جاپونياداعى حوككايدو ۋنيۆەرسيتەتىنىڭ ءبىر توپ پالەونتولوگى گادروزاۆردىڭ (ۇيرەكتۇمسىقتى دينوزاۆر) قاڭقاسىن تاپتى. بۇل تۋرالى يتار-تاسس حابارلادى.
عالىمدار گادروزاۆردىڭ قاڭقاسىن حوككايدونىڭ وڭتۇستىك بولىگىندەگى مۋكاۆا قالاسى ماڭىنان تاپقان. العاش رەت دينوزاۆردىڭ قاڭقاسى بۇل ايماقتا 2003 جىلى تابىلعان بولاتىن.
بىلتىر ماماندار مۋكاۆا ماڭىنداعى تاۋدا ەكسپەديتسيالىق زەرتتەۋ جۇرگىزىپ, ناتيجەسىندە, جانۋاردىڭ قۇيرىعىن, جامباس سۇيەگى مەن بىرنەشە ءتىس سۇيەگىن ولجالادى. «بۇل جەردەن گادروزاۆردىڭ قاڭقاسى تۇگەلدەي تابىلۋى ابدەن مۇمكىن», – دەيدى زەتتەۋ توبىنىڭ جەتەكشىسى, پروفەسسور يوسيتسۋگۋ كوباياسي.
ازىرگە عالىمدار جانۋار قاڭقاسىنىڭ 30 پايىزىن قۇراستىرىپ ءبىتتى. ونىڭ ۇزىندىعى – 8 مەتر, ال سالماعى – 7 توننادان اساتىن كورىنەدى. بۇل - وسىعان دەيىن تابىلعان گادروزاۆرلاردىڭ ەڭ ءىرىسى بولىپ وتىر.
گادروزاۆرلار جەر بەتىندە 85 ملن. جىل بۇرىن ءومىر سۇرگەن. ونىڭ ۇيرەكتىڭ تۇمسىعىنا ۇقسايتىن اۋزى بولعان. عالىمداردىڭ ايتۋىنشا, ول ساعاتىنا 50 شاقىرىم جىلدامدىقپەن جۇگىرگەن ەكەن.
ايدار ورىسباەۆ.
دەرەككوز: Itar-tass.com
فوتو: Itar-tass.com
