اقشا-نەسيە ساياساتى دەپارتامەنتىنىڭ ديرەكتورى جاندوس شايماردانوۆتىڭ ايتۋىنشا, سۇرانىستىڭ ءوسۋ قارقىنىنىڭ باياۋلاۋى اسىرەسە, وڭدەۋ ونەركاسىبىندە, ساۋدادا, قۇرىلىستا قاتتى بايقالادى. اۋىل شارۋاشىلىعى بويىنشا سۇرانىس كورسەتكىشى تەرىس ايماققا اۋىسقان. ءۇشىنشى توقساندا سۇرانىس وسسە, ول تەك اۋىل شارۋاشىلىعىندا وسەدى دەگەن بولجام بار, ال باسقا سالالاردا ءوسۋ باياۋلاپ, ءتىپتى تومەندەپ كەتۋى دە مۇمكىن.
«2021 جىلدىڭ ەكىنشى توقسانىندا شيكىزات, ماتەريالدار مەن دايىن ءونىم باعاسىنىڭ ءوسۋ قارقىنى جەدەلدەي تۇسكەنى بارلىق سالادا بايقالدى. 2021 جىلدىڭ ءۇشىنشى توقسانىندا باعانىڭ ءوسۋ قارقىنى باياۋلايدى دەپ كۇتىلۋدە. ءسوز بولىپ وتىرعان سالالاردا ءوندىرىس كولەمى ۇلعايىپ, ديففۋزيالىق يندەكس ءوسۋ سالاسىنا ءوتتى. وڭدەۋ ونەركاسىبىندە ەڭ جوعارى ءوسىم بار. 2021 جىلدىڭ ءۇشىنشى توقسانىندا بۇل سالادا دا ءوسۋ قارقىنى باسەڭدەيدى دەپ كۇتىلۋدە» دەيدى ج.شايماردانوۆ.
اتالعان سالالاردا باسەكەلەستىك دەڭگەيى جوعارى. ساۋدا كاسىپورىندارى نارىقتىق باسەكەلەستىكتىڭ ىقپالىنان شىعا الار ەمەس, مۇندا كاسىپورىنداردىڭ 40,1 پايىزى ءوز بيزنەسىنە قاتىستى باسەكەلەستىكتىڭ اسەرىن سەزدى دەگەن وي ايتادى ول. وڭدەۋ ونەركاسىبىندە مۇنداي كاسىپورىنداردىڭ ۇلەسى – 31,6, كولىك سالاسىندا – 25,6, قۇرىلىس سالاسىندا 24,9 پايىزعا جەتەدى ەكەن. اۋىل شارۋاشىلىعى مەن تاۋ-كەن ونەركاسىبىندە ەڭ از ۇلەس (18,2 جانە 16,1 پايىز) بايقالعان.
سونىمەن قاتار ەل ەكونوميكاسىنىڭ جاي-كۇيىنە قاناعاتتانباۋ – كاسىپورىنداردىڭ باسىم بولىگىنىڭ ىسكەرلىك بەلسەندىلىگىن تەجەيتىن باستى كەدەرگىگە اينالعان. ۇلتتىق بانكتىڭ زەرتتەۋىندە وڭدەۋ ونەركاسىبى مەن ساۋدا سالاسىنىڭ ونىمگە دەگەن سۇرانىسقا بايلانىستى ەلەۋلى پروبلەمالاردى (30,9 جانە 27,6 پايىز) باستان كەشىپ وتىرعانى ايتىلادى. اۋىل شارۋاشىلىعى مەن وڭدەۋشى كاسىپورىن جەتەكشىلەرى بىلىكتى كادرلاردىڭ تاپشى ەكەنىن العا تارتقان.
«كەلەسى 12 ايدا بارلىق سالا بويىنشا قارجىلاندىرۋ كولەمى بۇرىنعى قالپىندا ساقتالادى. بۇل رەتتە وڭدەۋ جانە تاۋ-كەن ءوندىرۋ ونەركاسىبى بارىنشا مولىراق قارجىلاندىرىلىپ, كەرىسىنشە, قۇرىلىس پەن ساۋدادا از قارجى بولىنەدى دەگەن جوسپار بار» دەيدى ج.شايماردانوۆ.
