وسى رەتتە, الدىمەن بيىلعى جولداۋدىڭ ناقتىلىعىن اتاپ وتكەن ءجون. پرەزيدەنتىمىز كوروناۆيرۋس پاندەمياسىن جانە سونىڭ سالدارىنان بولعان ەكونوميكالىق داعدارىستى ەڭسەرۋدىڭ, سونداي-اق قازاقستاندىقتاردىڭ ءال-اۋقاتىن ارتتىرۋدىڭ ناقتى جوسپارىن جاساپ بەردى. جاڭا قۇجاتتا قازىرگى تاڭدا قوعامدى الاڭداتقان ماڭىزدى ماسەلەلەر قامتىلعان جانە ولاردى شەشۋ جولدارى ۇسىنىلعان.
جولداۋدا بەلگىلەنگەن باسىمدىقتار مەملەكەت باسشىسىنىڭ ستراتەگيالىق باعدارىن دايەكتى تۇردە ىسكە اسىرۋدى كوزدەيدى. ءبىرىنشى كەزەكتە, شاعىن جانە ورتا بيزنەستى كەڭ كولەمدە قولداۋ شارالارى ءارى قاراي جالعاسادى. پرەزيدەنتىمىز «قاراپايىم زاتتار ەكونوميكاسى» جانە «بيزنەستىڭ جول كارتاسى» باعدارلامالارىنىڭ تيىمدىلىگىن اتاپ ءوتىپ, ولاردىڭ مەرزىمىن ءارى قاراي ۇزارتۋدى تاپسىردى. سوعان سايكەس قازاقستاندىق بيزنەستى قولداۋ جالعاسا بەرەدى.
مەملەكەت باسشىسى سوڭعى كەزدە بيۋدجەتتىڭ شىعىس بولىگىندەگى مىندەتتەمەلەردى ورىنداۋ ءۇشىن بيۋدجەت تاپشىلىعى ۇلعايىپ, ۇلتتىق قوردان الىناتىن ترانسفەرتتەر كوبەيىپ بارا جاتقانىنا نازار اۋداردى. سوعان بايلانىستى بيۋدجەتتىك ءتارتىپتى ساقتاۋ قاجەتتىگىن ايتتى. بۇل ماسەلە سەنات وتىرىستارىندا بيۋدجەتتى قاراۋ كەزىندە بىرنەشە رەت كوتەرىلگەن ەدى. ودان بولەك, ەل پرەزيدەنتى ۇكىمەت پەن ۇلتتىق بانككە مەملەكەت قارجىسىن باسقارۋدى رەتتەيتىن بولەك تۇجىرىمداما ازىرلەۋدى تاپسىردى.
جولداۋدا الەۋمەتتىك پروبلەمالارعا ايرىقشا باسىمدىق بەرىلگەن. وعان ىندەتتىڭ حالىقتىڭ تابىسى مەن الەۋمەتتىك احۋالىنا ايتارلىقتاي زاردابىن تيگىزۋى سەبەپ ەكەنى ءسوزسىز.
وسى رەتتە, مەملەكەت باسشىسىنىڭ ەڭ تومەنگى جالاقىنى 42 مىڭ 500 تەڭگەدەن 60 مىڭ تەڭگەگە دەيىن كوتەرۋ, قىزمەتكەرلەرىنىڭ ەڭبەكاقىسىن كوبەيتكەن جۇمىس بەرۋشىلەرگە جەڭىلدىكتەر بەرۋ, ەڭبەكاقى تولەۋ قورىنا تۇسەتىن جۇكتەمەنى ازايتۋ جانە بيزنەس ءۇشىن بىرىڭعاي تولەم ەنگىزۋ سياقتى باستامالارى قازاقستاندىقتاردىڭ تابىسىن ارتتىرۋعا ارنالىپ وتىرعانىن ايتقان ابزال.
پرەزيدەنتىمىزدىڭ مەكتەپتەردەگى ورىن تاپشىلىعىن جويۋ بويىنشا بەرگەن ناقتى تاپسىرماسى دا وتە وزەكتى. سوعان سايكەس 2025 جىلعا دەيىن سالىنۋعا ءتيىس مەكتەپتەر سانى 800-دەن 1000-عا دەيىن كوبەيتىلدى. جولداۋدا زەينەتاقى جيناقتارىن پايدالانۋ ارقىلى قازاقستاندىقتاردىڭ تۇرعىن ءۇي ماسەلەسىن شەشۋگە ارنالعان قوسىمشا شارالار دا ايتىلدى.
سونداي-اق مەملەكەت باسشىسى ينفلياتسيانى 4-6 پايىز دەڭگەيىندە ۇستاپ تۇرۋ تۋرالى ناقتى تاپسىرما بەرىپ, ازىق-ت ۇلىك باعاسىنىڭ باقىلاۋسىز وسۋىنە جول بەرمەۋ قاجەتتىگىن ايتتى.
جولداۋدىڭ اۋقىمدى بولىگى وڭىرلەر مەن اۋىل-ايماقتى دامىتۋ ماسەلەسىنە ارنالعان. سەناتورلار نەگىزىنەن وڭىرلەردىڭ وكىلدەرىنەن سايلاناتىندىقتان, مەملەكەت باسشىسىنىڭ بۇل باعىتتاعى تاپسىرمالارى ءبىزدىڭ پالاتا ءۇشىن اسا ماڭىزدى.
بارلىق دەڭگەيدەگى اكىمدەردىڭ جۇمىسىن باعالاۋ ءتاسىلىن وڭتايلاندىرۋ, وڭىرلەردىڭ الەۋمەتتىك-ەكونوميكالىق دامۋىنداعى تەڭسىزدىكتى ازايتۋ جانە ولاردىڭ قارجىلىق دەربەستىگىن ارتتىرۋ بويىنشا تاپسىرمالار بەرىلدى. ەلىمىزدىڭ ىشكى بايلانىسىن جاقسارتۋ ءۇشىن كولىك ينفراقۇرىلىمىنا قاتىستى بۇعان دەيىن باستالعان بارلىق جوبانى اياقتاۋ كەرەكتىگى دە ايتىلدى.
مەملەكەت باسشىسى سۋ رەسۋرستارىن ۇنەمدى پايدالانۋ ماسەلەسىنە نازار اۋدارىپ, ءتيىستى ورگانداردىڭ الدىنا سۋ ينفراقۇرىلىمىن جاڭعىرتۋ, ونەركاسىپ پەن ەكونوميكانى ەكولوگيالىق تازارتۋ جانە ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتۋ مىندەتتەرىن قويدى. جولداۋدا اۋىل تۇرعىندارىن الاڭداتىپ وتىرعان جايىلىمدىق جەرلەرمەن قامتاماسىز ەتۋ ماسەلەسى دە ءسوز بولدى.
پرەزيدەنتىمىز مەملەكەتتىك اپپاراتقا ەبىن تاۋىپ ورنىندا وتىرا بەرۋگە جانە تاپسىرمالاردى ورىنداۋدان جالتارۋعا ەشقانداي جول بەرىلمەيتىنىن شەگەلەپ تۇرىپ ايتىپ, نەگىزگى باسىمدىقتاردى ناقتى كورسەتىپ بەردى. قازىرگى تاڭدا ەلىمىز دامۋدىڭ شەشۋشى كەزەڭىنە قادام باستى. سوندىقتان مەملەكەتتىك اپپارات ءبىرتۇتاس قۇرىلىم رەتىندە جۇمىس ىستەۋگە مىندەتتى.
بۇل رەتتە پارلامەنتكە دە پرەزيدەنت باستامالارى مەن تاپسىرمالارىن ىسكە اسىرۋعا ارنالعان زاڭداردى دەر كەزىندە قابىلداۋ مىندەتى جۇكتەلىپ وتىر. پارلامەنت سەناتى وسى باعىتتا بارلىق مۇددەلى تاراپپەن بىرلەسىپ جۇمىس ىستەۋگە جانە مەملەكەت باسشىسىنىڭ ەلىمىزدى جاڭعىرتۋ باعدارىن ىسكە اسىرۋعا ءوز ۇلەسىن قوسۋعا دايىن.
