قازاقستانعا اقشا تابۋ ۇشىن وزبەكستاننان كەلگەن 54 جاستاعى ەر ادام عابيت مۇسىرەپوۆ اۋدانىنىڭ ورتالىق اۋرۋحاناسىنا جاتقىزىلىپ, كەيىن قايتىس بولعان.
عابيت مۇسىرەپوۆ اۋداندىق سانيتارلىق-ەپيدەميولوگيالىق باقىلاۋ باسقارماسى ەر ادامنىڭ سىرەسپەدەن قايتىس بولۋ وقيعاسىن تەرگەپ جاتىر.
وزبەكستان رەسپۋبليكاسىنىڭ ازاماتى 2020 جىلى وسى وڭىرگە قۇرىلىس جۇمىسىنا كەلگەن. 21 تامىزدا قۇرىلىس جۇمىستارى كەزىندە ول وڭ اياعىن توت باسقان شەگەمەن جاراقاتتاعان.
«25 تامىزدا, كەشكى 10-نان كەيىن, ونىڭ باسى تارتىپ, جاق سۇيەگىندە قۇرىس-تىرىس پايدا بولادى. وزبەكستاندىق ازامات مەديتسينالىق كومەككە جۇگىنبەگەن. الايدا, 26 تامىزدا جەدەل جاردەم بريگاداسى شاقىرىلىپ, ناۋقاس اۋداندىق اۋرۋحانانىڭ جەدەل جاردەم بولىمىنە جەتكىزىلدى. دارىگەر ناۋقاستى قاراۋ كەزىندە جاقتىڭ سىرەسىپ, بۇكىل ومىرتقانىڭ قيسايۋى, قاتتى السىزدىكتى انىقتادى. ەپيدەميولوگيالىق انامنەز مەن كلينيكالىق سيپاتقا نەگىزدەلگەن دياگنوز سىرەسپە دەپ قويىلدى. ناۋقاستىڭ ەكپە العان-الماعاندىعى بەلگىسىز», دەدى سانيتارلىق-ەپيدەميولوگيالىق باقىلاۋ دەپارتامەنتى باستىعىنىڭ ورىنباسارى ارمان كۋشباسوۆ ءباسپاسوز ءماسليحاتىندا.
ونىڭ ايتۋىنشا, وزبەكستاندىق ازاماتقا شۇعىل ۆاكتسينالاۋ جاسالعان. اۋرۋحاناعا تۇسكەن ساتتەن باستاپ ناۋقاستىڭ جاعدايى وزگەرىسسىز جانە ۇنەمى اۋىر حالدە بولعان. ول 28 تامىزدا قايتىس بولدى.
