«اتامەكەن» ەكسپەديتسياسى قاراعاندى وبلىسىنان ورالدى

قازاق حالقىنىڭ مادەنيەتى مەن تاريحىن، ايماقتاردىڭ تۋريستىك الەۋەتىن ناسيحاتتاۋ - ەكسپەديتسيا بارىسىنداعى باستى ماقسات. وقىرماندارعا ەكسپەديتسيا بارىسىنان فوتورەپورتاج ۇسىنامىز.

«ەگەمەن قازاقستان» رگ اكتسيونەرلىك قوعامى باسقارما توراعاسىنىڭ ورىنباسارى ەربولات قامەن، «Egemen Qazaqstan» گازەتى باس رەداكتورىنىڭ ورىنباسارى تالعات باتىرحان، باس گازەتتىڭ ءبولىم مەڭگەرۋشىسى ميراس اسان، «ەگەمەننىڭ» قاراعاندى وبلىسىنداعى مەنشىكتى ءتىلشىسى قايرات ءابىلدا جانە «كازاحستانسكايا پراۆدا» گازەتىنىڭ ءجۋرناليسى زارينا موسكاۋ باستاعان قوس باسىلىمنىڭ باسقا دا قىزمەتكەرلەرىن قاراعاندى قالاسىنىڭ كىرە بەرىسىنەن وبلىس اكىمدىگىنىڭ وكىلدەرى قارسى الدى. 

«قاراعاندى ​​وبلىسى تاريحي-مادەني مۇراعا باي. ءبىز ەلىمىزدىڭ باس باسىلىمدارىنىڭ وكىلدەرىن، وتاندىق باق كوشباسشىلارىن قاسيەتتى جەردە قارسى العانىمىزعا قۋانىشتىمىز»، دەدى ەكسپەديتسيا قاتىسۋشىلارىن كۇتىپ العان وبلىستىق ىشكى ساياسات باسقارماسىنىڭ باسشىسى ەرلان قۇسايىن. ۇزاق ايالداماستان «اتامەكەندىكتەر» جاڭاارقا اۋدانىنا جولعا شىقتى. 

ەكسپەديتسيا مۇشەلەرى س. سەيفۋللين اتىنداعى جاڭاارقا اۋدانىنىڭ كىتاپحاناسىنا باس سۇقتى. ول جەردە ەتنوگراف-جازۋشى، ارداگەر جۋرناليست تورەحان مايباستىڭ «قۇرمالدىق» اتتى جاڭا كىتابىنىڭ تۇساۋكەسەرى ءوتتى.

قاراعاندىدان قوسىلعان ارداگەر جۋرناليست تورەحان مايباس، Saryarqa apqarat جشس ديرەكتورى قامبار احمەت، وبلىستىق ىشكى ساياسات باسقارماسىنىڭ ءبولىم باسشىسى نۇرجان يلياشەۆ ەكسپەديتسيا مۇشەلەرىنە «اقسەلەۋ بيىگىنە» جول باستاپ باردى. جينالعان توپ جازۋشى اقسەلەۋ سەيدىمبەكتىڭ ارۋاعىنا قۇران باعىشتاپ، رۋحىنا تاعزىم ەتتى.

اقسەلەۋ سەيدىمبەك جاڭاارقا اۋدانىنىڭ ورتالىعى اتاسۋ كەنتىنىڭ ىرگەسىندە جەرلەنگەن.

بۇدان كەيىنگى باعىت جەزقازعان قالاسى بولاتىن. 

بۇنداعى ساپار جەزقازعان قالاسىنىڭ اكىمىمەن كەزدەسۋدەن باستالدى.

قالا اكىمى قايرات ءابساتتاروۆ وسى مەكەننىڭ تاريحىن، ەكونوميكالىق الەۋەتى جايلى بايانداپ بەردى. ەكسپەديتسيانىڭ ماقساتىن ماڭىزدى سانايتىنىن جەتكىزدى.

 كەزدەسۋدەن كەيىن جەزقازعان تاريحي-ارحەولوگيالىق مۋزەيىن تاماشالاۋدىڭ ءساتى ءتۇستى.

جەزقازعان وبلىستىق تاريحي-ارحەولوگيالىق مۋزەيى 1978 جىلى 10 مامىردا قازاق كسر مينيسترلەر كەڭەسىنىڭ شەشىمىمەن جەزقازعان كەن-مەتاللۋرگيا كومبيناتىنىڭ تاريحي-وندىرىستىك مۇراجايىنىڭ نەگىزىندە قۇرىلعان. 

وسىدان كەيىن جەزقازعان قالاسىنان سولتۇستىك-شىعىسقا قاراي 50 شاقىرىم جەردە ورنالاسقان جوشى حان كەسەنەسىنە باردى. 

حان كەسەنەسىنە كەلۋشىلەردىڭ قاراسى كوپ.

كەسەنە ماڭىندا جوشى ورداسىنىڭ ورنى بار.

كەسەنەگە جاقىن جەردە «جوشى-حان» تاريحي-مادەني كەشەنى سالىنعان. جۋرناليستەر كەشەن عيماراتىن ارالاپ، كوردى.

زاماناۋي كەشەن الىس-جاقىننان كەلەتىن تۋريستەر ءۇشىن قولايلى بولماق.

ەكسپەديتسيا ءارى قاراي الاشا حان كەسەنەسىنە باردى.

مۇندا دا كەلۋشىلەر قاتارى كوپ.

ءتۇس اۋا «اتامەكەن» ەكسپەديتسياسى  ۇلىتاۋ اۋدانىنا اتباسىن تىرەدى. اۋدان اكىمى باستاعان توپ ساپار شەككەن توپتى ارنايى كۇتىپ الدى. ساياحاتشىلار  ۇلىتاۋ» مۋزەي-قورىعىن ارالاپ، ولكەنىڭ تىنىس-تىرشىلىگىمەن تانىستى. تاريحي جادىگەرلەردى تاماشالاپ، ءتۇرلى دەرەكتەردى ەستىدى.