«باس قالادا بيىل الەۋمەتتىك ماڭىزى بار ازىق-ت ۇلىك ونىمدەرىنىڭ باعاسىن تۇراقتاندىرۋ ماقساتىندا 14 جارمەڭكە وتكىزۋ جوسپارلانعان. سونىمەن قاتار كوكونىس, جەمىس-جيدەكتەردىڭ پىسەتىن ۋاقىتىن ەسكەردىك. ءۇشىنشى رەت ۇيىمداستىرىلعان ءداستۇرلى جارمەڭكەگە شىعىس قازاقستان وبلىسىنىڭ 15 اۋدانى مەن 2 قالاسىنان قۇنى 500 ميللون تەڭگەگە جۋىق اۋىلشارۋاشىلىق ونىمدەرى اكەلىندى. تۇرعىندار بەلسەندىلىك تانىتىپ, جارمەڭكەگە تاڭعى 7-دەن جينالىپتى, نەگىزى 8:00-دە باستالۋى كەرەك ەدى. قازىر ساۋدا قىزىپ تۇر. بارلىق تاۋار ەش قيىندىقسىز ءارى سانيتارلىق تالاپتارعا ساي جەتكىزىلدى. جارمەڭكەگە كەلۋشىلەردىڭ سانيتارلىق-ەپيدەميالىق تالاپتاردى ساقتاۋى باقىلانادى. سونداي-اق اشىق بازاردا ساۋداگەرلەر مەن تۇتىنۋشىلاردىڭ ماسكا تاعىپ, الەۋمەتتىك قاشىقتىقتى ساقتاۋى دا قاداعالانادى», – دەدى ينۆەستيتسيالار جانە كاسىپكەرلىكتى دامىتۋ باسقارماسى باسشىسى ەرجان بالتاەۆ.
شىعىستان جەتكىزىلگەن ازىق-ت ۇلىكتىڭ قاتارىندا ەت جانە ءسۇت ونىمدەرى, بال, بالىق, جەمىس-جيدەك پەن كوكونىستەر, شۇجىق ونىمدەرى, كۇنباعىس مايى, ءۇن-جارما, ءتۇرلى داقىلدار بار. باعاسىنا توقتالساق, جىلقى ەتىنىڭ 1 كەلىسى – 2000-2400 تەڭگە, تاۋىق ەتىنىڭ 1 كەلىسى 900-1000 تەڭگە ارالىعىندا. بالىق باعاسى 1000-1800 تەڭگە, كارتوپ, قىرىققابات, پياز كەلىسى 120 تەڭگەدەن, ال ءسابىزدىڭ كەلىسى 130 تەڭگە. جالپى, ەلورداعا 30-عا جۋىق ءونىم ءتۇرى جەتكىزىلگەن.
«نۇر-سۇلتان قالاسىنىنىڭ تورىندە جايماشۋاق اۋا رايىندا ءوتىپ جاتقان جارمەڭكە حالىقتىڭ كوڭىلىنەن شىعىپ جاتىر. جارمەڭكەگە 45 توننا جىلقى ەتىن اكەلدىك. بىزدە وكىنىشكە قاراي, ۆاكتسيناتسيا ايماعى دەگەن بار. شىعىس قازاقستان سوعان كىرەتىندىكتەن سيىر, قوي ەتىن ساتا المايمىز. مالعا ۆاكتسينا سالدىرعاننان كەيىن ونى اكەلۋگە رۇقسات جوق. ەلوردالىقتار جىلقى ەتىن جاقسى ساتىپ الىپ جاتىر. سونىمەن قاتار 40 توننا بال, 100 توننا كارتوپ اكەلىپ وتىرمىز. ءبىزدىڭ باستى ماقساتىمىز – اقشا تاۋىپ قالۋ ەمەس, ءوز ونىمدەرىمىزدى, اۋدان برەندتەرىن استانالىقتارعا ۇسىنۋ», – دەدى شىعىس قازاقستان وبلىسى اكىمىنىڭ ورىنباسارى ەرجان نۇرباەۆ.
جارمەڭكەگە ءوز تاۋارلارىن ساتۋعا كەلگەندەر جانە ونى ارزان باعامەن ساتىپ العاندار دا ريزا. مالينا جاشىگىن كوتەرگەن اعامىزدى سوزگە تارتىپ ەدىك, توساپ قايناتۋ ءۇشىن الىپ جاتقانىن ايتىپ, باعاسىنىڭ دا ايتارلىقتاي ارزان ەكەنىن جەتكىزدى.
«وسى جارمەڭكەنى ارنايى كۇتتىك. مۇندا بارلىق قاجەتتى ونىمدەر ۇسىنىلعان. بۇگىنگى جارمەڭكە كوڭىلىمىزدەن شىعىپ وتىر. مۇنداعى كەيبىر تاۋار باعاسى قارا بازاردان الدەقايدا ارزان ەكەن. قىسقا ازىق دايىنداۋ كەرەك قوي, بانكى جابۋ ءۇشىن جەمىس-جيدەك, كوكونىستەردى جارمەڭكەدەن الماساڭ, دۇكەندەردەگى باعا باسقا. ەت, ءسۇت ونىمدەرىن الدىم. ەلوردادا جىل سايىن وسىنداي جارمەڭكەلەر وتكىزىلەتىنىنە, بۇل جۇمىستار بولاشاقتا دا جالعاسا بەرەتىنىنە قۋانىشتىمىن», – دەدى قالا تۇرعىنى سەرىك كۇمىسبەكوۆ.
ايتا كەتەيىك, نۇر-سۇلتاندا اۋىل شارۋاشىلىعى وڭىرلىك جارمەڭكەلەرىنىڭ ماۋسىمى 31 قازانعا دەيىن جالعاسادى.
