ءبىلىم • 03 قىركۇيەك، 2021

«كاسىبي باعدار» جوباسى: 20 مىڭنان استام وقۋشى بولاشاق ماماندىعىن انىقتادى

ەلىمىزدىڭ بارلىق وڭىرلەرىنەن ورتا مەكتەپتەردىڭ 20 586 وقۋشىسى «كاسىبي باعدار» جوباسى اياسىندا 5 باعىت بويىنشا 85 ءتۇرلى ترەنينگتەن ءوتتى: ء«تيىمدى كوممۋنيكاتسيالار، شەشەندىك شەبەرلىك»، «جوبالىق ويلاۋ»، «كاسىبي باعدارلاۋ جانە مانساپتىق تراەكتوريانى قۇرۋ»، «ەموتسيونالدى ينتەللەكت»، «كوماندالىق جۇمىس».

Egemen Qazaqstan

ترەنينگكە قاتىسۋشىلار جوبالىق مەنەدجمەنت، جوبالاردى باسقارۋ، بيۋدجەتتىك جوسپارلاردى قۇرۋ نەگىزدەرىمەن تانىسىپ، شەشەندىك ونەر بويىنشا ءوز داعدىلارىن جەتىلدىردى، سونداي-اق ءوز قابىلەتتەرى مەن ماقسات-مۇددەلەرىن ەسكەرە وتىرىپ ۋاقىت ۇردىستەرىنە سايكەس ماماندىق تاڭداۋ بويىنشا شەشىم قابىلداۋ داعدىلارىن مەڭگەردى.

جوبانىڭ باستى ماقساتى – قازىرگى زاماندا سۇرانىسقا يە ماماندىقتارعا جاستاردىڭ داعدىلارى مەن بەيىمدىلىگىن ارتتىرۋ. جىل سوڭىنا دەيىن EduNavigator كاسىبي باعدار بەرۋ پلاتفورماسى بازاسىندا ونلاين-رەجىمدە ورتا مەكتەپتەردىڭ كەمىندە 20 مىڭ وقۋشىسىنا پسيحولوگيالىق دياگنوستيكا مەن تەستىلەۋ جۇرگىزۋ جوسپارلانۋدا. سونىمەن قاتار جوبا اياسىندا ەكونوميكانىڭ جەتەكشى سالالارىنىڭ ماماندارىمەن جانە قازاقستان مەن شەتەل ۋنيۆەرسيتەتتەرىنىڭ جەتەكشى جوعارى وقۋ ورىندارىنىڭ تۇلەكتەرىمەن ونلاين-كەزدەسۋلەر وتكىزىلىپ، ماماندىق تاڭداۋ ماسەلەلەرىنە ارنالعان بەينەروليكتەر ازىرلەندى.

جوبانىڭ نەگىزگى سەرىكتەستەرى – قازاقستان رەسپۋبليكاسى پرەزيدەنتىنىڭ «بولاشاق» حالىقارالىق ستيپەندياسى تۇلەكتەرىنىڭ قاۋىمداستىعى، BTS Education جانە International Academy of Emotional Intelligence كومپانيالارى. ەسكە سالا كەتەيىك، «كاسىبي باعدار» جوباسىن «ازاماتتىق جانە قۇقىقتىق باستامالاردى دامىتۋ» قوعامدىق قورى اقپارات جانە قوعامدىق دامۋ مينيسترلىگى مەن ازاماتتىق باستامالاردى قولداۋ ورتالىعىنىڭ قولداۋىمەن جۇزەگە اسىرۋدا.

«ەگەمەن-اقپارات»

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز