اتامدى ارداق تۇتامىن

ۇلى وتان سوعىسىنىڭ سۇراپىل جىلدارىن باسىنان كەشىرگەن حالىق ءۇشىن جەڭىس مەرەكەسىنىڭ ورنى ايرىقشا ەكەنىن ايتىپ جاتۋدىڭ ءوزى ارتىق سەكىلدى. ۇلى جەڭىستى اپەرگەن ارداگەرلەرىمىز ماڭگى ءبىزدىڭ جادىمىزدا. وسىنداي ەرلىك پەن ورلىكتىڭ سيمۆولىنا اينالعان ادامداردىڭ ءبىرى مەنىڭ اتام – ءبيمالي ەسماحانوۆ. ب.ەسماحانوۆ اقتوبە وبلىسى, ىرعىز اۋدانىنىڭ قاراقۇم اۋىلىندا دۇنيەگە كەلگەن. مەن ءبيما­لي اتام مەن بيباتپا اجەم­نىڭ وتىز ءبىر نەمەرەسىنىڭ ۇلكەنى­مىن. بالالىق شاعىم سول كىسىلەر­دىڭ كوز الدىندا ءوتتى. اتامنىڭ ءومىر جولى مەن وتانعا, اناعا, جارعا جانە بالاعا دەگەن ءسۇيىس­پەنشىلىگى سياقتى ادامي قاسيەتتەرى مەنى ءاردايىم يگىلىكتى ىستەرگە جىگەرلەندىرىپ وتىردى. قازىرگى تاڭدا جاستارعا ايتىپ جۇرگەن پاتريوتيزم, ەل مەن جەردى ءسۇيۋ, ۇلكەندى قۇرمەتتەپ, كىشىگە قام­قورلىق كورسەتۋ سەكىلدى قاسيەت­تەردىڭ بارلىعى ءبيمالي اتامنىڭ ءومىر جولىنان كەزدەسەدى. مەن دە ەس كىرگەلى وسىنداي قاسيەتتەردى بويىما سىڭىرۋگە تىرىسىپ باقتىم. باستان وتكەرگەن قيىندىقتارىن ەستىگەندە سول ۋاقىتتاعى بۇكىل قازاق حالقىنىڭ قيىن-قىستاۋ تىرشىلىگى كوز الدىڭىزعا ەلەستەيدى. اتام ەكى سوعىسقا دا قاتىسقان كىسى. اسكەرگە شاقىرىلىسىمەن-اق اتاقتى فين ۇرىسىنا قاتىسادى. ودان ەلگە قايتام با دەپ ءجۇر­گەنىندە ۇلى وتان سوعىسى باستا­لىپ كەتە بارادى. قولىنا قارۋ ۇستاعان قالپى مايداننىڭ العى شەبىنە اتتانعان. كوپتەگەن اۋىر شايقاستارعا قاتىسىپ, قارۋلاس دوستارىنا ەرلىكتىڭ ۇلگىسىن كور­سەتەدى. قازاق بالاسى دەگەن سوزگە كىر كەلتىرمەپتى. مۇز جاس­تانىپ, قار جامىلعان جىلدارى جونىندە اتام اڭگىمە ايتقاندا تەبىرەنىپ كەتەتىن. ميلليونداعان ادامنىڭ قازا بولعاندىعى جانىنا باتاتىن. سوعىستىڭ اتى سوعىس, بۋگۋلمە قالاسى ماڭىنداعى سۇراپىل شاي­قاس كەزىندە اتام اۋىر جارالا­نىپ, ارتىنشا اسكەردەن بوساتىلادى. ءىىى دارەجەلى ۇلى وتان سوعىسى وردەنىنە, بىرنەشە مەدال­دارعا يە بولعان. ءبيمالي اتام ەلگە ورالعان سوڭ دا وتانىنا پايداسىن كەلتىرۋگە كىرىستى. مەكتەپتە اسكەري دايىن­دىق پانىنەن ءدارىس وقىپ, وقۋشى­لاردى قاسيەتتى وتاندى سۇيۋگە, ونى قورعاي بىلۋگە تاربيەلەدى. بىراق, جان الىسىپ, جان بەرىسىپ جاتقان اۋىر كەزەڭدە اتام مۇنداي جۇمىس­­تى وزىنە قول كورمەي, سوعىس ماي­دانىنا جاراماسام, وندا ەڭبەك مايدانىنا بارامىن دەپ بەرشۇگىر ستانساسىنىڭ ماڭىنداعى كومىر شاحتاسىنا جۇمىسقا كەلەدى. سو­عىس­تىڭ قيىن جىلدارى. قورعا­نىس ونەركاسىبىنە كومىردىڭ اسا قاجەت­تىلىگىن اتام جان-تانىمەن تۇسىنە بىلگەن ەكەن. وندا دا ەڭبەك ەتۋدىڭ ۇلگىسىن كورسەتىپ, ازعانتاي ۋاقىت­تىڭ ىشىندە قاتارداعى كەن قازۋ­شى­دان كەنىشتىڭ باس ينجەنەرى دارەجەسىنە دەيىن كوتەرىلگەن. وسى ەڭبەك اتامدى بيىكتەرگە كوتەردى. باقىت پەن قۋانىش سىيلادى. كەنىشتە ءجۇرىپ مەنىڭ اجەم بيباتپامەن تانىسىپ, ەكەۋى شاڭىراق كوتەرەدى. بەرەكەلى ۇلكەن وتباسىعا اينالادى. ارىستان, بالاپان, اسان, اسەم, ۇسەن, حاسەن, ەسەن, ەسەنگەلدى, ايتبەك ەسىمدى بالالارى دۇنيەگە كەلدى. قىزمەتى اۋىسىپ ىشكى ىستەر ورگانىنا كەلگەن اتام مۇندا دا قۇرمەت-بەدەلسىز بول­ما­دى. اتام جونىندە اقتوبەلىك لەسبەك ءىزبانوۆ سەكىلدى ءارىپ­تەستەرى ءاردايىم جىلى سوزبەن ەسكە الادى. ءوسىپ-ونگەن وتباسى دەپ ايتىپ جاتادى. وسىلايشا ادال ەڭبەكتىڭ ارقاسىندا اتام­نىڭ ۇرپاقتارى ەل سىيلايتىن ءبىر قاۋىم ەلگە اينالدى. بالا-شاعالارى ءارتۇرلى قىزمەت­تەردە ابىرويلى ەڭبەك ەتۋدە. ۇلى جەڭىستى جاقىنداتىپ, ۇرپاقتارى ءۇشىن قان توككەن اتالارىمىزدىڭ قاتارى كۇن ساناپ سيرەپ كەلەدى. ارداقتى اتام 1997 جىلدىڭ 27 قاڭ­تارىندا 78-گە قاراعان شاعىندا ماڭگىلىككە كوز جۇمدى. ۇلى جەڭىستىڭ 65 جىلدىعى قار­ساڭىن­دا مەنىڭ اتام ءبيمالي ەسماحانوۆ سەكىلدى جەڭىس كۇنىن جاقىنداتۋعا ۇلەس قوسقان بار­لىق ارداگەرلەرگە شىن كوڭىلدەن باس ءيىپ قۇتتىقتاعىم كەلەدى. ارامىزدا امان-ساۋ جۇرە بەرىڭ­دەرشى, ارداگەرلەر! گۇلجان ەسماحانوۆا. استانا.