ەۋرووداقتىڭ ىشكى ىستەر مينيسترلەرى اۋعانستانداعى وقيعالاردى, حالىقارالىق قورعاۋ, كوشى-قون جانە قاۋىپسىزدىك سالالارىن تالقىلادى. بريۋسسەلدەگى كەزدەسۋدە قابىلدانعان مالىمدەمەدە, اۋعانستانمەن كورشىلەس ەلدەر بوسقىنداردى قورعاۋدى قامتاماسىز ەتۋ كەرەك دەلىنگەن. قازىرگى ۋاقىتتا ەو بۇل ماسەلە بويىنشا ناقتى مىندەتتەمەلەر العىسى كەلمەيدى.
«وسىعان دەيىن بولعان جاعدايلارعا سۇيەنە وتىرىپ, ەو جانە وعان مۇشە مەملەكەتتەر كەلىسىلگەن جانە رەتتەلگەن جاۋاپ بەرۋ شارالارىن دايىنداۋ ارقىلى زاڭسىز كوشى-قون قوزعالىستارىنىڭ قايتالانۋىن بولدىرماۋ ءۇشىن بىرلەسىپ ارەكەت ەتۋگە بەل بۋادى. زاڭسىز كوشى-قوندى ىنتالاندىرۋدان اۋلاق بولۋ كەرەك», دەلىنگەن حابارلامادا.
قۇجاتتا اۋعانستانداعى بيلىكتى «تاليبان» باسىپ العاننان كەيىن وسىنداي وقيعالاردى بولدىرماۋ ءۇشىن اۋعانستانمەن كورشىلەس ورنالاسقان ەلدەردە وعان مۇقتاج ادامداردى ءتيىستى قورعاۋدى قامتاماسىز ەتۋ قاجەت ەكەنى جانە بۇل ەلدەردى قولداۋ كۇشەيتىلۋى كەرەك ەكەنى ايتىلعان.
سونداي-اق, ەۋرووداق اۋعانستانمەن كورشى ەلدەرگە بوسقىنداردى قابىلداۋ ءۇشىن قولما-قول اقشا بەرۋدى جوسپارلاپ وتىر. سونىمەن قاتار, مالىمدەمەدە ەۋروپاعا قاۋىپتى جانە زاڭسىز ساپارعا شىعۋعا شاقىراتىنداردى توقتاتۋ كەرەك دەلىنگەن.
مالىمدەمەگە سايكەس, قورعاۋدى قاجەت ەتەتىن اۋعان ازاماتتارىن كوشىرۋ ەو مەملەكەتتەرى ورىن ۇسىنعان جاعدايدا عانا جۇزەگە اسىرىلۋى كەرەك.
بۇعان دەيىن ەۋروپالىق پارلامەنت توراعاسى ەۋروپالىق وداق ەلدەرىن اۋعانستاننان ميگرانتتاردى كوشىرۋدى ۇيىمداستىرۋ ءۇشىن شارالار قابىلداۋعا شاقىردى. ەو ديپلوماتياسىنىڭ باسشىسى جوزەپ بوررەل ەو كوشى-قون اپاتى مەن گۋمانيتارلىق داعدارىستىڭ الدىن الۋ ءۇشىن «تاليبان» قوزعالىسىمەن مۇمكىندىگىنشە تەزىرەك بايلانىس ورناتۋى كەرەك دەدى.
