قازپوشتانىڭ بوند قويماسى ارقىلى الىس شەتەلدەرگە پوشتا جونەلتىلىمدەرىن جونەلتۋ جانە قابىلداۋمەن قاتار ەاەو ەلدەرىنە ترانزيتتىك جۇكتەردى وڭدەۋ جۇزەگە اسىرىلادى. بۇل ءوز كەزەگىندە قازاقستاننىڭ ترانزيتتىك الەۋەتىن دامىتۋعا مۇمكىندىك بەرەدى. بۇگىنگى تاڭدا قازاقستاندىق بوندتىڭ قىزمەتى رەسەي, وزبەكستان, قىرعىزستان, ازەربايجان ەلدەرى تاراپىنان سۇرانىسىنا يە. سونىمەن قاتار قازپوشتا ءىرى قىتايلىق لوگيستيكالىق كومپانيالارمەن كەلىسىمگە قول جەتكىزدى. سەرىكتەس پوشتا اكىمشىلىكتەرىمەن جاسالعان ۋاعدالاستىقتار تىكەلەي تاۋار اعىنى كولەمىن ۇلعايتۋعا مۇمكىندىك بەرەدى دەپ جوسپارلانۋدا.
بوند قويماسىندا تاۋارلاردى ساقتاۋ قىزمەتتەرى ريتەيلەرگە جانە ەلەكتروندى ساۋدا الاڭدارىنا وتە ءتيىمدى. ولارعا تاۋاردى كەدەندىك اۋماقتان ساتىپ الۋشىعا جەتكىزۋگە الىپ كەتكەن سوڭ, سالىق باجدارى مەن الىمداردى تولەۋگە مۇمكىندىك بەرىلەدى. بۇل بيزنەسكە شىعىنداردى ازايتۋعا جانە وزدەرىنىڭ كليەنتتەرىنە تاپسىرىستاردى جىلدام جەتكىزۋگە مۇمكىندىك بەرەدى. مۇنداي شەشىم ءوندىرۋشى ەلدەن جەتكىزۋدى كۇتپەي-اق, ءوز تاۋارىن نەعۇرلىم قىسقا مەرزىمدە قولدارىنا الاتىن تۇتىنۋشىلارعا ءتيىمدى. بۇل ارتىقشىلىقتاردىڭ بارلىعى ەلەكتروندى كوممەرتسيانىڭ دامۋىنا جانە قولما-قول اقشاسىز تولەمنىڭ ءوسۋى ەسەبىنەن كولەڭكەلى اينالىمداعى قاراجاتتى ازايتۋ جونىندەگى مەملەكەتتىك مىندەتتى شەشۋگە ىقپال ەتەدى. جاڭا بوند قويماسىندا جۇكتەردى تەمىر جول جانە اۆتوموبيل كولىگىمەن قابىلداۋ جانە جىبەرۋ مۇمكىندىگى بار.
«ەگەمەن-اقپارات»
