وليمپيادادا سەگىز رەت وزات اتاندى
شاھار باسشىسى الماتىلىق وقۋشىلار پاندەميا كەزىندەگى قيىندىقتارعا قاراماستان, ۇزدىك ناتيجەلەر كورسەتكەندىگىن ەرەكشە اتاپ ءوتتى. وقۋشىلاردىڭ ءبىلىم سايىستارىندا كورسەتكەن ۇزدىك ناتيجەلەرىن قۋانىشپەن اتاپ وتكەن قالا باسشىسىنىڭ ايتۋىنشا, وتكەن وقۋ جىلىندا رەسپۋبليكالىق وليمپيادالاردا قالا وقۋشىلارى 60 مەدال ەنشىلەسە, 33 وقۋشى حالىقارالىق بايقاۋلاردىڭ جەڭىمپازى اتانعان. ال پرەزيدەنت وليمپياداسىندا الماتىلىق وقۋشىلار 8-ءشى رەت وزات اتانىپ وتىر.
مەگاپوليس باسشىسى وسى ورايدا قالانىڭ ءبىلىم سالاسىنا قوسقان ەرەن ەڭبەگى ءۇشىن «ەلىمىزدىڭ ءبىلىم بەرۋدەگى قۇرمەتتى قىزمەتكەرى», «ىبىراي التىنسارين» توسبەلگىسى جانە قالا اكىمىنىڭ «ەڭبەگى ءۇشىن» مەدالىن ۇستازدارعا تابىس ەتتى. ۇلگىلى مەكتەپتەردەن وزا شاۋىپ, قالا اكىمىنىڭ گرانتىن جەڭىپ العان م.ماقاتاەۆ اتىنداعى №140 مەكتەپ-گيمنازياسى ۇستازدارىنىڭ ەڭبەگى جوعارى باعالاندى. وسى ورايدا اتالعان ۇجىم «ەڭ ۇزدىك ورتا ءبىلىم بەرۋ مەكەمەسى» دەپ تانىلىپ, 34 ملن تەڭگە كولەمىندەگى اكىم گرانتىنا يە بولدى.
«ۇستاز ەڭبەگىنىڭ ءوز دارەجەسىندە باعاسىن الۋى, قادىرلەنۋى ولاردى ەرەكشە شابىتتاندىرىپ, تىڭ يدەيالاردى جۇزەگە اسىرۋىنا ۇلكەن مۇمكىندىك تۋدىرادى. وسى ورايدا مەملەكەت تاراپىنان ۇستازدارعا بارلىق جاعداي جاسالىپ, قولداۋ كورسەتىلىپ كەلە جاتقانى قۋانتادى», دەپ اتاپ ءوتتى №140 مەكتەپ گيمنازياسىنىڭ ديرەكتورى ءسانيا تىلەۋباي.
ءۇمىتتى اقتاعان
ۇلگىلى مەكتەپ
الماتى قالاسىنداعى ونەگەلى تاريحىمەن ەرەكشەلەنەتىن ءبىلىم وردالارىنىڭ ءبىرى – م.ماقاتاەۆ اتىنداعى №140 گيمنازيانىڭ ىرگەتاسى 1990 جىلى قالانعان. قارلىعاش ۇزاقوۆا, ماريام دەمەۋوۆا, تالعات بايمۇحامبەتوۆ, اكىمجان سايلىباەۆ, جاناس سالپىنوۆ سىندى بىلىكتى باسشىلار باسقارعان مەكتەپتە بۇگىندە يگى باستامالار جالعاسىن تابۋدا. 2008 جىلدىڭ كۇز ايىنان بەرگى ارالىقتا ءبىلىم ورداسىنا ءسانيا تىلەۋباي باسشىلىق ەتىپ كەلەدى. 1996 جىلعا دەيىن ماتەماتيكا-فيزيكا, حيميا-بيولوگيا پاندەرىن تەرەڭدەتىپ وقىتىپ كەلگەن گيمنازيادا 1997 جىلدان باستاپ ماتەماتيكا, اعىلشىن, فيزيكا, قازاق ءتىلى پاندەرى تەرەڭدەتىلىپ وقىتىلاتىن سىنىپتار اشىلدى. ء«تىل ونەرىنىڭ قۇدىرەتىن تانىعان, ويىن ولەڭمەن ءورىپ, كۇللى جۇرتتىڭ جۇرەگىنە جول تاپقان, اقيىق اقىن م.ماقاتاەۆ اتىنداعى №140 گيمنازيا 30 جىلدىق تاريحىندا كوپتەگەن شاكىرتتەردى «التىن بەلگى», «ۇزدىك اتتەستات» يەگەرلەرىن, ءتۇرلى بايقاۋدىڭ جەڭىمپازدارىن تاربيەلەپ ۇشىردى. شيرەك عاسىردان اسقان جىلداردا №140 گيمنازيا كەشەندى دامۋ جوسپارىن جاساپ, تالاي يگى ىستەرگە ۇيىتقى بولىپ كەلەدى», دەيدى ءسانيا وسكەنبايقىزى.
قازىرگى تاڭدا بۇل ءبىلىم ورداسى الماتى قالاسى بويىنشا 2015 جىلى «ۇزدىك مەكتەپ», 2016 جىلى رەسپۋبليكا بويىنشا «دارىندى بالالارعا ارنالعان ۇزدىك ءبىلىم بەرۋ ۇيىمى», 2017 جىلى قالالىق كاسىپوداق ۇيىمى ۇيىمداستىرعان «ۇزدىك ۇجىم» اتانعان, كاسىبي شەبەر ۇستازدار مەن دارىندى شاكىرتتەردىڭ قۇتتى مەكەنى. گيمنازيانىڭ ايتۋلى جەتىستىكتەرىندە گيمنازيا ديرەكتورى ءسانيا تىلەۋبايدىڭ ۇيىمداستىرۋ شەبەرلىگى, كاسىبي بىلىكتىلىگى, ىسكەر باسشىلىعىنىڭ قولتاڭباسى جاتىر دەسەك ارتىق ايتپايمىز. دارىندى شاكىرت تاربيەلەۋشى تالانتتى ۇستازدار – قالا, رەسپۋبليكا كولەمىندە وتكەن «جىل مۇعالىمى», «جىل سىنىپ جەتەكشىسى», «ۇزدىك وقىرمان», «ۇزدىك قازاق ءتىلى ءپانى مۇعالىمى», ء«سوز مەرگەن», «التىن كومبە», «ۇزدىك اۆتورلىق باعدارلاما», «بىلگىرلەر بايگەسى», ء«تىلدارىن», «ۇزدىك پەداگوگ», «قالا اكىمى گرانتى» بايقاۋلارىنىڭ جۇلدەگەرلەرى قىزمەت ەتەدى. ولاردىڭ ىشىندە «قۇرمەت» وردەنىنىڭ, «قازاقستان رەسپۋبليكاسى ءبىلىم بەرۋ ءىسىنىڭ ۇزدىك قىزمەتكەرى», «ى.التىنسارين», «ليدەر وبرازوۆانيا», «ۇزدىك پەداگوگ» توسبەلگىلەرىنىڭ يەگەرلەرى, ۇبت جانە وقۋلىق ساراپشىلارى مەن ۇبت سۇراقتارىن قۇراستىرۋشىلار, ءبىلىم ساپاسىن سىرتتاي باقىلاۋ, وقۋلىقتاردى ساراپتاۋ مەن اپەللياتسيالىق كوميسسيالارىنىڭ, كوپتەگەن ادىستەمەلىك قۇرالداردىڭ, وقۋلىقتاردىڭ, كومەكشى قۇرالداردىڭ اۆتورلارى دا بار.
مەكتەپ تۇلەكتەرى وتاندىق جوعارى وقۋ ورىندارىمەن بىرگە سلوۆاكياداعى Alexander Dubcek University in Trencin, اقش-تىڭ ورەگون شتاتىنداعى يۋدجين قالاسىنداعى Lane Community College, رەسەي فەدەراتسياسى, قازان قالاسى, الەۋمەتتىك جانە گۋمانيتارلىق ءبىلىم ينستيتۋتى, يگور سيكورسكي اتىنداعى كيەۆ پوليتەحنيكا ينستيتۋتى, ۋكراينانىڭ ۇلتتىق تەحنيكالىق ۋنيۆەرسيتەتىنىڭ ستۋدەنتتەرى اتانىپ, ۇستازدارىنىڭ مەرەيىن اسىرۋدا.
ال الەمدىك پاندەميا جاعدايىندا جاڭا وقۋ جىلىندا ءبىلىم ساپاسىن تومەندەتىپ الماۋعا بار كۇش-جىگەرىن جۇمساپ وتىرعان ۇجىمنىڭ ماقساتى – تەرەڭ ءبىلىمدى, وزىق ويلى, ەل ەرتەڭىن ويلايتىن ۇرپاق تاربيەلەۋ.
Digital Ustaz Almaty جەڭىمپازى ەۋروپاعا بارادى
پاندەميا كەزىندە قاشىقتان وقىتۋ تاجىريبەسى بۇگىندە مەكتەپتەردە زاماناۋي تەحنولوگيالاردى ەنگىزۋ ماسەلەسىنىڭ وزەكتىلىگىن كورسەتىپ وتىر. جاڭا تەحنولوگيالار يننوۆاتسياشىل ءبىلىم وردالارى ءۇشىن ساپالى بىلىمگە مۇمكىندىك بەرەدى.
جاڭا وقۋ جىلىندا وڭتۇستىك استانادا مۇعالىمدەردى قولداۋ شارالارىن جۇزەگە اسىرۋ, ءبىرىنشى كەزەكتە ولاردىڭ كاسىبي شەبەرلىگىنىڭ ءوسۋىن ىنتالاندىرۋ جۇمىستارى جالعاسىن تاباتىن بولادى.
قالا اكىمى باقىتجان ساعىنتاەۆ ءبىلىم فورۋمى بارىسىندا ءداستۇرلى فورماتتاعى جۇمىستى جاڭعىرتۋ ءۇشىن ماڭىزدى مىندەتتەردىڭ جۇزەگە اساتىندىعىنا توقتالىپ, پەداگوگيكا قاۋىمداستىعىنىڭ نازارىن اۋداردى. «ن.نازارباەۆتىڭ ءبىلىم قورىمەن بىرگە تسيفرلى تەحنولوگيالاردى وقىتۋ مەن مەڭگەرۋدى جانە تسيفرلى پەداگوگيكانىڭ ۇزدىك ادىستەرى تاجىريبەسىن ۇيرەتەتىن Digital Ustaz Almaty جاڭا بايقاۋىنىڭ باستالعانىن حابارلايمىز. مۇعالىمدەردى Digital Ustaz Almaty بايقاۋىنا بەلسەندى قاتىسۋعا شاقىرا وتىرىپ, ولاردىڭ بىلىكتىلىكتەرىن ارتتىرۋمەن قاتار تسيفرلى داۋىردە جۇمىس ىستەۋدىڭ جاڭا تاسىلدەرىن زەرتتەۋگە قادام جاسايتىن بولادى», دەپ اتاپ ءوتتى.
Digital Ustaz Almaty بايقاۋى 3 كەزەڭدە وتەدى. ءار كەزەڭگە ءبىلىم بەرۋ سالاسىنداعى جەتەكشى حالىقارالىق سپيكەرلەر ۆەبينارلار مەن ماستەر-كلاسستاردىڭ كوشباسشىلارى قاتىسادى. بايقاۋ جەڭىمپازدارى ءۇشىن باعالى سىيلىقتار قاراستىرىلعان. ءبىرىنشى ورىن يەگەرى ءبىلىم تاعلىمداماسىنان ءوتۋ ءۇشىن لوندونعا نەمەسە حەلسينكيگە بارادى.
الماتى
