ءىس-شاراعا پارلامەنت ءماجىلىسىنىڭ دەپۋتاتتارى, مەملەكەتتىك ورگانداردىڭ وكىلدەرى, ەتنومادەني بىرلەستىكتەردىڭ جەتەكشىلەرى مەن مۇشەلەرى, قحا قوعامدىق قۇرىلىمدارىنىڭ, قازاقستان حالقى اسسامبلەياسى كافەدرالارى, عىلىمي جانە شىعارماشىلىق ينتەلليگەنتسيا, ەتنومادەني بىرلەستىكتەر جاستارى, قحا «جاڭعىرۋ جولى» جاستار قوزعالىسىنىڭ مۇشەلەرى مەن باق وكىلدەرى قاتىستى.
دوڭگەلەك ۇستەل سپيكەرلەرى – پارلامەنت ءماجىلىسىنىڭ دەپۋتاتتارى ءابىلفاس حامەدوۆ, ۆاكيل نابيەۆ, د.ا.قوناەۆ اتىنداعى ەۋرازيالىق زاڭ اكادەمياسىنىڭ رەكتورى ءومىرالى جالايري, سونداي-اق بايانداماشىلار دەموكراتيالىق ساياسي جۇيەسى, اشىق نارىقتىق ەكونوميكاسى, بەيبىت ساياساتى بار قازىرگى قازاقستاننىڭ دامۋىنا اتا زاڭنىڭ نەگىز بولعانىن ءارى ەلىمىزدىڭ الەمدەگى بەدەلىنىڭ وسۋىنە ىقپالىن تيگىزگەنىن اتاپ ءوتتى.
كونستيتۋتسيا قوعامدىق كەلىسىم مەن ۇلتتىق بىرلىكتى نىعايتۋدىڭ, ازاماتتارعا ەتنوسىنا قاراماستان, تەڭ مۇمكىندىكتەردى قامتاماسىز ەتۋدىڭ ىرگەلى نەگىزدەرىن بەكىتتى. نەگىزگى زاڭعا سايكەس, قازاقستان رەسپۋبليكاسىنىڭ ءاربىر ازاماتى انا ءتىلىن قولدانۋعا, قارىم-قاتىناس, ءبىلىم بەرۋ, وقۋ جانە شىعارماشىلىق ءتىلىن ەركىن تاڭداۋعا قۇقىلى. اتا زاڭ بارلىق ەتنوستىق توپتاردىڭ قاۋىپسىزدىگىن, سالت-داستۇرلەرىن, ءتىلى مەن مادەنيەتىن ەركىن دامىتۋعا مۇمكىندىك بەرەدى. ال ەتنوسارالىق جانە كونفەسسياارالىق كەلىسىمدى بۇزاتىن كەز كەلگەن ارەكەتتەر كونستيتۋتسيالىق ەمەس دەپ تانىلادى.
قازاقستاندا تۇراتىن ەتنوس وكىلدەرى مەملەكەتتىك ءتىلدى ۇيرەنۋدىڭ ماڭىزدىلىعىن تۇسىنۋدە, جىلدان-جىلعا قازاق تىلىندە سويلەيتىن جاستاردىڭ قاتارى ءوسىپ كەلەدى. قحا دا وسى باعىتتا جۇمىس ىستەپ, مەملەكەتتىك ءتىلدى ۇيرەنۋگە ارنالعان ءتۇرلى جوبالاردى جۇزەگە اسىرۋدا. مۇنىڭ ءبارى ەلدىڭ دامۋىنا, بارلىق قازاقستاندىقتاردىڭ بولاشاق ءۇشىن بىرلەسكەن جانە جەمىستى جۇمىسىنا بەرىك نەگىز قۇرايدى.
قاتىسۋشىلار بارلىق ەتنوس وكىلدەرىن تابىستى دامۋدىڭ, قازاقستاندىق قوعامدا بىرلىك پەن كەلىسىمنىڭ ساقتالۋىنىڭ نەگىزى بولىپ تابىلاتىن اتا زاڭدا جاريالانعان نورمالاردى بۇلجىتپاي ساقتاۋعا شاقىردى.
