ء«بىزدىڭ اگرارلىق ساياساتىمىزدا ساباقتاستىق بولماي وتىر. مينيستر اۋىسسا, سالانىڭ ساياساتى دا وزگەرەدى. مۇنداي جاعدايدا شارۋالارعا ادال جۇمىستى جوسپارلاۋ قيىنعا تۇسەدى. بىرىڭعاي نەگىزگى باعىت بولۋى قاجەت. سوعان سايكەس سۋبسيديالاۋ تاسىلدەرىن قايتا قاراپ, تۇراقتاندىرۋ كەرەك», دەدى پرەزيدەنت.
وكىنىشكە قاراي, بۇل سالادا تۇيتكىلدەر كوپ. ءبىر جاعىنان سىبايلاس جەمقورلىقتىڭ سالدارىنان مەملەكەتتەن بولىنگەن قاراجات قاراپايىم ديقاندارعا, اۋىل تۇرعىندارىنا جەتپەي جاتادى. ماسەلەن, اگروونەركاسىپ كەشەنىنە قاتىستى قوزعالعان قىلمىستىق ىستەردىڭ جارتىسىنان استامى سۋبسيديانى تالان-تاراجعا سالۋعا بايلانىستى بولىپ وتىر ەكەن. مەملەكەت باسشىسى ايتقانداي, بۇعان جول بەرۋگە بولمايدى.
بۇل ماسەلەنى بۇرىننان كوتەرىپ كەلە جاتىرمىز. بيىلعى قۋاڭشىلىقتان كەيىن, سۋ تاپشىلىعى تۋىنداعان سوڭ مال شارۋاشىلىعىمەن, ديقانشىلىقپەن اينالىساتىن كاسىپكەرلەر ۇلكەن پروبلەمالارعا كەزدەسىپ وتىر. سوندىقتان ولارعا سۋبسيديا بەرۋگە ەرەكشە نازار اۋدارۋىمىز كەرەك. ويتكەنى اۋىل شارۋاشىلىعىنا قاجەتتى تەحنيكانىڭ كوبى ەسكىرگەن. ونى جاڭارتۋدى قاراپايىم شارۋالاردىڭ قالتاسى كوتەرە بەرمەيتىنى بەلگىلى.
جولداۋدا باسقا دا وزەكتى, ماڭىزدى تاپسىرمالار بەرىلدى. مىسالى, قىزمەتكەرلەردىڭ جالاقىسىن كوتەرۋ, كاسىپكەرلەرگە جەڭىلدىك بەرۋ سەكىلدى قوعام ءۇشىن ماڭىزدى مىندەتتەر بار.
ازات پەرۋاشەۆ,
ءماجىلىس دەپۋتاتى
