Mangystaumedia.kz سايتىندا جاريالانعان مالىمەتتە بەينەۋ اۋداندىق سوتىندا قر قىلمىستىق كودەكسىنىڭ 292-بابىنىڭ 2-بولىگىمەن,156-بابىنىڭ 2-بولىگىمەن قىلمىستىق قۇقىق بۇزۋشىلىقتى جاساعانى ءۇشىن جۇك ۆاگونىنىڭ باستىعى ۋ-عا قاتىستى قىلمىستىق ءىس قارالعانى جايلى جازىلعان.
سوتتالۋشى ۋ. ارىپتەستەرىمەن بىرگە 13 جەلتوقسان 2020 جىلى ماڭعىستاۋ ستانتسياسىنان «ماڭعىستاۋ-اقتوبە» باعىتىنداعى جولاۋشىلار پويىزىنا جالعانعان تسيفرلىق پوشتالىق جۇك ۆاگونىمەن ءىس-ساپارعا شىققان. پوشتالىق جۇك ۆاگونىنىڭ ىشىنە ءوزى جاۋاپتى بولا تۇرا, ەڭبەك قاۋىپسىزدىگى جانە ەڭبەكتى قورعاۋ نۇسقاۋلىقتارىن ساقتاماعان. اتاپ ايتقاندا, ۆاگون ىشىنە وزدەرى اس پىسىرۋگە ارنالعان شاعىن 5 ليترلىك گاز بالونى مەن شاعىن گاز پەشىن قولدانىپ, نۇسقاۋلىق تالاپتارىن ورەسكەل بۇزىپ, ءوز كەزەكشىلىكتەرىندە اس ازىرلەگەن. ناتيجەسىندە, گاز بالونى جارىلىپ, ءورتتىڭ سالدارىنان پوشتا ۆاگونى ىشىندەگى بارلىق ادامدار دەنە جاراقاتىن الىپ, بەينەۋ اۋداندىق ورتالىق اۋرۋحاناسىنا ورنالاستىرىلعان. ال, جولسەرىك م. بەينەۋ اۋداندىق اۋرۋحاناسىنىڭ جانساقتاۋ بولىمىندە ورتتەن العان دەنە جاراقاتى سالدارىنان قايتىس بولعان, دەلىنگەن بەينەۋ اۋداندىق سوتىنىڭ ءباسپاسوز قىزمەتى تاراتقان اقپاراتتا.
باستى سوت تالقىلاۋىندا سوتتالۋشى ۋ. وزىنە تاعىلعان ايىپتى تولىقتاي مويىنداپ, جابىرلەنۋشىلەردەن كەشىرىم سۇراپ, باس بوستاندىعىنان ايىرمايتىن جەڭىل جازا تاعايىنداۋدى سۇرادى.
سوت ۇكىمىمەن ۋ. قر قىلمىستىق كودەكسىنىڭ 292-بابىنىڭ 2-بولىگىمەن, قك-ءنىڭ 156-بابىنىڭ 2-بولىگىمەن كىنالى دەپ تانىلىپ, وعان 2 جىل مەرزىمگە باس بوستاندىعىن شەكتەۋ جازاسى جانە تەمىر جول سالاسى مەن پوشتا قىزمەتىمەن اينالىسۋ قۇقىعىنان ەكى جىل مەرزىمگە ايىرۋمەن بىرگە, 100 ساعاتقا قوعامدىق جۇمىستارعا تارتۋ جازاسى تاعايىندالدى. سوت ۇكىمى زاڭدى كۇشىنە ەنگەن جوق.
ايتا كەتەيىك, 14 جەلتوقساندا «ماڭعىشلاق-اقتوبە» جولاۋشىلار پويىزىنىڭ جۇك تاسىمالداۋ ۆاگونىنان ءورت شىققان.
