بۇل تۋرالى «استانا» تەلەارناسى مالىمدەدى.
اتا-انالار بالالارىن بۇرىنعى مەكتەپكە قايتارۋدى تالاپ ەتۋدە. ويتكەنى بۇل عيماراتتا بۇعان دەيىن تۋبەركۋلەزبەن اۋىرعان ناۋقاستاردىڭ بالالارى ءبىلىم العان. جاۋاپتىلار بيىل ولاردى ۇيلەرىنە قايتارىپ, 20-شى مەكتەپتىڭ مىڭعا جۋىق وقۋشىسىن قابىلدادى. اتا-انالار, ءبىلىم باسقارماسىنىڭ شەشىمىن قۇپتامايدى.
«مەنىڭ بىلۋىمشە, كوح تاياقشاسى جەر بەتىندە 40 جىل تىرشىلىك ەتەدى. بۇرىن وسىندا وقىعان بالالار جىل سايىن ەم قابىلدادى. عيماراتتىڭ ەدەنىنە اعاش توسەلگەن, لينولەۋمى دە ەسكى. ويىن بالاسى جۇگىرمەي تۇرمايدى. سول كەزدە شاڭ كوتەرىلىپ, اۋرۋ قوس وكپەدەن قىسا ما دەپ قورقامىز», دەيدى قالا تۇرعىنى لاريسا نيزوۆتسەۆا.
اتا-انالاردىڭ بالالارىن مەكتەپكە جىبەرمەۋىنە وسىنداي كۇدىك سەبەپ بولىپ وتىر. قازىر ولار عيماراتقا زارارسىزداندىرۋ جۇمىستارىن جۇرگىزىپ, كۇردەلى جوندەۋ جۇمىستارىن تالاپ ەتىپ, جاۋاپتى ورىنداردىڭ تابالدىرىعىن توزدىرىپ ءجۇر.
ورال قالالىق ءبىلىم بەرۋ ءبولىمىنىڭ باسشىسى اقجارقىن تەمىرحانوۆا ول مەكتەپتە تۋبەركۋلەزبەن اۋىرعان بالالار بولماعانىن ايتادى. جانە مەكتەپتە تۋبەركۋلەزبەن اۋىرعان بالالار ءبىلىم الىپ, ينفەكتسيا ەدەندە قالاتىن بولسا, وبلىستىق سانەپيدەميولوگيالىق, وبلىستىق تۋبديسپانسەر مۇندا مەكتەپتى كوشىرۋگە رۇقسات بەرمەس ەدى.
«ولار وزدەرى جاۋاپكەرشىلىكتى الىپ, بىزگە رۇقساتىن بەرىپ وتىر. ءبىلىم بەرۋ ءبولىمىنىڭ دەرەگىنشە, بالاسىن مەكتەپكە جىبەرمەي وتىرعان اتا-انا سانى ساۋساقپەن سانارلىق قانا. ولارمەن ەندى ءتۇسىندىرۋ جۇمىستارىن جۇرگىزىپ كورمەكشى. وقۋ جىلى باستالىپ كەتسە دە, ماسەلەنىڭ قالاي شەشىلەرى ازىرگە بەيمالىم», دەيدى ول.
