وڭتۇستىك قازاقستان وبلىسىنىڭ شىمكەنت قالاسىندا جەكە كاسىپكەر مەن ونىڭ كامەلەتكە تولماعان ۇلىن ولتىرگەن 2 قىلمىسكەر ءومىر بويى باس بوستاندىعىنان ايىرىلدى. بۇل تۋرالى «حابار» تەلەارناسى حابارلادى.
بۇل وقيعا بىلتىر ناۋرىز ايىندا بولعان ەدى. قىلمىستىق توپتى باسقارعان جالعاس ىسقاقوۆ ءوزىنىڭ ارام پيعىلىن جۇزەگە اسىرۋ ءۇشىن شىمكەنتتىك كاسىپكەردىڭ سەنىمىنە كىرىپ, ىسكەرلىك قارىم-قاتىناس ورناتقان. ال ونىڭ سىبايلاستارى بيزنەسمەننىڭ ءاربىر قادامىن اڭدىپ, ارام پيعىلدارىن ىسكە اسىرۋدى ويلاستىرعان. اقىرى ولار ءبىر كۇنى شىرت ۇيقىدا جاتقان جانداردى ۇرىپ, قوماقتى قارجى تالاپ ەتەدى. قارسىلىق بىلدىرگەن كاسىپكەر مەن ونىڭ ۇلىن ايۋاندىقپەن ولتىرگەن. زايىبى مەن قىزى اۋىر دەنە جاراقاتىمەن اۋرۋحاناعا ءتۇستى.
قىلمىسكەرلەر بيزنەسمەننىڭ ۇيىنەن ميلليونداعان اقشا مەن باعالى بۇيىمداردى الىپ كەتكەن. سوت شەشىمىمەن قىلمىسكەرلەر جازاسىن قاتاڭ رەجيمدەگى تۇزەۋ مەكەمەلەرىندە وتەيتىن بولدى. سونىڭ ىشىندە ەكەۋىنە ءومىر بويى باس بوستاندىعىنان ايىرۋ جازاسى تاعايىندالدى.
ءامىرحان الماعانبەتوۆ.
دەرەككوز: «حابار» تەلەارناسى.
فوتو: Od. Vgorode.ua.
