعى لاگەردىڭ اشىلۋىنا قر پارلامەنتى ءماجىلىسىنىڭ دەپۋتاتى, ۇلتتىق ەرىكتىلەر جەلىسىنىڭ توراعاسى ۆەرا كيم, قر اقدم ازاماتتىق قوعام ىستەرى كوميتەتىنىڭ توراعاسى ماديار قوجاحمەت, «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ باسقارما توراعاسى اسىلبەك ەسەنباەۆ قاتىستى.
اسىلبەك ەسەنباەۆ مەملەكەت باسشىسى قاسىم-جومارت توقاەۆتىڭ باستاماسى بويىنشا قازاقستاندا 2020 جىل ۆولونتەر جىلى دەپ جاريالانعانىن اتاپ ءوتتى.
«قر پرەزيدەنتى ۆولونتەرلىكتى تەك ۇلتتىق دەڭگەيدە عانا ەمەس, ءاربىر قالا مەن اۋىلدا دامىتۋ قاجەتتىگىن بىرنەشە رەت اتاپ ءوتتى. بۇل مەملەكەتتىڭ ۆولونتەرلىك ينستيتۋتىن جۇيەلى, جاڭا دەڭگەيگە شىعارۋعا مۇددەلى ەكەنىن بىلدىرەدى. ول ءۇشىن بىزدە ۇلكەن الەۋەت بار», دەدى ول.
ققدي باسقارما توراعاسى وتكەن جىلعى پاندەميا تەك ەل ءۇشىن عانا ەمەس, حالىق ءۇشىن دە قيىن سىناق بولدى دەگەن پىكىرىمەن ءبولىستى. ءتۇرلى الەۋمەتتىك زەرتتەۋلەر مەن باعالاۋلار بويىنشا سول ءبىر كۇردەلى كەزەڭدە قازاقستاندىقتاردىڭ 45%-عا جۋىعى ۆولونتەر بولۋعا دايىن بولعان ەكەن. اسىلبەك ەسەنباەۆ ۆولونتەرلىك ۇيىمداردىڭ باسشىلارىنا ۆولونتەرلىكتى قولداۋ بويىنشا «رۋحاني جاڭعىرۋ» ققدي جۇرزىگىپ جاتقان جۇيەلى قىزمەتى تۋرالى بايانداپ بەردى.
سونداي-اق, قر اقدم ازاماتتىق قوعام ىستەرى كوميتەتىمەن بىرلەسىپ ىسكە اسىرىلاتىن «Birgemiz: áreket ýaqyty» جوباسى اياسىندا تابىستى وڭىرلىك ۆولونتەرلىك جوبالاردىڭ جيناعى دا ازىرلەنىپ جاتىر. «رۋحاني جاڭعىرۋ» قازاقستاندىق قوعامدىق دامۋ ينستيتۋتى ۇلتتىق ۆولونتەرلىك جەلىنىڭ كومەگىمەن www.qazvolunteer.kz.بىرىڭعاي ونلاين-پلاتفورماسىندا «جىل ۆولونتەرى» حالىقارالىق سىيلىعىن وتكىزەدى.
سونىمەن قاتار, ققدي ساراپشىلارىنىڭ كومەگىمەن ەرىكتىلىكتى قولداۋ ستاندارتىن ازىرلەۋ بويىنشا تالداۋ جۇمىستارى ءجۇرىپ جاتىر. جىل سوڭىنا قاراي, حالىقارالىق ەرىكتىلەر كۇنىنە وراي ەكى كۇندىك كونفەرەنتسيا وتەدى. ءىس-شارا شەڭبەرىندە ۆولونتەرلىك ۇيىمدار جۇمىسىنىڭ, باستامالاردى ىسكە اسىرۋدىڭ قورىتىندىسى شىعارىلىپ, ۆولونتەرلىك ينستيتۋتىڭ دامۋىنىڭ بولاشاق باعىت-باعدارى بەلگىلەنەدى دەپ جوسپارلانعان.
«سونىمەن قاتار, ۆولونتەرلەردى دايارلاۋدىڭ نەگىزگى باعىتتارى بويىنشا «ۆولونتەرلەردى دايارلاۋدىڭ بىرىڭعاي باعدارلاماسى جوباسىن» ازىرلەۋ ماڭىزدى», دەپ حابارلادى اسىلبەك ەسەنباەۆ.
ۆولونتەرلىك ۇيىم باسشىلارىنا ارنالعان جازعى مەكتەپ 9 قىركۇيەككە دەيىن جۇمىس ىستەيدى. جازعى لاگەر اياسىندا قاتىسۋشىلار كوماندالىق ترەنينگتەر مەن كەشەندى وقىتۋ جۇمىستارىنان وتەدى.
