رۋحاني شارانىڭ اشىلۋىنا ەلىمىزدىڭ مادەنيەت جانە سپورت ۆيتسە-ءمينيسترى نۇرعيسا داۋەشوۆ, قازاقستاننىڭ قىرعىزستانداعى ەلشىسى ءراپىل جوشىباەۆ جانە قىرعىز رەسپۋبليكاسى پرەزيدەنتى اكىمشىلىگىنىڭ باسشىسى سۇيىنبەك قاسمامبەتوۆ پەن سول ەلدىڭ مادەنيەت, اقپارات, سپورت جانە جاستار ساياساتى ءمينيسترى قايرات يماناليەۆ قاتىسىپ, ونەرپازدارعا ساتتىلىك تىلەدى.
نۇرعيسا داۋەشوۆ ءوز سوزىندە ەكى ەل اراسىنداعى تاتۋلىقتى, بىرلىكتى جانە ورتاق قۇندىلىقتى ەجەلدەن ونەر ارقىلى ناسيحاتتاپ كەلە جاتقان مايتالماندارعا توقتالىپ, اتالعان يگى ءداستۇر جوعارى دەڭگەيدە جالعاسا بەرەتىنىنە سەنىم ءبىلدىردى.
«قىز-جىگىت. سارمەردەن» – قىرعىز تەلەكورەرمەندەرى قىزىعىپ كورەتىن باعدارلامانىڭ ءبىرى. جوبانىڭ نەگىزىندە قىزدار مەن جىگىتتەر حالىق اۋىز ادەبيەتىنەن ماقال-ماتەل, جاڭىلتپاش, ءازىل ايتىپ جارىسادى.
كونتسەرتتىڭ تۇسىرىلىمىنە ەلىمىزدىڭ اتىنان ءداستۇرلى انشىلەر – كلارا تولەنباەۆا, ارداق بالاجانوۆا, ايگۇل ەلشىباەۆا, قازبەك ادىكەي, مارات سۇگىرباي, بەيبىت مۇساەۆ, كۇيشى نۇركەن ءاشىروۆ جانە «سالتانات» بي ءانسامبلى قاتىستى. ال قازىلار قۇرامىندا قازاقستان مەن قىرعىزستاننىڭ حالىق ءارتىسى التىنبەك قورازباەۆ, قازاقستاننىڭ ەڭبەك سىڭىرگەن قايراتكەرى ەلمۇرا جاڭابەرگەنوۆا بولدى.
باعدارلامانىڭ العاشقى كۇنى «سارمەردەندى» قازاق جىگىتتەرى مەن قىرعىز قىزدارى وينادى.
