فۋتبول • 01 قىركۇيەك، 2021

فۋتبولدان ءاچ: بۇگىن قازاقستان قۇراماسى مەن ۋكراينا كەزدەسەدى

98 رەت كورسەتىلدى

بۇگىن، 1 قىركۇيەكتە فۋتبولدان 2022 جىلعى الەم چەمپيوناتىنا ىرىكتەۋ ساتىسىندا ەلوردادا قازاقستان قۇراماسى ۋكراينانى قابىلدايدى، دەپ حابارلايدى Egemen.kz.

ايتا كەتەيىك، قازاقستاندىق قۇراما ىرىكتەۋ ساتىسىندا D توبىندا سىنعا تۇسەدى. قارسىلاستارى - فرانتسيا، ۋكراينا، بوسنيا جانە گەرتسوگوۆينا، فينليانديا.

قازىرگە دەيىن ۇلتتىق قۇراما ەكى ويىن وتكىزدى. العاشقىسىندا ءوز الاڭىندا فرانتسيادان 0:2 ەسەبىمەن جەڭىلسە، ودان كەيىن سىرت الاڭدا ۋكراينامەن 1:1 ەسەبىمەن تەڭ ءتۇستى. العاشقى كەزدەسۋدە ۋكراينا قۇراماسىنىڭ باس باپكەرى قىزمەتىن اندرەي شەۆچەنكو اتقارعان ەدى. ەندى ول قىزمەتكە الەكساندر پەتراكوۆ تاعايىندالدى.

تۋرنير كەستەسىندە قازاقستاندىقتار ءبىر ۇپايمەن بەسىنشى ورىندا تۇر. كوش باسىندا جەتى ۇپايمەن فرانتسيا كەلەدى. ەكى قۇراما بۇعان دەيىن بەس مارتە كەزدەستى. ونىڭ تورتەۋىندە ۋكرايندار جەڭىسكە جەتسە، بىرەۋىندە تەڭ ناتيجە تىركەلدى.

بۇگىنگى كەزدەسۋگە كارانتين تالابىنا بايلانىستى جانكۇيەرلەر شەكتەۋلى مولشەردە ستاديوننان تاماشالاي الادى. ويىن ەلوردا ۋاقىتىمەن 20.00-دە باستالىپ، «Qazsport» تەلەارناسىنان تىكەلەي ەفيردە كورسەتىلەدى.

كەزدەسۋدە ليتۆالىق دوناتاس رۋمشاس باس قازى قىزمەتىن اتقارادى. وعان وتانداستارى الەكساندراس راديۋشاس پەن دوۆيداس سۋجيدەليس كومەكشىلىك جاسايدى. قوسالقى تورەشى دە ليتۆالىق روبەرتاس شميتاس.

قازاقستان قۇراماسى بۇدان كەيىن سىرت الاڭدا 4 قىركۇيەكتە فينليانديامەن كەزدەسسە، 7 قىركۇيەكتە بوسنيا جانە گەرتسوگوۆينامەن ششەبەرلىك بايقاسادى.

سوڭعى جاڭالىقتار

ۇقساس جاڭالىقتار